ཚིགས་བཅད་སྡེབ་སྦྱོར་གྱི་བརྗོད་པ་བཤད་པ།

 
དང་པོ། ཚིགས་བཅད་ཀྱི་སྡེབ་སྦྱོར་བཤད་པ།

ཚེག་བར་གསུམ་པ་ཅན།

སྙིང་ཁོང་གི།
བརྩེ་བ་འདི།།
ཁྱེད་ཉིད་ལ།།
ལེགས་སྐྱེས་འབུལ།།        ལྟ་བུ།

ཚེགས་བར་བཞི་པ་ཅན།

སྙིང་ཁོང་གཏིང་གི།
བརྩེ་དུང་དམར་པོ།།
མཛེས་ལྡན་ཁྱེད་ལ།།
ལེགས་སྐྱེས་ཕུལ་ཡོད།།     ལྟ་བུ།།

ཚེག་བར་ལྔ་བ་ཅན།

སྙིང་ཆུང་གི་གཏིང་ནས།།
ལྷད་མེད་ཀྱི་བརྩེ་དུང་།།
མཛེས་ལྡན་གྱི་བུ་མོར།།
ལེགས་སྐྱེས་སུ་ཕུལ་ཡོད།།   ལྟ་བུ།།

ཚེག་བར་དྲུག་པ་ཅན།

སྙིང་ཆུང་དམར་པོའི་གཏིང་གི།
ལྷད་མེད་བརྩེ་དུང་དམར་པོ།།
མཛེས་ལྡན་བུ་མོ་ཁྱེད་ལ།།
ལེགས་པའི་སྐྱེས་སུ་ཕུལ་ཡོད།།       ལྟ་བུ།

ཚེག་བར་བདུན་པ་ཅན། འདིའི་མན་ཆད་རིགས་གསུམ་དུ་ཕྱེ་ནས་བཤད་པར་བྱ་སྟེ།

༡༽ ཚེག་བར་བདུན་པ་ཅན་གསུམ་པ་ལ་ངལ་གསོ་ཐོབ་པ།

སྙིང་ཁོང་གི་རུས་པའི་གསེབ་ནས།།
ལྷད་མེད་ཀྱི་བརྩེ་དུང་དམར་པོ།།
མཛེས་ལྡན་གྱི་བུ་མོ་ཁྱེད་ལ།།
དྲན་རྟེན་གྱི་ལེགས་སྐྱེས་ཕུལ་ཡོད།།   ལྟ་བུ།

༢༽ ཚེག་བར་བདུན་པ་ཅན་ལྔ་པ་ལ་ངལ་གསོ་ཐོབ་པ།

དམར་ཆུང་སྙིང་ཁོང་གི་གཏིང་ནས།།
ལྷད་མེད་བརྩེ་དུང་གི་མེ་ཏོག།།
ང་ཡི་མཛེས་ལྡན་གྱི་བུ་མོར།།
དྲན་པའི་ལེགས་སྐྱེས་སུ་ཕུལ་ཡོད།།   ལྟ་བུ།

༣༽ ཚེག་བར་བདུན་པ་ཅན་ཐ་མ་ལ་ངལ་གསོ་ཐོབ་པ།

ཟུར་གསུམ་སྙིང་ཆུང་དམར་པོ་ཡི།།
ལྷད་མེད་བརྩེ་དུང་མེ་ཏོག་འདི།།
མཛེས་ལྡན་བུ་མོ་ཁྱེད་ཉིད་ལ།།
ཐུགས་སེམས་དགྱེས་པའི་ལེགས་སྐྱེས་ཕུལ།།  ལྟ་བུ།

ཚེག་བར་བརྒྱད་པ་ཅན། འདི་ལའང་རིགས་གསུམ་ཡོད་དེ།

༡༽ ཚེག་བར་བརྒྱད་པ་ཅན་ཐོག་མར་ལ་ངལ་གསོ་ཐོབ་པ།

ནང་དམར་ཆུང་སྙིང་གི་གཏིང་རུམ་གྱི།།
ལྷད་མེད་པའི་བརྩེ་དུང་མེ་ཏོག་འདི།།
ཆེས་མཛེས་སྡུག་ལྡན་པའི་བུ་མོ་ལ།།
བུ་ང་ཡིས་ལེགས་པའི་སྐྱེས་སུ་ཕུལ།། ལྟ་བུ།

༢༽ ཚེག་བར་བརྒྱད་པ་ཅན་ངལ་གསོ་མི་ཐོབ་པ།

ཟུར་གསུམ་དམར་ཆུང་སྙིང་ཁོང་གཏིང་གི།།
ལྷད་མེད་བརྩེ་དུང་མེ་ཏོག་ཆུན་པོ།།
མཛེས་སྡུག་ལྡན་པའི་བུ་མོ་ཁྱེད་ལ།།
བུ་ཆུང་ང་ཡིས་ལེགས་སྐྱེས་ཕུལ་ཡོད།།         ལྟ་བུ།

༣། ཚེག་བར་བརྒྱད་པ་ཅན་གསུམ་པ་དང་བརྒྱད་པ་ལ་ངལ་གསོ་ཐོབ་པ།

དམར་ཆུང་གི་ཟུར་གསུམ་སྙིང་ཁོང་ནས།།
ལྷད་མེད་ཀྱི་བརྩེ་དུང་དངས་མ་འདི།།
མཛེས་ལྡན་གྱི་བུ་མོ་ཁྱེད་ཉིད་ལ།།
དྲན་རྟེན་གྱི་ལེགས་སྐྱེས་ཕུལ་ཡོད་ལགས།།     ལྟ་བུ།

ཚེག་བར་དགུ་པ་ཅན་གྱི་སྡེབ་སྦྱོར། འདི་ལའང་རིགས་གསུམ་ཡོད་པ་ལས།

༡། ཚེག་བར་དགུ་པ་ཅན་ཐ་མ་ལ་ངལ་གསོ་ཐོབ་པ།།

དམར་ཆུང་ཟུར་གསུམ་སྙིང་གི་གཏིང་རུམ་ནས།།
ལྷད་མེད་བརྩེ་དུང་དངས་མའི་མེ་ཏོག་འདི།།
ཡིད་འོང་མཛེས་ལྡན་བུ་མོ་ཁྱེད་ཉིད་ལ།།
མི་ཚེ་འདི་ཡི་ལེགས་སྐྱེས་ཟོལ་གྱིས་ཕུལ།།     ལྟ་བུ།

༢ ། ཚེག་བར་དགུ་པ་ཅན་བདུན་པ་ལ་ངལ་གསོ་ཐོབ་པ།

ཟུར་གསུམ་དམར་ཆུང་སྙིང་ཁོང་གི་གཏིང་ནས།།
ལྷད་མེད་ང་ཡི་བརྩེ་དུང་གི་མེ་ཏོག།
ཡིད་དབང་འཕྲོག་པའི་མཛེས་ལྡན་གྱི་བུ་མོར།།
ཁྱེད་ཉིད་དགྱེས་པའི་ལེགས་སྐྱེས་སུ་ཕུལ་ཡོད།།           ལྟ་བུ།

༣ ། ཚེག་བར་དགུ་པ་ཅན་ལྔ་པ་ལ་ངལ་གསོ་ཐོབ་པ།

ཟུར་གསུམ་སྙིང་ཆུང་གི་རུས་པའི་གསེབ་ནས།།
ལྷད་མེད་དངས་གཙང་གི་བརྩེ་དུང་དམར་པོ།།
ཡིད་འཕྲོག་མཛེས་ལྡན་གྱི་བུ་མོ་ཁྱེད་ལ།།
རིན་བྲལ་ལེགས་སྐྱེས་ཀྱི་ཟོལ་དུ་ཕུལ་ཡོད།།     ལྟ་བུ།

ཚེག་བར་བཅུ་པ་ཅན་གྱི་སྡེབ་སྦྱོར། འདི་ལའང་རིགས་གསུམ་ཡོད་པ་ལས།

༡།  ཚེག་བར་བཅུ་པ་ཅན་དང་པོ་དང་བརྒྱད་པ་ལ་ངལ་གསོ་ཐོབ་པ།

ནང་སེམས་པའི་གཏིང་གི་སྙིང་ཁོང་གི་དབུས་ནས།།
ལྷད་མེད་པའི་བརྩེ་དུང་མེ་ཏོག་གི་ཆུན་པོ།།
ཡིད་དབང་མེད་འཕྲོག་པའི་མཛེས་ལྡན་གྱི་བུ་མོར།།
བུ་ང་ཡིས་དྲན་རྟེན་ལེགས་སྐྱེས་སུ་ཕུལ་ཡོད།།  ལྟ་བུ།

༢།  ཚེག་བར་བཅུ་པ་ཅན་གསུམ་པ་དང་བརྒྱད་པ་ལ་ངལ་གསོ་ཐོབ་པ།

ཟུར་གསུམ་གྱི་སྙིང་ཆུང་དམར་པོ་ཡི་གསེབ་ནས།།
དྭངས་གཙང་གི་སེམས་པ་ལྷད་མེད་ཀྱི་བརྩེ་དུང་།།
མཛེས་སྡུག་གི་གོང་བུ་ཡིད་འཕྲོག་གི་ལྷ་མོར།།
མི་ཚེ་ཡི་སྙིང་པོ་ལེགས་སྐྱེས་སུ་ཕུལ་ཡོད།།               ལྟ་བུ།

༣།  ཚེག་བར་བཅུ་པ་ཅན་བདུན་པ་དང་བཅུ་པ་ལ་ངལ་གསོ་ཐོབ་པ།

ཡིད་ཀྱི་དབང་རྟེན་ཟུར་གསུམ་སྙིང་ཆུང་གི་གཏིང་ནས།།
དྭངས་གཙང་ལྷད་པ་མེད་པའི་བརྩེ་དུང་གི་མེ་ཏོག།
ཀུན་གྱི་ཡིད་དབང་འགུགས་པའི་མཛེས་ལྡན་གྱི་བུ་མོར།།
ལྷན་འཛོམས་དྲན་རྟེན་བསམས་ནས་ལེགས་སྐྱེས་སུ་ཕུལ་ཡོད།།    ལྟ་བུ།

ཚེག་བར་བཅུ་གཅིག་ཅན་གྱི་སྡེབ་སྦྱོར། འདི་ལ་རིགས་གསུམ་སྟེ།།

༡། ཚེག་བར་བཅུ་གཅིག་པ་ཐ་མ་ལ་ངལ་གསོ་ཐོབ་པ།

སེམས་ཀྱི་གཞི་རྟེན་ཟུར་གསུམ་དམར་ཆུང་སྙིང་ཁོང་ནས།།
དྭངས་གཙང་ལྷད་པ་མེད་པའི་བརྩེ་དུང་མེ་ཏོག་འདི།།
ཀུན་གྱི་ཡིད་དབང་འགུགས་པའི་མཛེས་ལྡན་བུ་མོ་ལ།།
ངེད་གཉིས་ལྷན་འཛོམས་དྲན་རྟེན་གྱིས་ལེགས་སྐྱེས་ཕུལ།།          ལྟ་བུ།

༢།  ཚེག་བར་བཅུ་གཅིག་པ་དགུ་པ་ལ་ངལ་གསོ་ཐོབ་པ།

ཟུར་གསུམ་སྙིང་ཆུང་དམར་པོའི་རུས་རྐང་གི་གསེབ་ནས།།
དྭངས་གཙང་ལྷད་པ་མེད་པའི་བརྩེ་དུང་གི་མེ་ཏོག།།
ཀུན་གྱི་ཡིད་དབང་ཕྲོག་པའི་མཛེས་ལྡན་གྱི་བུ་མོར།།
ནམ་ཡང་འགྱུར་བ་མེད་པའི་ལེགས་སྐྱེས་སུ་ཕུལ་ཡོད།།   ལྟ་བུ།

༣། ཚེག་བར་བཅུ་གཅིག་པ་ལྔ་པ་ལ་ངལ་གསོ་ཐོབ་པ།

ཟུར་གསུམ་སྙིང་ཆུང་གི་སེམས་པའི་གཏིང་ནས།།
དྭངས་གཙང་ལྷད་མེད་ཀྱི་བརྩེ་དུང་མེ་ཏོག་ཆུན་པོ།།
ཡིད་དབང་ཅིག་ཅར་དུ་འཕྲོག་པའི་མཛེས་ལྡན་བུ་མོ་ཁྱེད་ལ།།
ནམ་ཡང་འགྱུར་མེད་ཀྱི་མི་ཚེའི་ལེགས་སྐྱེས་ཕུལ་ཡོད།།            ལྟ་བུ།

ཚེག་བར་བཅུ་གཉིས་པའི་སྡེབ་སྦྱོར། འདི་ལ་རིགས་གསུམ་སྟེ།

༡༽ ཚེག་བར་བཅུ་གཉིས་པའི་རིགས་དང་པོ་ལྔ་པ་དང་བཅུ་པ་ལ་ངལ་གསོ་ཐོབ་པ།

ཟུར་གསུམ་སྙིང་ཆུང་གི་སེམས་ཁམས་ཀྱི་གཏིང་ནས།།
དྭངས་གཙང་ལྷད་མེད་ཀྱི་བརྩེ་དུང་མེ་ཏོག་གི་ཆུན་པོ།།
ཡིད་དབང་ཅིག་ཅར་དུ་འཕྲོག་པའི་མཛེས་ལྡན་གྱི་བུ་མོ།།
ནམ་ཡང་འགྱུར་མེད་ཀྱི་མི་ཚེའི་ལེགས་སྐྱེས་སུ་ཕུལ་ཡོད།།         ལྟ་བུ།།

༢༽ ཚེག་བར་བཅུ་གཉིས་པའི་རིགས་གཉིས་པ་ངལ་གསོ་མི་ཐོབ་པ།

ཟུར་གསུམ་སྙིང་ཆུང་དམར་པོའི་སེམས་པའི་གྲུ་ཁ་ཞིག་ནས།།
དྭངས་གཙང་ལྷད་མེད་པ་མེད་པའི་བརྩེ་དུང་མེ་ཏོག་ཆུན་པོ།།
ཡིད་དབང་ཅིག་ཅར་འཕྲོག་པའི་མཛེས་ལྡན་བུ་མོ་ཁྱེད་ལ།།
ནམ་ཡང་འགྱུར་བ་མེད་པའི་མི་ཚེའི་ལེགས་སྐྱེས་ཕུལ་ཡོད།།        ལྟ་བུ།།

༣༽ ཚེག་བར་བཅུ་གཉིས་པའི་རིགས་གསུམ་པ་དང་པོ་དང་བཅུ་པ་ལ་ངལ་གསོ་ཐོབ་པ།

ནང་སེམས་ཀྱི་དབང་རྟེན་ཟུར་གསུམ་སྙིང་ཆུང་གི་གཏིང་ནས།།
ལྷད་མེད་པའི་དྭངས་གཙང་བརྩེ་དུང་མེ་ཏོག་གི་ཆུན་པོ།།
ཡིད་དབང་མེད་འཕྲོག་པའི་མཛེས་ལྡན་སྙིང་སྡུག་གི་བུ་མོར།།
དུས་ནམ་ཡང་འགྱུར་མེད་མི་ཚེའི་ལེགས་སྐྱེས་སུ་ཕུལ་ཡོད།།       ལྟ་བུ།

ཚེག་བར་བཅུ་གསུམ་པ་ཅན་གྱི་སྡེབ་སྦྱོར། འདི་ལ་རིགས་གསུམ་ཡོད་པ་ལས།

 ༡༽ ཐ་མ་ལ་ངལ་གསོ་ཐོབ་པ།

ཟུར་གསུམ་སྙིང་ཆུང་དམར་པོའི་སེམས་པའི་གཏིང་རུམ་ནས།།
དྭངས་གཙང་ལྷད་པ་མེད་པའི་བརྩེ་དུང་མེ་ཏོག་ཆུན་པོ་འདི།།
ཀུན་གྱི་ཡིད་དབང་ཅིག་ཅར་འཕྲོག་པའི་མཛེས་ལྡན་ཁྱེད་ཉིད་ལ།།
ནམ་ཡང་མི་འགྱུར་ལེགས་སྐྱེས་འདི་ཉིད་དྲན་པའི་རྟེན་དུ་ཕུལ།།      ལྟ་བུ།             

༢༽ བཅུ་གཅིག་པ་ལ་ངལ་གསོ་ཐོབ་པ།

སེམས་ཀྱི་དབང་རྟེན་སྙིང་ཆུང་དམར་པོའི་སེམས་ཁམས་ཀྱི་གཏིང་ནས།།
དྭངས་གཙང་ལྷད་པ་མེད་པའི་བརྩེ་དུང་མེ་ཏོག་གི་ཆུན་པོ།།
ཡིད་དབང་ཅིག་ཅར་འཕྲོག་པའི་མཛེས་ལྡན་སྙིང་སྡུག་གི་བུ་མོར།།
ནམ་ཡང་འགྱུར་བ་མེད་པའི་མི་ཚེའི་ལེགས་སྐྱེས་སུ་ཕུལ་ཡོད།།     ལྟ་བུ།             

༣༽ ལྔ་པ་ལ་ངལ་གསོ་ཐོབ་པ།

ཟུར་གསུམ་སྙིང་ཆུང་གི་རུས་པའི་བར་སྲུབས་ཕྲ་མོ་ཞིག་ནས།།
དྭངས་གཙང་ལྷད་མེད་ཀྱི་བརྩེ་དུང་དམར་པོའི་མེ་ཏོག་ཆུན་པོ།།
ཀུན་ཡིད་དབང་མེད་དུ་འཕྲོག་པའི་མཛེས་ལྡན་བུ་མོ་ཁྱེད་ལ།།
ནམ་ཡང་འགྱུར་མེད་ཀྱི་མི་ཚེའི་ལེགས་སྐྱེས་ཟོལ་དུ་ཕུལ་ཡོད།།     ལྟ་བུ།