༢༠༡༣། ཟླ་བ་༡༡པའི་ནང་གི་ཚན་རིག་ལོ་རིམ་དང་པོའི་བོད་ཡིག་སློབ་ཚན་འཆར་འགོད།

༡། རོ་ཐང་དུ་བསྐྱོད་པའི་ཟིན་ཐོ་འབྲི་རྒྱུ། ( རོ་ཐང་གི་ལོ་རྒྱུས་དང་། ཡུལ་སྐོར་གྱི་ཚོར་བ་སོགས་ངེས་པར་འབྲི་རྒྱུ།)
༢། སྡེབ་སྦྱོར་ཚེག་བར་བདུན་པ་ནས་དགུ་པའི་བར། སློབ་ཚན་ལྷན་སྦྱར་ཞུས་ཡོད།
༣། ཀ་རྩོམ་འབྲི་སྟངས། ( དཔེ་ཁ་ཤས་ལྷན་སྦྱར་ཞུས་ཡོད།)
༤། རྒྱུན་ལྡན་བཀའ་མོལ་ནང་ཞེ་ས་བསྐྱོན་ཚུལ།(སློབ་མ་ཁག་བགོས་ཀྱིས་ཞེ་ས་བསྐྱོན་ཚུལ་སྦྱོང་བརྡར་གནང་རྒྱུ
༥། གང་བློ་མའི་འགྲེལ་བཤད། གང་བློ་མ་འབྲི་བཅུག་རྒྱུ་དང་འགྲེལ་བཤད་བྱེད་རྒྱུ།)
༦། བོད་སིལ་བུའི་དུས་རབས་ངོ་སྤྲོད། (འུ་དུམ་བཙན་པོའི་རྗེས་བོད་ཀྱི་ཆབ་སྲིད་ཉམས་རྒུད་དང་། བསྟན་པ་ཕྱི་དར་གྱི་བྱུང་རབས་རྣམས་ངོ་སྤྲོད་མདོར་བསྡུས་ཤིག་བྱེད་རྒྱུ། )
༧། བརྗོད་དུམ་རྣམ་གཞག་གཉིས་པ། (བརྗོད་དུམ་གལ་ཆེ་བ་ཁ་ཤས་ངོ་སྤྲོད་དང་བཀོལ་སྤྱོད་བྱེད་ཚུལ་སློབ་རྒྱུ།)
༨། འཛིན་གྲྭའི་ནང་ཚགས་པར་སོགས་ཀློག་ཏུ་འཇུག་རྒྱུ། (ཀློག་ཡག་པོར་འགྱུར་ཆེད་ཚགས་པར་སོགས་ཀློག་ཏུ་འཇུག་རྒྱུ་དང་། སྒྲ་དག་གསལ་དང་། ཚིག་གི་གཅོད་མཚམས་སོགས་སློབ་རྒྱུ།) གལ་ཆེ།
༩། རང་ཉིད་ཀྱིས་བྲིས་པའི་ཨིན་ཇིའི་རྩོམ་ཡིག་བོད་ཡིག་ཏུ་བསྒྱུར་རྒྱུ།
(རང་གིས་བྲིས་པའི་ཨིན་ཇིའི་རྩོམ་ཡིག་ཅིག་བོད་ཡིག་ཏུ་བསྒྱུར་རྒྱུ་དང་། འགྱུར་དེ་ལ་བལྟས་ནས་རྒྱུགས་དུས་ཀྱི་བརྒྱ་ཆ་སྤྲོད་རྒྱུ།)

ཐུགས་སྣང་།

༡། ཟླ་བ་འདིའི་ནང་བོད་ཡིག་དཔེ་དེབ་གཅིག་ངེས་པར་ཀློག་རྒྱུ།
༢། ཡིག་གཟུགས་ཡར་རྒྱས་གཏོང་རྒྱུ།  (དགོས་ངེས་རྣམས་ཀྱིས་ཡིག་གཟུགས་བྲི་དེབ་ངེས་པར་ཉོས་ནས་བདུན་ཕྲག་རེར་ཤོག་བུ་གསུམ་ལས་
མི་ཉུང་བ་ཞིག་འབྲི་དགོས། དེ་ལ་རྒྱུགས་དུས་གཉིས་པའི་FA 2rd པའི་བརྒྱ་ཆ་སྤྲོད་རྒྱུ་ཡིན། )
༣། རྒྱུན་ལྡན་གྱི་རྩོམ་ཡིག་འབྲི་སྟངས་དང་། དཔེ་དེབ་ཀློག་སྟངས། སློབ་སྦྱོང་ལ་དོ་སྣང་གནང་སྟངས་ལ་གཞིགས་ནས་རྒྱུགས་དུས་ཁག་གི་བརྒྱ་ཆ་སྤྲོད་རྒྱུ་ལས་རྒྱུགས་སྤྲོད་དངོས་གཞི་ལ་དེ་ཙམ་ནུས་ཤུགས་འདོན་རྒྱུ་མིན།
༤། ཤག་རེས་དུས་བབ། བང་ཆེན། ཕ་ཡུལ་སོགས་ཚགས་ཤོག་གང་རུང་ཞིག་མངགས་ཉོ་དགོས་པ་དང་། དེ་དག་ལྟ་ཀློག་གནང་དགོས།

ཚིགས་བཅད་ཀྱི་སྡེབ་སྦྱོར།

                               མཁས་དབང་བེ་རི་དགེ་བཤེས་འཇིགས་མེད་དབང་རྒྱལ།

ཚིགས་བཅད་ཅེས་པ་ཚིག་གི་ཕྲེང༌།།

རྐང་པས་ངེས་པར་བཅད་པར་འདོད།།

ལེགས་སྦྱར་སྐད་ཀྱི་ཚིགས་བཅད་རྩོམ་ཡིག་འབྲི་སྟངས་ནི་སྡེབ་སྦྱོར་གྱི་གཞུང་དུ་གསལ་ཞིང༌། དེ་ཡང་རྩ་བའི་པྲིཏ྄ཏ་དང་ཛྙ་ཏི་གཉིས་ལས་རྣམ་གྲངས་དང་སྦྱོར་ཚུལ་བགྲངས་ལས་འདས་པ་ཡོད་ཀྱང༌། རང་ཅག་བོད་པའི་རྩོམ་ཡིག་འབྲི་སྟངས་ལ་དེ་ཙམ་ཉེ་བར་མི་མཁོ་བས་འདིར་འབུར་དུ་བཏོན་ནས་བཤད་པར་མི་བྱའོ།།

ཡང་ཚིགས་བཅད་ཀྱི་སྡེབ་སྦྱོར་ལ། གྲོལ་བ་དང༌། རིག མཛོད། འདུས་པ་སྟེ་བཞི་ཡོད་ཅིང༌། དེ་དག་གི་རྣམ་གཞག་ཀྱང་ཚིགས་བཅད་བསླབ་པའི་ལས་དང་པོ་བ་རྣམས་ལ་ཉེ་བར་མི་མཁོ་བས་རེ་ཞིག་དོར་ནས། འདིར་ལས་དང་པོ་བ་ཐོག་མར་འཇུག་པའི་ཚིགས་བཅད་ཀྱི་སྡེབ་སྦྱོར་ཧ་ཅང་གོ་སླ་བའི་ལུགས་སུ་བྱས་ནས་བཤད་པར་འདོད་དེ།

དེ་ཡང༌། བོད་སྐད་ཚེག་བར་གསུམ་པ་ནས།།

སོ་གསུམ་བར་དུ་སྦྱར་བ་ཡོད།།

རང་ཅག་བོད་སྐད་ལ་ཉེ་བར་མཁོ་བའི་སྡེབ་སྦྱོར་གྱི་འགྲོས་བཤད་ན། ཚེག་བར་གསུམ་པ་ཅན་ནས་ཚེག་བར་སོ་གསུམ་པའི་བར་དུ་སྦྱོར་བའི་སྲོལ་ཡོད་དོ། །འདིར་ཚེག་བར་དང༌། ཚིག་རྐང༌། ཚིགས་བཅད་བཅས་ཀྱི་གོ་དོན་ཅུང་ཟད་བཤད་ན།

༡༽ ཚིག་རྐང༌།

ཚེག་བར་འདྲ་མཉམ་ཅན་གྱི་ཚིག་སྦྱོར་ཉིས་ཤད་ཀྱིས་བཅད་མཚམས་གཅིག་ལ་ཚིག་རྐང་གཅིག་ཟེར། དཔེར་ན། གང་ལ་ཡོན་ཏན་མཆོག་མངའ་བ།།ལྟ་བུ།

༢༽ ཚེག་བར། ཚེག་(་)གིས་བཅད་པའི་ཡི་གེ་ལ་ཚེག་ཁྱིམ་མམ་ཚེག་བར་གཅིག་ཟེར། དཔེར་ན། བསྒྲིགས་ལྟ་བུ།

༣༽ ཚིགས་བཅད། ཚིག་རྐང་བཞི་རེ་ལ་ཚིགས་བཅད་རེ་ཟེར་ཅིང༌། ལེགས་སྦྱར་སྐད་ཀྱི་ཤཽ་ལོ་ཀ་དང་དོན་འདྲ། དཔེར་བརྗོད་ནི་འོག་ནས་ཤེས་པར་བྱའོ།།

ད་ནི་དངོས་གཞི་ཚིགས་བཅད་ཀྱི་སྡེབ་སྦྱོར་འབྲི་ཚུལ་གྱི་དཔེར་བརྗོད་རིམ་པ་བཞིན་བཤད་པར་བྱ་སྟེ།

ཚེག་བར་གསུམ་པ་ཅན།

གངས་ཅན་གྱི།།

བོད་ལྗོངས་ན།།

བརྗིད་ཆགས་ཀྱི།།

གངས་རི་མཐོ།།   ལྟ་བུ།

ཚེག་བར་བཞི་པ་ཅན།

བཅོ་ལྔའི་དུང་ཟླ།།

མཁའ་ལ་ཤར་དུས།།

དྲིན་ཅན་ཨ་མའི།།

ཞལ་རས་དྲན་བྱུང༌།།       ལྟ་བུ།།

ཚེག་བར་ལྔ་པ་ཅན།

གསུང་སྙན་གྱི་བདུད་རྩི།།

རྣ་བ་ལ་ལྷུང་དུས།།

དད་གདུང་གི་མཆི་མ།།

མིག་མཐའ་ནས་ཤོར་སོང༌།།         ལྟ་བུ།།

ཚེག་བར་དྲུག་པ་ཅན།

མཛེས་སྡུག་ལྡུམ་རའི་ནང་དུ།།

མེ་ཏོག་དཀར་སེར་དམར་ལྗང༌།།

གསེར་མང་སེམས་པ་ཤོར་ས།།

མེ་ཏོག་ཨུཏྤལ་དཀར་པོ།།ལྟ་བུ་འམ།།

ཡང་ན།                    སྙིང་སྡུག་སྙིང་ལ་ཉར་ནས།།

སྙིང་ལ་སྙིང་ནད་བཟོས་སོང༌།།

སྙིང་ལ་སྙིང་རྗེ་མེད་ན།།

སྙིང་སྡུག་སྙིང་པོ་མི་འདུག།ལྟ་བུ།

ཚེག་བར་བདུན་པ་ཅན།

འདིའི་མན་ཆད་རིགས་གསུམ་དུ་ཕྱེ་ནས་བཤད་པར་བྱ་སྟེ།

༡༽ ཚེག་བར་བདུན་པ་ཅན་གསུམ་པ་ལ་ངལ་གསོ་ཐོབ་པ།

རྒྱ་ལྕང་གི་ལོ་མའི་གསེབ་ནས།།

ལྷོ་མོན་གྱི་ཁུ་བྱུག་སྔོན་མོས།།

གསུང་སྙན་གྱི་རྒྱང་གླུ་ལེན་དུས།།

དཔྱིད་དུས་ཀྱི་དཔལ་ཡོན་རྒྱས་སོང༌།།       ལྟ་བུ།

༢༽ ཚེག་བར་བདུན་པ་ཅན་ལྔ་པ་ལ་ངལ་གསོ་ཐོབ་པ།

ལས་དབང་རླུང་འཚུབ་ཀྱི་གསེབ་ནས།།

མེས་པོའི་ཕ་ས་དང་བྲལ་སོང༌།།

རྐང་རྗེས་ཁ་བ་ལ་བཞག་ནས།།

ལྷོ་མཐའི་ཚ་བའི་ནང་སླེབས་སོང༌།།ལྟ་བུ།

༣༽ ཚེག་བར་བདུན་པ་ཅན་ཐ་མ་ལ་ངལ་གསོ་ཐོབ་པ།

ཟླ་ཞལ་ཨུཏྤལ་མིག་ཡངས་མའི།།

མཆུ་སྒྲོས་གེ་སར་འཛུམ་པ་ལས།།

གསང་ཚིག་སྙིང་གི་བདུད་རྩིའི་རྒྱུན།།

རྣ་བའི་འདོད་འཇོ་དཔྱིད་དུ་སྐྲུན།།           ལྟ་བུ།

ཚེག་བར་བརྒྱད་པ་ཅན། འདི་ལའང་རིགས་གསུམ་ཡོད་དེ།

༡༽ ཚེག་བར་བརྒྱད་པ་ཅན་ཐོག་མར་ལ་ངལ་གསོ་ཐོབ་པ།

གནམ་ཨ་སྔོན་མཐོན་པོའི་གུར་ཁང་ནས།།

ཚེས་བཅོ་ལྔའི་དུང་ཟླ་ཤར་བའི་ཚེ།།

ངས་དྲིན་ཅན་ཨ་མའི་ཞལ་རས་དེ།།

དྲན་དྲགས་ནས་མིག་ཆུ་དབང་མེད་ཤོར།།   ལྟ་བུ།

༢༽ ཚེག་བར་བརྒྱད་པ་ཅན་ངལ་གསོ་མི་ཐོབ་པ།

ལུས་འདི་རྒྱ་གར་ཡུལ་དུ་སྡོད་ཀྱང༌།།

སེམས་པ་གངས་ཅན་བོད་ལ་ཤོར་སོང༌།།

ཧི་མ་ལ་ཡའི་རི་བོ་བརྒལ་ནས།།

ང་རང་ཕ་ཡུལ་བོད་ལ་ལོག་འགྲོ།།           ལྟ་བུ།

༣༽ ཚེག་བར་བརྒྱད་པ་ཅན་གསུམ་པ་དང་བརྒྱད་པ་ལ་ངལ་གསོ་ཐོབ་པ།

མཐོ་སྒང་གི་གངས་དཀར་ལྷུན་པོ་ལས།།

དྭངས་གཙང་གི་ཆུ་བོ་ཆེན་པོ་བཞི།།

འཕགས་བོད་ཀྱི་ཞིང་ཁམས་འགྲིམས་པའི་མཐར།།

མུ་མེད་ཀྱི་རྒྱ་མཚོའི་ཀློང་དུ་ཐིམ།།  ལྟ་བུ།

ཚེག་བར་དགུ་པ་ཅན་གྱི་སྡེབ་སྦྱོར། འདི་ལའང་རིགས་གསུམ་ཡོད་པ་ལས།

༡༽ ཚེག་བར་དགུ་པ་ཅན་ཐ་མ་ལ་ངལ་གསོ་ཐོབ་པ།།

ལྷག་བསམ་ག་བུར་ཞུན་མའི་འོད་ཞགས་ཀྱིས།།

ལང་ཚོའི་འཕེལ་ཁ་དར་བའི་གཞོན་སྐྱེས་ཚོའི།།

ཤེས་རིག་ཆུ་གཏེར་འཕེལ་བའི་ཟླ་གཞོན་ཞིག༌།

ཕྱོགས་འདིར་ཤར་བས་ཡིད་དབང་མི་འཕྲོག་སུ།།     ལྟ་བུ།

༢༽ ཚེག་བར་དགུ་པ་ཅན་བདུན་པ་ལ་ངལ་གསོ་ཐོབ་པ།

ཆར་ལྡན་སྤྲིན་གྱི་ལྡིང་ཁང་གི་དབྱིངས་ནས།།

དབྱར་སྐྱེས་རྔ་ཆེན་ལྷང་ལྷང་དུ་ལྡིར་དུས།།

ཙནྡན་ལྗོན་པའི་ནགས་ཀླུང་གི་གསེབ་ནས།།

རྨ་བྱ་དགའ་བའི་ཟློས་གར་ལ་ཆས་སོང༌།།   ལྟ་བུ།

༣༽ ཚེག་བར་དགུ་པ་ཅན་ལྔ་པ་ལ་ངལ་གསོ་ཐོབ་པ།

འཛམ་གླིང་མཐོ་སྒང་གི་རལ་པའི་རྩེ་ན།།

གངས་ཅན་བོད་ལྗོངས་ཀྱི་ཞིང་ཁམས་ཆགས་ཡོད།།

ཞི་བདེ་བསྟི་གནས་ཀྱི་ཞིང་ཁམས་དེ་ན།།

ཆོལ་གསུམ་བོད་རིགས་ཀྱི་མི་དམངས་གནས་ཡོད།།ལྟ་བུ།

ཀ་རྩོམ་གྱི་དཔེ་ཁ་ཤས་ལྷན་དུ་བཀོད་པ།

ཕལ་སྐད་གསོང་པོར་བརྗོད་པའི་ཀ་རྩོམ།

མཁས་དབང་་དགེ་འདུན་ཆོས་འཕེལ།

ཀ་ལི་ཀ་ཏ་བལ་ཡུལ་པེ་ཅིང་དང་།།

ཁ་བ་ཅན་གྱི་གྲོང་ཁྱེར་ལྷ་ས་སོགས།།

ག་ས་གང་དུ་ཡོད་པའི་མི་འདི་རྣམས།།

ང་ཡིས་བལྟས་ན་རང་བཞིན་གཅིག་པར་མཐོང་།།

ཅ་ཅོ་འུར་ཟིང་ཕྱོགས་ལ་མི་དགའ་ཞིང་།།

ཆ་ལུགས་ཞི་དུལ་གནང་བ་ཁོང་ཚོ་ཡང་།།

ཇ་མར་གོས་དང་པད་ཤག་མཐོང་བའི་ཚེ།།

ཉ་པ་རྒད་པོའི་སེམས་དང་ཁྱད་མི་འདུག།

ཏ་རེན་སྐུ་དྲག་ངོ་བསྟོད་གཏམ་ལ་དགའ།།

ཐ་མལ་མི་རྣམས་གཡོ་དང་སྒྱུ་ལ་དགའ།།

ད་ལྟའི་ཕལ་ཆེར་ཐ་མག་ཆང་ལ་དགའ།།

ན་གཞོན་རྣམས་ནི་མཆོར་སྒེག་ཉམས་ལ་དགའ།།

པ་ཕ་ཨ་མའི་ཕྱོགས་ལ་ཞེན་པ་དང་།།

ཕ་རོལ་རིགས་མི་མཐུན་ལ་སྡང་བ་སོགས།།

བ་ལང་དང་ནི་རང་རེའི་མི་རྣམས་ཀྱི།།

མ་བཅོས་སེམས་ཀྱི་རྒྱུ་དག་གཅིག་པར་མཐོང་།།

ཙ་རིའི་གནས་སྐོར་བྱེད་པ་མིང་གི་དོན།།

ཚ་གྲང་དཀའ་ཐུབ་བྱེད་པ་ལྟོ་ཡི་དོན།།

ཛ་ཡའི་གསུང་རབ་ཀློག་པ་ཡོན་གྱི་དོན།།

ཝ་ལེར་བསམས་ན་ཐམས་ཅད་ནོར་གྱི་དོན།།

ཞྭ་མོ་ཆོས་གོས་བ་དན་བླ་བྲེ་དང་།།

ཟ་རྒྱུ་འཐུང་རྒྱུའི་མཆོད་པ་ཚོགས་འཁོར་སོགས།།

འ་ཅག་རྣམས་ཀྱིས་ཅི་དང་ཅི་བྱེད་པ།།

ཡ་མཚན་ལྟད་མོ་ཙམ་ལས་གཞན་མ་མཐོང་།།

ར་ཁང་ཁྱི་ཁང་ནང་དུ་སླེབས་པ་བཞིན།།

ལ་ལུང་གང་ན་བདེ་སྐྱིད་མི་འདུག་ཀྱང་།།

ཤ་ཁྲག་སྒྱུ་མའི་ལུས་འདི་མ་འཇིག་བར།།

ས་སྟེང་འདི་རུ་མི་སྡོད་ཀ་མེད་ལགས།།

ཧ་ཅང་དྲང་པོར་བཤད་པ་དེ་འདྲ་སྟེ།།

ཨ་ཙི་གཞན་ཚོ་ཚིག་པ་ཟ་ལས་ཆེ།།

ཡིད་ཆེས་མེད།

                              སྙན་ངག་པ་བེ་རི་འཇིགས་མེད་དབང་རྒྱལ།

                             ཀ་ར་བུ་རམ་མངར་ཡང་ལྟོ་མི་འགྲངས།།

                             ཁ་བཏགས་དར་གོས་འཇམ་ཡང་དྲོད་ཀྱིས་དབེན།།

                             ག་ས་ག་ནས་ལག་རྟགས་ཁུར་ན་ཡང༌།།

                             ང་རང་ཁྱོད་ལ་ཡིད་འཆེས་སྤུ་ཙམ་མེད།།

                             ཅ་ལག་ཁབ་རྩེ་ཙམ་ཞིག་ཐོབ་པའི་ཆེད།།

                             ཆ་སྤྱོད་ཙི་ཙི་འགྲོ་སྟངས་ངས་མི་ཤེས།།

                             ཇ་དང་རྩམ་པའི་མདུན་ལམ་རྫོགས་ན་ཡང༌།།

                             ཉ་མེད་དུག་གི་མཚོ་ལ་ཡིད་འཆེས་མེད།།

                             ཏ་མ་ལ་ལྟར་མི་བརྟན་རྒྱུ་འབྲས་ཚུལ།།

                             ཐ་ཤལ་སྤྲང་ཕྲུག་བདག་གིས་མི་རྟོགས་ཀྱང༌།།

                             ད་ལྟའི་ཁྱོད་སྤྱོད་དངོས་ཡོད་འདི་མཐོང་ཚེ།།

                             ན་གཞོན་བདག་ལ་ཡིད་འཆེས་སྤུ་ཙམ་མེད།།

                             པ་ཏྲའི་རིས་ལྟར་འཁྱོག་པའི་ཇུས་ངན་གྱིས།།

                             ཕ་རོལ་དགྲ་ལ་མིག་བཙུམས་ཐལ་མོ་སྦྱར།།

                             བ་ལང་ལས་ཀྱང་རྨོངས་པའི་བྱ་སྤྱོད་ཅན།

                             མ་རབས་ཁྱོད་ལ་ཡིད་འཆེས་སྤུ་ཙམ་མེད།།

         

                             ཙ་རིའི་དྲ་རྒྱ་ཕྱི་ནས་མ་གཅོད་པར།།

                             ཚ་གྲང་དཀྲུག་ཤིང་ནང་ལ་འཕེན་པའི་འཕྲུལ།།

                             ཛ་ལང་སྨྱོན་པའི་ཟློས་གར་འདི་མཐོང་ནས།།

                             ཝ་སྐྱེས་མི་གཟུགས་ཁྱོད་ལ་ཡིད་འཆེས་མེད།།

         

                             ཞ་ལྟར་འཁྱོག་པའི་སེམས་རྒྱུད་དགྲ་ལ་དཀར།།

                             ཟ་འདྲེ་བཞིན་དུ་ནང་ལ་འཇིགས་སྣང་སྐུལ།།

                             འ་འུར་དགྲ་སྡེ་ནག་པོའི་དུག་གཟན་པ།།

                             ཡ་མེད་ཁྱོད་ལ་ཡིད་འཆེས་སྤུ་ཙམ་མེད།།

                             ར་བ་གངས་རིའི་བསྐོར་བའི་མཐོ་སྒང་ཡུལ།།

                             ལ་མོའི་རྒྱབ་ཀྱི་དགྲ་ལ་མཇལ་དང་ཕུལ།།

                             ཤ་རུས་གཅིག་པའི་སྤུན་ཟླའི་བརླ་འཚོང་མཁན།།

                             ས་མཐའི་ཞབས་འདྲེན་ཁྱེད་ལ་ཡིད་འཆེས་མེད།།

                             ཧ་གཉིད་རྦད་དེ་སད་མ་ཐག་པ་ནས།།

                             ཧ་ལས་དགོས་པའི་དོན་སྐྱོན་འདི་མཐོང་བས།།

                             ཨ་ཕྲུག་ང་ཡི་དམར་ཆུང་སེམས་ངོས་ནས།།

                             ཨ་མེས་བླ་འཚོང་ཁྱོད་ལ་ཡིད་འཆེས་མེད།།

འབྲས་སྤུངས་ནས་བྲིས།

ཀ་རྩོམ་མ་ན་ལིའི་མཐོང་ཐོས།

བེ་རི་དཔལ་ལྡན་རྣམ་རྒྱལ།

ཀ་ཁ་ག་ངའི་བོད་ཀྱི་རིག་གནས་ཤིག།།
ཁ་བ་ཅན་གྱི་སློབ་མ་གཞོན་ནུ་ལ།།
ག་ལེར་བསླབས་ནས་དེ་རིང་གུང་སེང་ཉིན།།
ང་ཚོ་ཁ་ཤས་མ་ན་ལི་ལ་སླེབས།།

ཅ་ཅོ་ཧིན་དྷི་སྐད་ཡིག་རྐྱང་པ་བསྐྱོན།།
ཆ་ལུགས་ལུས་ལ་བལ་གྱི་གོས་གྱོན་ཞིང་།།
ཇ་ཆང་ཉལ་ཐལ་མང་བའི་མ་ན་ལིར།།
ཉ་རྒྱས་མཛེས་མ་འགའ་ཡང་མཐོང་རྒྱུ་འདུག།།

ཏ་ལའི་ལོ་མ་རླུང་གིས་འཁྱེར་བ་བཞིན།།
ཐ་རེ་ཐོ་རེར་གནས་པའི་བོད་མི་རྣམས།།
ད་སྐབས་དཔལ་འབྱོར་གནས་སྟངས་འདིར་བལྟས་ན།།
ན་གཞོན་ལས་མེད་ཁྱོན་ནས་མི་འདུག་སྙམ།།

པ་ལོ་དཀར་བའི་ཚོང་པ་རྒན་རྒོན་རྣམས།།
ཕ་རོལ་ཕྱི་རྒྱལ་མགོ་སེར་མཐོང་བ་ན།།
བ་སོ་ལྟ་བུའི་སོ་དཀར་ཀུན་བསྟན་ནས།།
མ་ནི་མ་ནི་ཟེར་བཞིན་བསྡད་འདུག་ལགས།།

ཙ་རི་གནས་སྐོར་བྱེད་མཁན་དད་ལྡན་དང་།།
ཚ་བའི་ཡུལ་ནས་སྤྲོ་འཁྱམ་ཕེབས་མཁན་དང་།།
ཛ་དྲག་ཆེ་མདོག་བྱེད་མཁན་ཚོང་པ་སོགས།།
ཝ་ཚོགས་ཇི་བཞིན་འདི་ན་འཛོམས་བསྡད་འདུག།།

ཞྭ་དང་ཆོས་གོས་འཚོ་བའི་རྟེན་བྱས་ཏེ།།
ཟ་བཏུང་ཙམ་གྱི་ཆེད་དུ་གྲོང་གསེབ་ན།།
འ་ཅག་བོད་ཀྱི་ཆོས་གཟུགས་ཁ་ཤས་ཀྱི།།
ཡ་མཚན་འཁྲབ་སྟོན་གནང་མཁན་འགའ་ཡང་འདུག།།

རྭ་ཅོ་ཡོད་པའི་ལྷ་དང་སྲུང་མའི་སྐུ།།
ལ་ལུང་གང་སར་མཇལ་རྒྱུ་རིག་རྒྱུ་འདུག།།
ཤ་ཡོད་མོག་མོག་བྲོ་བ་ཆེན་པོ་ཞིག།།
ས་སྟེང་འདི་ན་རག་རྒྱུ་ཁག་པོ་འདུག།།

ཧ་ཅང་གྲང་མགོ་བཙུགས་པའི་མ་ན་ལིར།།
ཧ་ལས་དགོས་པའི་གནས་ཚུལ་མང་པོ་མཐོང་།།
ཧ་ཅང་རྙོག་འཛིང་ཆེ་བའི་མི་ཚེའི་ནང་།།
ཧ་ལམ་མཐོང་བ་ཐེངས་མ་དང་པོ་ཡིན།།

ཧ་ཅང་སྤྱང་གྲུང་འཛོམས་པའི་ཕོ་སར་སྟེ།།
ཧ་ལམ་ཇ་སིན་འདྲ་བའི་སྐལ་བཟང་གིས།།
ཧ་ཅང་མྱུར་བའི་སྒེར་འཁོར་དམར་པོའི་ནང་།།
ཧ་ལམ་ས་གནས་ཀུན་ལ་འཁྲིད་གནང་སོང་།།

(རང་གིས་དཀར་པང་ཐོག་ཀ་རྩོམ་ཁ་ཤས་ཐོལ་བྱུང་དུ་འབྲི་རྒྱུ་དང། ལོ་རིམ་གཉིས་པའི་སློབ་ཕྲུག་གིས་བྲིས་པའི་ཀ་རྩོམ་ཁ་ཤས་ཀྱང་ངོ་སྤྲོད་བྱེད་རྒྱུ། སློབ་མ་རང་གི་ངོས་ནས་ཀ་རྩོམ་འདྲ་མིན་འབྲི་རྒྱུ། )