མ་སུ་རི་ཡི་མཚན་མོ།

མ་སུ་རི་ཡི་མཚན་མོ།

བེ་རི་རྒྱལ་སྲས། 

ཁ་སང་མ་སུ་རིར་སྐྱོད་དུས།།

ཉི་མ་ཁ་ཤས་ཀྱི་རིང་ལ།།

ཚེ་གང་བརྗེད་ཐབས་རང་མེད་པའི།།

དྲན་རྟེན་སྙིང་ཁ་ལ་བརྐོས་སོང་།།

ཉི་མ་རི་རྩེ་ནས་ནུབ་དུས།།

ང་ཚོ་ལག་གདང་དེ་སྦྲེལ་ནས།།

ཁྲོམ་གཞུང་འཆམ་འཆམ་དུ་བསྐྱོད་པའི།།

དུས་དེ་བརྗེད་ཐབས་རང་མི་འདུག།

ཁྱེད་ཀྱི་ཞལ་རས་ཀྱི་ངོས་ལ།།

ཡིད་འོང་འཛུམ་ཆུང་གི་མཛེས་ཀོང་།།

ཐེངས་མང་བརྗེད་ཐབས་ཤིག་བྱས་ཀྱང་།།

སེམས་ནས་གསུབ་ཐབས་རང་མི་འདུག།

ཁྱེད་ཀྱིས་ཁོ་བོ་ལ་བཅངས་པའི།།

ཡིན་ལུགས་ཚུལ་ལྡན་གྱི་གུས་ཞབས།།

ཁྲེལ་མེད་བུ་ཆུང་གི་ཚོར་བར།།

གེགས་དང་བར་ཆད་རང་རེད་འདུག།

གློག་འོད་དམར་པོ་ཡི་འོག་ཏུ།།

སྟོད་ཐུང་དམར་པོ་ཞིག་གྱོན་ནས།།

མཆུ་རྩི་དམར་པོ་དེ་བྱུག་དུས།།

ངའི་སེམས་རང་དབང་ཞིག་ཡོད་དམ།།

ཁྱེད་ཀྱི་ཞི་འཇམ་གྱི་གཤིས་ཀ།

ང་ཡི་སྙིང་ཁ་ལ་སིམ་སོང་།།

ཚོར་བའི་མེ་དཔུང་འདི་འབར་ཡང་།།

དུ་བ་དོན་ཐབས་ཤིག་མི་འདུག།

སྐྱིད་པའི་རི་གཤོངས་*ཀྱི་ཁྲོད་དུ།།

ང་ཡི་སེམས་པ་འདི་ལུས་འདུག།

ཚ་དྲོད་མ་ཡལ་བའི་གོང་དུ།།

ཁྱེད་ཀྱིས་ཕྱག་ཟུང་གིས་བཞེས་རོགས།།

སོ་སོའི་ས་མཚམས་ལས་བརྒལ་ནས།།

སྟོང་བསམ་ཞིང་ཁམས་ལ་འགྲིམ་པར།།

ཚོར་བར་གཅེས་སྤྲས་ཤིག་མེད་ཀྱང་།།

འཕྱ་སྨོད་མ་གནང་རོགས་གྲོགས་མོ།།

ཤར་ལྷོ་ནུབ་བྱང་དུ་འགྲིམས་ནས།།

མཛེས་མ་མང་པོ་ཞིག་མཐོང་ཡང་།།

སྙིང་གི་རྩ་བ་ནས་འཕྲོག་མཁན།།

བུ་མོ་ཁྱེད་ཉིད་ལས་མ་བྱུང་།།

ཟུངས་ཁྲག་དམར་དམར་དུ་འཛག་པའི།།

སྙིང་ཆུང་རལ་པོ་འདི་ཁུར་ནས།།

མིག་ཆུ་ཁོག་པ་རུ་མིད་བཞིན།།

རྒྱ་གར་ལྷོ་ཕྱོགས་ལ་ཆས་འགྲོ།།

སོ་སོའི་ཁ་སྟབས་ལ་མ་བལྟས།།

ཁྱེད་ལ་རེ་བ་ཞིག་བྱས་པ།།

ཟླ་བར་ལག་སྙོབ་དང་འདྲ་བས།།

རང་སྡུག་རང་ཉོས་རང་རེད་འདུག།

ཁྱེད་ཉིད་རང་འཚམ་གྱི་མི་དང་།།

མི་ཚེ་སྐྱིད་པོ་ཞིག་སྐྱོལ་དང་།།

ཁོ་བོས་ཁེར་རྐྱང་གི་ཤག་ནས།།

གསོལ་བ་སྨོན་ལམ་རེ་འདེབས་ཆོག།

༢༠༡༨/༤/༡༡ ཉིན་མེ་འཁོར་ནས། 

ཕྱི་དྲོ།༧:༤༠

• Happy valley