ཁ་བྱང་མེད་པའི་སྙན་ངག

རླུང་བུ་སྒལ་པ་ལ་རྒྱབ་པས།།
རྒྱུས་མེད་ས་མཐའ་ལ་འཕངས་སོང་།།
ལས་འཕྲོའི་མདུད་པ་ཞིག་ཐེབས་པས།།
ད་ནི་བཀྲོལ་ཐབས་ཤིག་མི་འདུག།

ནམ་མཁའི་བླ་མ་ཡི་བཀོད་སྒྲིག།
སུས་ཀྱང་བཅོས་ཐབས་ཤིག་མི་འདུག།
ལས་དབང་རླུང་འཚུབ་ཀྱི་ཁྲོད་ནས།།
ཁྱེད་ཉིད་ཡལ་ཐབས་ཀྱང་མི་འདུག།

ཁྱེད་ཉིད་མཇལ་སྐལ་ཞིག་བྱུང་བ།།
ཚེ་སྔོན་ལས་འཕྲོ་ཞིག་ཡིན་སྐད།།
ཚེ་གང་གཏན་གྲོགས་ཤིག་བྱེད་པའི།།
ངེད་ལ་བསོད་ནམས་འདྲ་ཡོད་དམ།།

དེབ་ལ་མགོ་བོ་ཞིག་འཁོར་ནས།།
འཇིག་རྟེན་འཚོ་བོ་དེ་མ་ཤེས།།
སེམས་པ་ཚོར་འདུ་ཡིས་དཀྲུགས་དུས།།
ང་རང་རྗེས་ལུས་ཤིག་ཐེབས་འདུག།།

སེམས་ཀྱི་བརྩེ་དུང་གི་གྲུ་གཟིངས།།
ཚོར་བའི་རྦ་རླབས་ཀྱིས་གཡོས་སོང་།།
ལྷད་མེད་བརྩེ་དུང་གི་ཆང་གིས།།
ང་ཡི་སྙིང་ཁམས་དེ་བཟི་སོང་།།

མ་བཅོས་ལྷད་མེད་ཀྱི་བརྩེ་དུང་།།
སྦས་ན་སྦས་ཐབས་ཤིག་མི་འདུག།
ཁྱེད་ཀྱི་ཉེ་འགྲམ་དུ་སླེབས་དུས།།
བརྗོད་ན་བརྗོད་ཐབས་ཀྱང་མི་འདུག།

སེམས་པ་ཁྱེད་ཉིད་ལ་ཤོར་བ།།
ད་ནི་འགོག་ཐབས་ཤིག་མི་འདུག།
དེ་སྐད་ཁྱེད་ཉིད་ལ་བརྗོད་ན།།
ངེད་ཉིད་འབྲེལ་ཐག་དེ་ཆད་ཡོང་།།

སྐྱོ་གདུང་སྙིང་ཁ་ལ་རུམ་ནས།།
འཛུམ་མདངས་ཁྱེད་ཉིད་ལ་ཕུལ་ཡོད།།
ཁྱེད་ལ་སྤྱན་མིག་ཅིག་ཡོད་ན།།
ད་ནི་མཁྱེན་ཚོད་ཅིག་ཡིན་ད།།

ཁྱེད་དང་གླེང་མོལ་རེ་བྱེད་དུས།།
ང་ཡི་སྐད་ངག་དེ་འདར་སོང་།།
སྙིང་ཆུང་འདར་སིག་ཅིག་རྒྱབ་པ།།
ཁྱེད་ཀྱིས་མཁྱེན་གྱི་རང་ཨེ་ཡོད།།

བརྩེ་དུང་རུས་གསེབ་ཏུ་སྦས་ནས།།
ཐ་མའི་སྲོག་དབུགས་དེ་ཆད་འགྲོ།
འཇིག་རྟེན་ཕྱི་མ་ལ་སླེབས་ཀྱང་།།
ཁྱེད་ཉིད་སེམས་གཏིང་ནས་དྲན་ཡོང་།།

ལས་འཕྲོའི་དབང་ཤུགས་དེ་བཙན་པས།།
ངེད་གཉིས་བྷུན་ཏར་དུ་འཛོམས་སོང་།།
ད་དུང་ལས་འཕྲོ་ཞིག་ཡོད་ན།།
མ་ཤི་གསོན་བྲལ་ཞིག་མི་བྱེད།།

ཁྱེད་ཀྱི་ལྷད་མེད་ཀྱི་འཛུམ་མདངས།།
ང་ལ་བདེ་སྐྱིད་ཅིག་བྱིན་ཀྱང་།།
ཀུན་ལ་འཛུམ་མདངས་དེ་བསྟན་དུས།།
སྙིང་ལ་ན་ཟུག་ཅིག་གཏོང་གི།

ང་ཡི་སེམས་གཏིང་གི་སྐད་ཆ།།
ཁྱེད་ལ་བརྗོད་འདོད་ཅིག་འདུག་ཀྱང་།།
དེ་ཡིས་ཁྱེད་ཐུགས་ལ་ཕོག་ན།།
སེམས་པ་འགྱོད་པ་ཡིས་མནན་ཡོང་།།

རེ་བ་མཐོ་བོ་ཞིག་མེད་ཀྱང་།།
ཁྱེད་ཀྱི་འཇུམ་མདངས་ཀྱི་ཞལ་རས།།
རྟག་ཏུ་མཇལ་རྒྱུ་ཞིག་བྱུང་ན།།
འདོད་པ་དེ་ག་ཡིས་འཚིམ་པ།།

འཛིན་གྲྭའི་ནང་སློབ་ཕྲུག་རྣམས་ལ་རྩོམ་དཔེའི་ཚུལ་དུ་ཐོལ་བྱུང་དུ་༢༠༡༣། ༥། ༥ཉིན།