༄༅།།སློབ་དཔོན་ཨ་ནུས་མཛད་པའི་བོད་ཀྱི་སྐད་ཀྱི་གསུང་རབ་ལ་འཇུག་ཚུལ་སུམ་ཅུ་བའི་རྣམ་འགྲེལ་བཞུགས་སོ།།
ཞ་ལུ་ལོ་ཙཱ་བ་ཆོས་སྐྱོང་བཟང་པོ།༡༤༤༡-༡༥༢༧
ན་མོ་མཉྫུ་བཛྲཱ་ཡ།
མཐའ་ཡས་འགྲོ་ལ་མཐའ་ཡས་ཆོས་སྟོན་པ།།
མ་ལུས་རྒྱལ་བ་སྐྱེད་མཛད་རྒྱལ་བའི་སྲས།།
གང་དང་དབྱེར་མེད་བླ་མ་མཆོག་བཏུད་ནས།།
གངས་ཅན་སྐད་ཀྱི་བརྡ་སྤྲོད་གཙུག་ལག་གཞུང་།།
གངས་ཅན་མཁས་པ་ཐོན་མི་སམྦྷོ་ཊ།།
གངས་ཅན་དམ་ཆོས་སྒྲོན་མེ་དེས་མཛད་པའི།།
བསྟན་བཅོས་ཟུང་འདི་རབ་ཏུ་དབྱེ་བར་བགྱི།།
དེ་ལ་སྟོབས་བཅུ་མངའ་བ་ཉིད་ཀྱིས།ལྷ་མོ་དྲི་མ་མེད་པའི་འོད་ཀྱིས་ཞུས་པའི་མདོ་ལས།གདོང་དམར་ཅན་གྱི་ཡུལ་དུ་དམ་པའི་ཆོས་འབྱུང་བར་ལུང་བསྟན་པའི་ཁ་བ་ཅན་གྱི་ལྗོངས་འདིར།འཕགས་པ་འཇིག་རྟེན་དབང་ཕྱུག་གི་སྤྲུལ་པའི་སྐུ།མིའི་དབང་བོ་སྲོང་བཙན་སྒམ་པོ་དེ་ཉིད་ཀྱི་སྐུ་རིང་ལ།རྗེ་བཙུན་འཇམ་པའི་དབྱངས་ཀྱི་རྣམ་འཕྲུལ་ཐོན་མི་སམྦྷོ་ཊ་ཞེས་གྲགས་པ་དེ་ཉིད་ཀྱིས་སྔར་བོད་ན་ཡི་གེ་མེད་པ་ལ་།ལཉྪ་ནའི་ཡི་གེ་ལ་དཔེ་མཛད་ནས་བོད་ཀྱི་ཡི་གེ་དང་སྐད་ཀྱི་གསུང་རབ་ལ་འཇུག་པའི་ཚུལ་སྔོན་མེད་པ་ཕུལ་དུ་བྱུང་བ་མཛད་དོ།།འདི་ལ་བརྟེན་ནས་བྱང་ཕྱོགས་ཀྱི་ལྗོངས་བོད་དང་བོད་ཆེན་པོ།རྒྱ་ནག་དང་རྒྱ་ནག་ཆེན་པོའི་མཐར་ཐུག་པའི་རྒྱ་མཚོའི་གོས་ཅན་གྱི་གཞི་འདི་མཐའ་དག་བསྟན་པ་རིན་པོ་ཆེའི་སྒྲོན་མེས་དིང་སང་གི་བལ་དུ་སྣང་བར་མཛད་པ་ཉིད་ཀྱི་ཕྱིར་ན་མཁན་པོ་ཆེན་པོ་འདི་ཉིད་ཀྱིས་མཛད་པའི་གཞུང་བཟང་བོ་འདི་དག་ཉེ་བར་མཁོ་བ་ཙམ་དུ་མ་ཟད།བྱས་པ་ཤེས་ཤིང་དྲིན་དུ་གཟོ་བའི་སླད་དུ་འང་།མཁས་པ་རྣམས་ཀྱི་འབྲི་ཞིང་ཀློག་པ་དང་འཆད་པ་དང་ཉན་པ་དང་རབ་ཏུ་གསལ་བར་བྱེད་རིགས་པ་ཉིད་དོ།།སྔོན་མཁན་པོ་འདིས་བོད་ཀྱི་སྐད་ལ་མཁོ་བའི་བསྟན་བཅོས་བརྒྱད་མཛད་པར་གྲགས་པ་ལས།བསྟན་པ་འཕེལ་འགྲིབ་ཀྱི་དབང་གིས་དིང་སང་སུམ་ཅུ་པ་དང་རྟགས་ཀྱི་འཇུག་པ་གཉིས་ལས་མི་སྣང་ལ།ཐོན་མིས་མཛད་པར་གྲགས་པའི་མུན་པའི་སྒྲོན་མེ་ནི་ཐོན་མིས་མཛད་སྲིད་ནའང་།རྒྱ་གར་གྱི་སྐད་ཀློག་ཚུལ་ཡིན་གྱི།བོད་ཀྱི་སྐད་ལ་འཇུག་མ་ཡིན་ནོ།།
དེས་ན་ཐོག་མར་སུམ་ཅུ་པ་འཆད་པར་བྱེད་པ་ལ་གསུམ་སྟེ།བསྟན་བཅོས་ལ་འཇུག་པའི་སྒོ་བཤད་པ།འཇུག་བྱ་བསྟན་བཅོས་ཀྱི་རང་བཞིན་བཤད་པ།བསྔགས་པ་བརྗོད་དེ་མཇུག་བསྡུ་བའོ།།
སྐབས་དང་པོ།མཆོད་བརྗོད་དང་རྩོམ་པར་དམ་བཅའ་བ་བཤད་པ།
དང་པོ་(བསྟན་བཅོས་ལ་འཇུག་པའི་སྒོ་བཤད་པ་)ལ་གཉིས་ཏེ།དོན་ཆེན་བསྒྲུབ་ཕྱིར་མཆོད་བརྗོད་བཤད།རང་བཞིན་བརྗོད་དེ་དམ་བཅའ་བཤད་པའོ།།དང་པོ་(དོན་ཆེན་བསྒྲུབ་ཕྱིར་མཆོད་བརྗོད་བཤད་པ་)ནི།སྤྱིར་དཀོན་མཆོག་གསུམ་པོ་གང་ལ་རིམ་པ་བཞིན་དོན་གཉིས་མཐར་ཕྱིན་པ་དང་ལམ་དང་འགོག་བདེན་གྱིས་བསྡུས་པའི་ལུང་རྟོགས་དང་རིག་གྲོལ་གྱི་ཡོན་ཏན་མཆོག་མངའ་བའི་དཀོན་མཆོགགསུམ་པོ་དེ་རྣམས་ལ་ཕྱག་འཚལ་ལོ།།བྱེ་བྲག་ཏུ།གང་གིས་སྒྲ་དབྱངས་ཏེ་ཨཱ་ལི་སྔོན་གྱི་དུས་སུ་གསུངས་པ་ཡི།རྗེ་བཙུན་འཇམ་པའི་དབྱངས་ལ་ཕྱག་འཚལ་ལོ།།གང་གིས་མིང་གཞི་སྟེ་ཀཱ་ལི་སྔོན་དུ་གསུངས་པ་སྒྲའི་ལྷ་རྟག་ཏུ་ཞི་བ་ལ་ཕྱག་འཚལ་ལོ།།སྔོན་འཕགས་པའི་ཡུལ་དུ་སྒྲ་དང་སྙན་ངག་དང་སྡེབ་སྦྱོར་ལ་སོགས་པ་ལེགས་པར་མཛད་པའི་མཁས་པ་དཔའ་བོ་དང་ཙནྡྲ་གོ་མི་ལ་སོགས་པ་རྣམས་དང་།བདག་ཉིད་ཀྱི་བླ་མ་པཎྚྀ་ཏ་ལྷ་རིག་པའི་སེང་གེ་དང་ཡིག་མཁན་ལི་བྱིན་དག་ལ་ཡང་ཕྱག་འཚལ་ནས་ཞེས་པ་སྟེ།བརྟག་གཉིས་ལས།རྟག་ཏུ་དགེ་ལ་ཞི་བ་ཉིད།ཅེས་འབྱུང་བ་ལྟར་སངས་རྒྱས་ལ་རྟག་ཞི་བར་བཤད་དུ་ཡོད་པར་གསུངས་སོ།།འདིར་ནས་ཀྱི་སྒྲ་ནི་བྱེད་པ་པོ་གཅིག་གིས་བྱ་བ་གཉིས་བྱེད་པའི་བྱ་བ་སྔ་མའི་མཐར་སྦྱོར་བ་ཉིད་ཡིན་ཏེ།ཕྱག་འཚལ་ནས་བཤད་པར་བྱ་ཞེས་འབྲེལ་ལོ།།
གཉིས་པ་ལ་གྲུབ་མཐའ་ལ་ཞུགས་པ་ཕྱི་ནང་གཉིས་ལས།ནང་བ་སངས་རྒྱས་པའི་ཉན་ཐོས་དང་རང་རྒྱལ་དང་སངས་རྒྱས་ཀྱི་བསླབ་པ་ཀུན་གྱི་གཞི་འཛིན་པར་བྱེད་ཅིང་།ཕྱི་རོལ་པའི་ངེས་བརྗོད་དང་མཆོད་སྦྱིན་དང་སྲིད་སྲུང་དང་སྙན་ངག་སྟེ།རིག་བྱེད་བཞི་པོ་སྨྲ་བ་རྣམས་ཀྱིའང་རྒྱུ་ཡིན་ལ་འཇིག་རྟེན་ཕལ་བ་རྣམས་དང་ཐུན་མོང་བ་ཀ་བ་ལ་སོགས་པ་མིང་དང་འདུས་བྱས་མི་རྟག་ཅེས་པ་ལ་སོགས་པ་ཚིག་ཏུ་བརྗོད་པ་ཀུན་གྱི་གཞིར་གྱུར་པ་ནི་ཡི་གེའི་སྦྱོར་བ་ཡིན་པས་དགོས་པ་ཁྱད་པར་ཅན་དེ་ལྟ་བུ་དང་ལྡན་པའི་ཡི་གེའི་སྦྱོར་བ་བཤད་པར་བྱ་ཞེས་པ་སྟེ།ཚིགས་སུ་བཅད་པ་གསུམ་པོ་འདི་ནི་རྩོམ་པ་པོ་རང་ཉིད་སྐྱེས་བུ་དམ་པར་རྟོགས་པ་དང་།རྩོམ་པ་མཐར་ཕྱིན་པར་འགྱུར་བ་དང་།ཉན་པ་པོ་བསྟན་བཅོས་ལ་དགོས་སོགས་ཆོས་བཞི་མཐོང་ནས་བདེ་བླག་ཏུ་འཇུག་པར་འགྱུར་བའི་ཕྱིར་མཛད་དོ།།ཞེས་ཤེས་པར་བྱའོ།།
སྐབས་གཉིས་པ།འཇུག་བྱ་བསྟན་བཅོས་ཀྱི་རང་བཞིན་བཤད་པ།
གཉིས་འཇུག་བྱ་བསྟན་བཅོས་ཀྱི་རང་བཞིན་བཤད་པ་ལ་གཉིས་ཏེ།ཡི་གེའི་རྣམ་གཞག་རྒྱས་པར་བཤད།མིང་དང་ཚིག་གི་འཇུག་པ་བསྟན།དང་པོ་ཡི་གེའི་རྣམ་གཞག་རྒྱས་པར་བཤད་པ་ལ་གསུམ།བོད་ཡིག་སུམ་ཅུ་སོ་བཞི་བཤད།རྗེས་འཇུག་སྔོན་འཇུག་མི་འཇུག་བསྙད།དེ་ཉིད་ཤིན་ཏུ་རྒྱས་པར་བཤད་པའོ།།
ཡི་གེའི་རྣམ་གཞག་རྒྱས་པར་བཤད་པ་དང་དབྱངས་གསལ་གྱི་ཡི་གེ་སྤྱིར་བཤད་པ།
དེའི་དང་པོ་བོད་ཡིག་སུམ་ཅུ་སོ་བཞི་བཤད་པ་ལ།མདོར་བསྟན་རྒྱས་པར་བཤད་པ་གཉིས་ཀྱི།།དང་པོ་མདོར་བསྟན་ནི།རྒྱ་གར་གྱི་ཡི་གེ་ལ་ཨཱ་ལི་ཨ་ཕྲེང་སྟེ་ཨ་ཡིག་ལ་སོགས་པའི་ཕྲེང་བ་དབྱངས་དང་།ཀཱ་ལི་ཀ་ཕྲེང་སྟེ་ཀ་ཡིག་ལ་སོགས་པའི་ཕྲེང་བ་གསལ་བྱེད་ཀྱི་ཡི་གེ་གཉིས་ཡོད་པ་བཞིན་དུ་བོད་ཀྱི་ཡི་གེ་ལའང་ཨཱ་ལི་སྟེ་དབྱངས་དང་གསལ་བྱེད་གཉིས་ཡོད་པའོ།།
དེ་དག་གི་ངོ་བོ་བྱེ་བྲག་ཏུ་བཤད་པ།
གཉིས་པ་རྒྱས་པར་བཤད་པ་ནི།དབྱངས་དང་གསལ་བྱེད་ཀྱི་ངོ་བོ་དང་གྲངས་དུ་ཞེ་ན།བོད་ཀྱི་ཡི་གེཨཱ་ལི་དབྱངས་ཡིག་གསལ་བར་མཚོན་པར་བྱེད་པ་ནི་ཨི་ཡིག་དང་སོགས་ཀྱི་སྒྲས་བསྟན་པ་ཨི་ཨུ་ཨེ་ཨོ་རྣམས་ཏེ་བཞིར་ངེས་ཞེས་པའོ།།གང་ཡང་མཁས་པའི་ཁ་རྒྱན་དུ།བོད་ཀྱི་དབང་དུ་མཛད་དེ་དབྱངས་རྣམས་ནི་ལྔའོ།།གསལ་བྱེད་རྣམས་ནི་ཉི་ཤུ་རྩ་དགུའོ།།ཞེས་གསུངས་པ་ནི་གཞུང་འདི་དང་དངོས་སུ་འགལ་བ་ཁོ་ནར་ཟད་དོ།།བོད་ཀྱི་སྐད་ལ་ཀཱ་ལི་སྟེ།གསལ་བྱེད་ནི་གྲངས་སུམ་ཅུ་ཐམ་པ་ཉིད་དུ་ངེས་ཏེ།ཀ་ཁ་ག་ང་།ཅ་ཆ་ཇ་ཉ།ཏ་ཐ་ད་ན།པ་ཕ་བ་མ།ཙ་ཚ་ཛ་ཝ།ཞ་ཟ་འ་ཡ།ར་ལ་ཤ་ས།ཧ་ཨའོ།།དེ་ལ་རྒྱ་གར་གྱི་སྐད་ལ་དབྱངས་བཅུ་བཞི་དང་གསལ་བྱེད་སུམ་ཅུ་རྩ་གསུམ་དུ་ངེས་པ་ལ།འདིར་དབྱངས་ཡིག་དབྲི་བ་ཁོ་དང་ནི།གསལ་བྱེད་ལ་དབྲི་བསྣན་གཉིས་ཀ་ཡོད་དེ།དབྱངས་དང་པོ་ནི།འདིར་གསལ་བྱེད་ཐ་མར་མཛད་ལ།ཨ་ཨཱ་ཨཱི་ཨཱུ་རྀ་རཱྀ་ལྀ་ལཱྀ་ཨཻ་ཨཽ་རྣམས་བོད་ཀྱི་སྐད་ལ་རིང་ཐུང་དང་ལྕི་ཡང་གི་རྣམ་གཞག་མ་མཛད་པས་བོར་ཏེ།དབྱངས་ལྷག་མ་ཨི་ཨུ་ཨེ་ཨོ་བཞིར་ངེས་པར་མཛད་དོ།།གསལ་བྱེད་སུམ་ཅུ་རྩ་གསུམ་ལས།སྡེ་བ་བཞི་པ།གྷ་ཛྷ་ཌྷ་དྷ་བྷ་རྣམས་དང།ལོག་པ་ཊ་ཋ་ཌ་ཎ་ཥ་རྣམས་ཏེ་བཅུ་འཕྲི་བའི་ལྷག་མ་ཉི་ཤུ་རྩ་གསུམ་གྱི་སྟེང་དུ།བོད་སྐད་ལ་ཉེ་བར་མཁོ་བས།སྟོད་དུ་ཅ་ཆ་ཇ་གསུམ་དང་།སྨད་དུ་ཞ་ཟ་འ་གསུམ་སྟེ་དྲུག་དང་།དབྱངས་དང་པོ་ཨ་ཡིག་འདིར་གསལ་བྱེད་དུ་མཛད་པ་དང་བཅས་ཀ་སུམ་ཅུར་ངེས་པར་མཛད་པ་ཡིན་ནོ།།དེའང་ཅ་སོགས་དྲུག་ནི་རྒྱ་གར་ལ་མེད་ཅིང་།བོད་ལ་མཁོ་བ་དཔེར་ན།གཅིག་དང་བཅུ་དང་བཅོམ་ལྡན་སོགས་ལ།ཨེ་ཀ་ད་ཤ་བྷག་བཱན་སོགས་ཡོད་པ་དང་།ཆང་དང་ཆོབས་ཆགས་པ་སོགས་པ་ལ།མ་དྱམ྄་དང་།ཀ་ལ་དང་།རཱ་ག་སོགས་ཡོད་ཅིང་འཇིག་རྟེན།འཇུག་པ་འཇམ་པ་སོགས་ཇ་ཡིག་དགོས་པ་རྣམས་ལ།ལོ་ཀཨ་བཏཱར།མཉྫུ་སོགས་སུ་ཡོད་ལ།ཞིང་དང་ཞི་བ་ཞོ་སོགས་ལ།ཀྵཊ།ཤི་བ།ད་དྷི་སོགས་དང་།ཟས་དང་ཟག་པ་ཟད་པ་སོགས་ལ།ཀྵེ་ཏྲ།ཨཱ་ཤྲབ།ཀྵ་ཡ་སོགས་དང་།འམ་དང་འོན་ཏེ་འོ་མ་སོགས་ལ།ཝཱ་དང་ན་ནུ་དང་དུ་ཀ྄་དྷ་སོགས་ཏེ།ཅ་སོགས་དྲུག་པོས་བོད་ཀྱི་སྐད་ལ་བརྗོད་པ་ཇི་སྙེད་ཡོད་པ་དེ་དག་གི་སྐད་དོད་ལ་ཡི་གེ་དེ་དག་མི་སྲིད་ཅིང་།གཞན་དུའང་མེད་པས་བོད་སྐད་ལ་དབྱངས་བཞི་དང་གསལ་བྱེད་སུམ་ཅུར་ངེས་པ་མཛད་པའོ།།
སྔོན་མིང་རྗེས་གསུམ་གྱི་ཡི་གེ་སྤྱིར་བཤད་པ།
གཉིས་པ་རྗེས་འཇུག་སྔོན་འཇུག་མི་འཇུག་བསྙད་པ་ནི།གསལ་བྱེད་ཀྱི་ཡི་གེ་སུམ་ཅུ་པོ་དེ་ལས་ག་ལ་སོགས་པ་རྗེས་འཇུག་ཡི་གེ་ནི་བཅུ་ཡིན་ཏེ།བཅུ་པོ་དེ་རྣམས་ལས་ག་ལ་སོགས་པ་ལྔ་ནི།རྗེས་སུ་འཇུག་པར་མ་ཟད་སྔོན་དུའང་དུའང་འཇུག་གོ།དེ་དག་གི་ལྷག་མ་སྔོན་དང་རྗེས་གང་དུའང་མི་འཇུག་པ་ནི་ཉི་ཤུའོ།།
གསུམ་པ་དེ་ཉིད་ཤིན་ཏུ་རྒྱས་པར་བཤད་པ་ལ་གསུམ།སྡེ་ཚན་ཕྱེ་ནས་རྗེས་འཇུག་དབྱུང་།དེ་ཉིད་ནང་ནས་སྔོན་འཇུག་བསྟན།མི་འཇུག་ཡི་གེ་ཉི་ཤུ་བཤད་པའོ།།
རྗེས་འཇུག་གི་ཡི་གེ་རྒྱས་པར་བསྟན་པ།
དང་པོ་ཀཱ་ལི་གསལ་བྱེད་སུམ་ཅུ་པོ་ཕྱེད་དང་བརྒྱད་ཀྱི་སྡེ་ཚན་དུ་གནས་པ་ནི།བཞི་ཚན་བཞི་ཚན་དག་ཏུ་ཕྱེ་བ་ཉིད་དུ་གནས་པ་ལ།སྡེ་པ་དང་པོ།ཀ་ཁ་ག་ང་དང་།གསུམ་པ་ཏ་ཐ་ད་ན་དང་།བཞི་པ་པ་ཕ་བ་མ་སྟེ།སྡེ་པ་གསུམ་པོ་དེ་རྣམས་ལ་གནས་པའི་ཡི་གེ་མས་གཉིས་ཏེ་ཕྱི་མ་གང་ཡིན་པ་ག་ང་ད་ན་བ་མ་རྣམས་དང་།སྡེ་པ་དྲུག་པ་ཞ་ཟ་འ་ཡའི་གསུམ་པ་འ་ཡིག་དང་།སྡེ་པ་བདུན་པ་ར་ལ་ཤ་ས་རྣམས་ལ་ནི་ཤ་ཡིག་མ་གཏོགས་པ་ར་ལ་ས་གསུམ་སྟེ།ག་ང་ད་ན་བ་མ་འ་ར་ལ་ས་རྣམས་རྗེས་འཇུག་ཡི་གེ་བཅུ་རུ་བཤད།ཅེས་བྱའོ།།
སྔོན་འཇུག་གི་ཡི་གེ་སོ་སོར་ཕྱེ་སྟེ་བཤད་པ།
གཉིས་པ་དེ་ཉིད་ནང་ནས་སྔོན་འཇུག་བསྟན་པ་ནི།རྗེས་འཇུག་ཡི་གེ་བཅུ་པོ་ཉིད་ལའང་།དང་པོ་ག་དང་།གསུམ་པ་ད་དང་།ལྔ་པ་བ་དང་།དྲུག་པ་མ་དང་།བདུན་པ་འ་སྟེ།ག་ད་བ་མ་འ་ལྔ་རྣམས་ནི་རྗེས་སུ་འཇུག་པར་མ་ཟད་སྔོན་དུའང་འཇུག་ཅེས་པའོ།།
མིང་གཞི་རྐྱང་བའི་ཡི་གེ་རྒྱས་པར་བཤད་པ།
གསུམ་པ་མི་འཇུག་ཡི་གེ་ཉི་ཤུ་བཤད་པ་ནི།འཇུག་པའི་ཡི་གེ་བཅུ་པོ་དག་གི་ལྷག་མ།ཀ་ཁ་ཅ་ཆ་ཇ་ཉ་ཏ་ཐ་པ་ཕ་ཙ་ཚ་ཛ་ཝ་ཞ་ཟ་ཡ་ཤ་ཧ་ཨ་སྟེ་ཉི་ཤུ་སྔོན་རྗེས་གང་དུའང་མི་འཇུག་པས་མིང་གཞི་ཁོ་ན་སྟེ།འདི་དག་ཉིད་ལས་ཚེག་བར་གཅིག་ཏུ་གསུམ་སྦྲེལ་ཀཅཉ།ཧཕཙ།ཝཞཤ།སོགས་ལྟ་བུའམ།དེ་ལྟ་བུ་དག་ལ་དབྱངས་ཀྱི་ཡི་གེ་ཨི་ཨུ་ཨེ་ཨོ་བཞི་པོ་གང་རུང་ལྡན་པ།ཁཆིཉ།ཉཏོཏ།པཙུཝ།ཝཞེཤ་སོགས་ལྟ་བུ་ནི་འབྱུང་སྲིད་ན་ཡང་།ཐོན་མི་བདག་གིས་བརྡ་སྦྱར་བའི་བོད་སྐད་ཀྱི་གསུང་རབ་ཀྱི་ཐ་སྙད་གང་དུའང་འཇུག་པ་མིན་པས་བདག་གི་བརྡ་སྦྱར་བའང་ཡོད་པ་མིན་ཞེས་པའོ།།འདིར་མཁས་པའི་དབང་པོ་དབུས་པ་བློ་གསལ་གྱིས་བཤད་པ་ལས།ཁ་ཆུ་ཆེ།ཕུ་ཆུ་ཆེ།ཁ་ོཚྭ་ཆེ་ཞེས་སོགས་མཁན་པོ་འདིའི་གཞུང་དང་མི་མཐུན་པ་སྣང་བས་དཔྱད་པར་བྱ་ཞེས་གསུངས་ཀྱང་།འདིར་འགྲེལ་པའི་དོན་ཚེག་བར་གཅིག་པ་ལ་དགོངས་པ་དང་།མིང་གང་ཡང་རུང་བ་ལ་རྗེས་འཇུག་ཡི་གེ་བཅུ་པོ་གང་རུང་ཞུགས་པར་བཞེད་པ་འོག་ནས་འབྱུང་བ་ཉིད་ཀྱིས་བརྟག་མི་དགོས་པར་གྲུབ་པ་ཉིད་དོ།།
མིང་དང་ཚིག་གི་འཇུག་པ་དང་ཨཱ་ལི་དོན་གཙོར་བཤད་པ།
གཉིས་པ་མིང་དང་ཚིག་གི་འཇུག་པ་བཤད་པ་ལ་གཉིས།རྗེས་སུ་ཨཱ་ལི་དོན་གཙོར་བཤད།དགར་བསྣས་འབྱེད་སྡུད་བཤད་པའོ།།
དང་པོ་ལ་ལྔ།རྣམ་དབྱེ་དང་པོ་དང་འབྲེལ་བ་སླར་བསྡུ་བཤད་པ།རྣམ་དབྱེ་གཉིས་པ་སོགས་དང་འབྲེལ་བ་ལའི་སྒྲ་བཤད་པ།རྣམ་དབྱེ་དྲུག་པ་ཉིད་ཀྱི་མིང་མཐའ་མཐུན་སྦྱོར་བཤད་པ།རྣམ་དབྱེ་གསུམ་པ་དང་རྒྱན་སྡུད་སོགས་བཤད་པ།རྣམ་དབྱེ་ལྔ་པ་དང་དགར་སྡུད་སོགས་བཤད་པའོ།།
རྣམ་དབྱེ་དང་འབྲེལ་བའི་སླར་བསྡུ་བཤད་པ།
དང་པོ་རྣམ་དབྱེ་དང་པོ་དང་འབྲེལ་བ་སླར་བསྡུ་བཤད་པ་ནི།རྗེས་སུ་འཇུག་པའི་ཡི་གེ་བཅུ་པོ་ནི།མིང་གང་ཡང་རུང་བ་དག་གི་ནི་མཐར་སྦྱར་བ།དེ་ལ་ཨཱ་ལི་བཞི་པ་ཨོ་ཡིག་སྦྱར་བ་ནི།དོན་རེ་ཞིག་རྫོགས་པར་སྟོན་པ་སྟེ།དེའི་ཐ་སྙད་ནི་སླར་བསྡུ་བ་ཞེས་བྱ་བར་ནི་ཤེས་པར་བྱའོ།།དཔེར་ན་འདི་ནི་རྟག་གོ།འདི་ནི་མི་རྟག་གོ།འདི་འབྱུང་ངོ་།།འདི་ཡོད་དོ།།འདི་ཡིན་ནོ།།ཕྱག་རྒྱས་བཏབ་བོ་ཞེས་པར་ཡོད་པ་ནི།ཕོ་ཡིས་ཕོ་ཡི་མིང་མཐའ་དྲངས་པའི་ལུགས་སོ།།དེ་དང་ཚད་མཉམ་མོ།།མངོན་དགའ་འོ།།འབྱུང་བར་འགྱུར་རོ།།འོད་གསལ་ལོ།།མངོན་པར་རྫོགས་པར་སངས་རྒྱས་སོ།།ཞེས་པ་ལྟ་བུ་རྣམས་ནི་སླར་བསྡུ་རྫོགས་ཚིག་ཅན་དངོས་ཡིན་ལ།བྱའོ་སྙམ་ནས་ཡོད་དོ་ཞེས།ཞེས་སོགས་སླར་བསྡུ་མ་ཡིན་པ་ཡང་ཡོད་དེ།དེ་དག་ནི་གཙོ་བོར་རྣམ་དབྱེ་དང་པོ་དངོས་པོ་ཙམ་བརྗོད་པ་དང་འབྲེལ་བ་ཤས་ཆེའོ།།འདིར་ད་དྲག་གི་དབང་གིས་ཐོབ་པ།དེ་ཕྱིན་ཏོ།།གྱུར་ཏོ།།བཀའ་སྩལ་ཏོ།།ཞེས་པ་ལྟ་བུ་རྣམས་ཀྱང་འདས་ཚིག་ཡིན་པས་ད་དྲག་ཐོབ་ལ།ད་ཡིག་རྗེས་འཇུག་གི་ཕོ་ཡིན་པས་མིང་གཞིའི་ཏ་ཡིག་ལ་ཨོ་སྦྱར་བ་ཉིད་སླར་བསྡུ་སྟེ།ད་དྲག་དངོས་སུ་མ་སྦྱར་ནའང་།དེ་ཐོབ་པ་ཡིན་པས་ཕོ་ཡིག་སྦྱར་བ་ཉིད་དུ་བྱའོ།།
རྣམ་དབྱེ་གཉིས་པ་སོགས་དང་འབྲེལ་བ་ལའི་སྒྲ་བཤད།
གཉིས་པ་རྣམ་དབྱེ་གཉིས་པ་སོགས་དང་འབྲེལ་བ་ལའི་སྒྲ་བཤད་པ་ནི།རྗེས་འཇུག་ཡི་གེ་བཅུ་པོ་རྣམས་ལས།གང་ཡང་རུང་བའི་མིང་གི་མཐའ་ན་རྗེས་འཇུག་བཅུ་པ་ས་ཡིག་གནས་པ་དེ་ལ་ཨཱ་ལི་གཉིས་པ་ཨུ་ཡིག་སྦྱར་བས་སུ་ཞེས་འབྱུང་བ་ནི།ཤར་ཕྱོགས་སུ་འགྲོ།སངས་རྒྱས་ལ་སྐྱབས་མཆི།ཞེས་པ་ལྟ་བུའི་སུ་ཡིག་རྣམས་ནི་རྣམ་དབྱེ་གཉིས་པ་ལས་སུ་བྱ་བ་ཡིན་ཅིང་།དེ་བཞིན་དུ་གང་ཡང་རུང་བའི་མིང་གི་མཐའ་ན་རྗེས་འཇུག་བརྒྱད་པ་ར་ཡིག་གནས་པ་དེ་ལ།ཨཱ་ལི་གཉིས་པ་ཨུ་ཡང་སྦྱར་བས།རུ་ཞེས་འབྱུང་བའང་རྣམ་དབྱེ་གཉིས་པ་དང་།རྣམ་དབྱེ་བཞི་པ་དག་སྟེ།འདི་རུ་མགོན་པོ་རྟག་བཞུགས་ནས།།ཞེས་པ་གཉིས་པ་ལས་དང་།རྣམ་དབྱེ་བཞི་པ་དཔེར་ན།དེང་འདིར་བདེ་ལེགས་ཤོག་ཅེས་པ་ལྟ་བུའི་འདིར་ཅེས་པའང་འདི་རུ་ཞེས་པ་བསྡུས་པ་སྟེ།འདི་ནས་བཤད་པའི་རུ་ཡིག་ཕལ་ཆེར་དིང་སང་།འདིར་ནི་རྒྱལ་བ་དགྲ་རྒྱལ་ཞེས་པ་དང་།དེར་ནི་ཁྱེད་རྣམས་ཕྱིན་པར་འགྱུར།ཞེས་པ་ལྟ་བུར་ར་ཡིག་ཉིད་སྦྱོར་བས་རྣམ་དབྱེ་གཉིས་པ་སྟོན་པ་མང་བར་སྣང་ངོ་།།ཡང་གང་ཡང་རུང་བའི་མིང་མཐའ་ན་རྗེས་འཇུག་གསུམ་པ་ད་ཡིག་གནས་པ་དེ་ལ།ཨཱ་ལི་གཉིས་པ་ཨུ་ཡིག་སྦྱར་བས་དུ་ཞེས་པ་འབྱུང་བའང་།རྣམ་དབྱེ་གཉིས་པ་ལས་ཀྱི་དོན་ལ་དབུགས་དབྱུང་དུ་གསོལ།བཤད་དུ་གསོལ།མདུན་དུ་བཀུག་བསམ་དུ་མེད།ཅེས་པ་ལྟ་བུ་རྣམས་དང་།རྣམ་དབྱེ་བཞི་པ་ལ།དེའི་ཆེད་དུ་དང་།དེའི་ཕྱིར་དུ་ཞེས་པ་ལྟ་བུ།བདུན་པ་གནས་གཞི་ལ།སྟེང་དུ་བཞགནང་དུ་བཅུག་ལྟ་བུ་དང་།ཚེ་སྐབས་ལ།དུས་རྒྱུན་དུ་ལྟ་བུ་དང་།ད་དྲག་མཐའ་ལས་ཀྱང་།དྲག་ཏུ་བརྒྱལ།རྒྱབ་ཏུ་བསྐྱུར།།དབང་བསྐུར་ཏུ་གསོལ།བཀའ་སྩལ་ཏུ་གསོལ།ཕ་རོལ་ཏུ་ཞེས་སོགས་ལ།ཏ་ལ་ཨུ་སྦྱར་བ་ཕོའི་མིང་མཐའ་དྲངས་པ་སྟེ།འདི་ལའང་དེ་ཉིད་རང་གི་སྒྲ་མཐུན་པའི་ཞེས་པ་དང་ཅི་རིགས་པར་སྣང་ངོ་།།རྗེས་འཇུག་བཞི་པ་ན་ཡིག་དང་དགུ་པ་ལ་ཡིག་ནི་ཨཱ་ལི་སྦྱོར་བ་ལ་མི་ལྟོས་པར་ན་དང་ལ་ཡིག་རྐྱང་པ་དངོས་ཀྱང་བདུན་པ་གནས་གཞི་དང་།གཉིས་པ་ལས་དང་།བཞི་བ་དགོས་ཆེད་དང་།དེ་ཉིད་ཚེ་སྐབས་ལ་འཇུག་པ་ཡོད་དེ།དཔེར་བརྗོད།འདི་སྐད་བདག་གིས་ཐོས་པ་དུས་གཅིག་ན།ཞེས་པ་དང་།མཉན་ཡོད་ན།ཀུན་དགའ་ར་བ་ན།འདི་ཡོད་ན་འདི་འབྱུང་ཞེས་སོགས་རྣམ་དབྱེ་བདུན་པ་ཉིད་དང་།དེ་ཁོ་ན་ཉིད་ཅེས་པ་དེ་ཉིད་དང་།སྔ་དྲོའི་དུས་སུ་ན།ནམ་ལངས་པ་ན།ཉི་མ་ཤར་བ་ན་ཞེས་སོགས་ཚེ་སྐབས་ལ་འཇུག་ཅིང་།སྡོམ་དུ་ན་ཞེས་པ་ལ་སོགས་འགའ་ཞིག་རྒྱ་གར་གྱི་སྐད་དོད་མེད་པ་ལ་ལོ་ཙཱ་བས་བླ་ཐབས་སུ་བསྣན་པའང་སྣང་སྟེ།ད་མདོར་བསྡུ་ན།ཞེས་དང་།ཡིན་གྲང་ན།ལྷའང་ཕྱག་འཚལ་ན།དོན་དམ་པར་དབྱེར་མེད་ན།བྱང་ཆུབ་ཐོབ་པར་བྱ་ན།དེ་ལྟ་ན་ཞེས་སོགས་ལྟ་བུའོ།།ལ་ཡིག་རྣམ་དབྱེ་གཉིས་པ་ལ་འཇུག་པ།སངས་རྒྱས་ལ་སྐྱབས་སུ་མཆི་སོགས་དང་།ཤིང་ལ་རླུང་གིས་བསྐྱོད་པ་ཞེས་པ་ལྟ་བུ་དང་།རྣམ་དབྱེ་བཞི་པ་ཆེད་དུ་བྱ་བ་འཇུག་པ།བྲམ་ཟེ་ལ་གཟན་བྱིན།ཞིང་ལ་ཆུ་དྲོངས།བདག་ལ་ཐུགས་བརྩེ་བར་མཛོད།ཟས་ལ་སྲེད་ཅེས་པ་ལྟ་བུ་དང་།རྣམ་དབྱེ་བདུན་པ་ལ་འཇུག་པ།ཤིང་ལ་བྱ་བ་གནས།རྒྱ་མཚོ་ལ་ནོར་བུ།མཁས་པ་ལ་ཡོན་ཏན།ནམ་མཁའ་ལ་ཉི་ཟླ།ས་ལ་ལོ་ཏོགཕྱུག་པོ་ལ་ནོར་ཡོད་ཅེས་སོགས་ཤིན་ཏུ་མང་ངོ་།ཁ་ཅིག་ཏུ་ཚིག་གི་འཇོག་མཚམས་ལ་བླ་ཐབས་སུ་བྱས་པའང་མང་སྟེ།མཐོ་རིས་ཀྱི་བོད་པ་དང་ལྡན་པ་ལ་གནོད་པ་མི་མངའ་ཞིང་།ཞེས་པ་ལྟ་བུའོ།།དེ་ལྟར་སུ་དང་།རུ་དང་།དུ་དང་།ན་དང་།ལ་དང་།འདི་ནས་ཤུགས་ཀྱིས་བསྟན་པའི་ཏུ་ཡིག་རྣམས་ནི།རྣམ་དབྱེ་གཉིས་པ་ལས་སུ་བྱ་བ་དང་།བཞི་པ་ཆེད་དུ་བྱ་བ་དང་།བདུན་པ་རྟེན་གནས་དང་།དངོས་པོའི་དེ་ཁོ་ན་ཉིད་དང་།ཚེ་སྐབས་ཏེ་དུས་རྣམས་སྟོན་པ་ལ་ལའི་སྒྲ་དང་དོན་མཐུན་པ་ཡིན་ཏེ།ཤར་ཕྱོགས་སུ་འགྲོ་དང་།ཤར་ཕྱོགས་ལ་འགྲོ།དེ་རུ་འགྲོ་དང་དེ་ལ་འགྲོ།རྒྱ་གར་སྐད་དུ་དང་།རྒྱ་གར་སྐད་ལ།འདི་ན་ཡོད་དང་འདི་ལ་ཡོད་ཅེས་སོགས་ཏེ།སྨྲ་སྒོར།དུ་ལ་སོགས་པ་ལ་དང་མཐུན།།ཞེས་པ་ལྟ་བུ།ཕུང་པོ་རྣམས་ནི་དུ་ཞེས་པ་ལྟ་བུའི་དུ་ནི་ལ་དང་དོན་མཐུན་པ་མ་ཡིན་ཏེ།ག་ཏི་ཞེས་པ་བསྒྱུར་བ་གྲངས་ཅི་ཙམ་ཡོད་འདྲི་བའི་ཚིག་ཡིན་པས་སོ།།
རྣམ་དབྱེ་དྲུག་པ་ཉིད་ཀྱི་མིང་མཐའ་མཐུན་སྦྱོར་བཤད་པ།
གསུམ་པ་རྣམ་དབྱེ་དྲུག་པ་ཉིད་ཀྱི་མིང་མཐའ་མཐུན་སྦྱོར་བཤད་པ་ལ་མདོར་བསྟན།རྒྱས་བཤད།དོན་བསྡུ་གསུམ་གྱི་དང་པོ་མདོར་བསྟན་ནི།རྣམ་དབྱེ་དྲུག་པ་འབྲེལ་བའི་སྒྲ་དང་མིང་གི་སྒྲ་མཐའ་རྗེས་འཇུག་ཡི་གེ་བཅུ་བོ་ས་ོསོ་ལ།ཨི་སྦྱར་བའི་རྣམ་དབྱེ་དང་མཐུན་ལུགས་ནི།འདི་དང་འདིའོ་ཞེས་ཤེས་པར་བྱའོ།།
གཉིས་པ་རྒྱས་བཤད་ནི།དེ་དག་ཀྱང་དཔེར་ན་རྗེས་འཇུག་བཅུ་ལས་དང་པོ་ག་དང་ང་གཉིས་ཡོད་པའི་མཐའ་ཅན་ལ་ནི།རྗེས་འཇུག་གི་ཡི་གེ་དང་པོ་ག་ལ་ཨི་སྦྱར་བའི་གི་ཞེས་པ་ཉིད་མཐུན་ཏེ།བདག་གི་རྣམ་དཔྱོད་པད་ཚལ་རྒྱས་པའི་གཉེན།གང་གི་མཁྱེན་བརྩེ་ཉི་མའི་འོད་ཟེར་གྱིས།ཞེས་པ་ལྟ་བུ་དང་།རྗེས་འཇུག་གསུམ་པ་ད་དང་།ལྔ་བ་བ་དང་།བཅུ་བ་ས་རྣམས་སྦྱར་བའི་མཐའ་ལ་ནི་ཀྱ་དང་ཨི་སྦྱར་བ་ཀྱི་ཞེས་པའི་སྒྲ་མཐུན་ཏེ།ཁྱོད་ཀྱི་རྒྱབ་ཀྱི་གཡས་ཀྱི་ཆར།ཞེས་པ་ལྟ་བུ་དང་།རྗེས་འཇུག་བདུན་པ་འ་ཡིག་གི་མཐའ་ཅན་ཉིད་ལ་ནི་བདུན་པ་འ་ཡིག་ཉིད་ལ་ཨི་སྦྱར་བའི་འི་ཉིད་མཐུན་ཏེ།བྱང་ཆུབ་སེམས་དཔའི་སྦྱོར་བ་ཞེས་པ་ལྟ་བུ་འ་ཡིག་དངོས་ཀྱི་མཐའ་ཅན་དང་།དེའི་སྒྲ་འཇུག་པའི་ཚུལ་ནི།ཞེས་པའི་དེ་དང་།སྒྲ་དང་འཇུག་པ་རྣམས་ཀྱི་མཐའ་ལ་འ་ཡིག་དངོས་སུ་མེད་ཀྱང་།རྗེས་འཇུག་བཅུ་བོ་མ་ཞུགས་པའི་མིང་གི་སྦྱོར་བ་མེད་པར་གསུངས་པར་རིགས་པས་འ་མཐའ་ཅན་དུ་དོན་གྱིས་ཐོབ་པ་རྣམས་ཀྱི་མཐར་ཡང་འི་ཉིད་མཐུན་པའོ།།སྔར་བཤད་པའི་ལྷག་མ་རྣམས་ཏེ།ན་མ་ར་ལ་ཞེས་པ་རྣམས་ཀྱི་མཐའ་ཅན་ལ་ནི།གྱ་ལ་ཨི་སྦྱར་བ་གྱི་ཞེས་པ་ཉིད་མཐུན་ཏེ།དོན་གྱི་ཚུལ།གཏམ་གྱི་གཞི།ཤར་གྱི་ཕྱོགས།དཔལ་གྱི་བདག་པོ།ཞེས་པ་ལྟ་བུ་རྣམས་དང་།འདི་ནས་དངོས་སུ་མ་བསྟན་ཡང་།ཚིགས་བཅད་རྐང་བ་ཁ་སྐོང་ལ་ཡི་གེ་རྐྱང་པ་དང་མཐའ་རྟེན་དངོས་སུ་མེད་པའི་མཐར་ཡ་ལ་ཨི་སྦྱར་བ་ཉིད་སྣང་སྟེ།རྣམ་གྲོལ་འབྲས་བུ་འཚལ་བ་ཡི།།ཞེས་དང་།འདས་པའི་སངས་རྒྱས་རྣམས་དང་ཕྱོགས་བཅུ་ཡི།།ཞེས་སོགས་མང་ངོ་།།
གསུམ་པ་དོན་བསྡུ་ནི།དེ་ལྟར་ན་གི་ཀྱི་གྱི་དང་འི་དང་ཡི་ཞེས་པ་འདི་དང་རྣམ་དབྱེ་དྲུག་པ་དང་འབྲེལ་བའི་སྒྲ་གསལ་བར་བྱེད་པ་ལ།རྗེས་འཇུག་གི་ཡི་གེ་རྣམས་སོ་སོའི་མཐར་རང་རང་གི་སྒྲ་དང་མཐུན་པའི་ཡི་གེ་སོགས་རྣམས་ལ་ཨི་སྦྱར་བ་དྲུག་པ་འབྲེལ་བའི་ས་བཤད་པའོ།།
རྣམ་དབྱེ་གསུམ་པ་དང་རྒྱན་སྡུད་སོགས་བཤད་པ།
བཞི་པ་རྣམ་དབྱེ་གསུམ་པ་དང་རྒྱན་སྡུད་སོགས་བཤད་པ་ལ་རྣམ་དབྱེ་གསུམ་པ་དངོས་བཤད་པ།དེའི་ཞར་བྱུང་རྒྱན་སྡུད་བཤད་པ།ལྷག་བཅས་བཤད་པ།འབྱེད་སྡུད་བཤད་པ་དང་བཞིའི་དང་པོ་དངོས་བཤད་པ་ནི།
རྣམ་དབྱེ་གསུམ་པ་དངོས་བཤད་པ།
སྔར་བཤད་མ་ཐག་པའི་གི་ཀྱི་གྱི་འི་ཡི་ཞེས་པའི་སྒྲ་ལྔ་པོ་དེ་དག་ཉིད་ལ་ནི་རྗེས་འཇུག་བཅུ་པ་ས་ཡིག་སྦྱར་བ་ནི།རྣམ་དབྱེ་གསུམ་པ་བྱེད་པ་པོ་རུ་ཤེས་པར་བྱའོ།།དཔེར་ན།འདི་སྐད་བདག་གིས་ཐོས་པ་ཞེས་དང་།གང་གིས་མཚོན་ཏེ་མཚན་ཉིད་དུ།།ཞེས་དང་།ཁྱོད་ཀྱིས་སྲོག་ཆགས་གསད་མི་བྱ།།ཞེས་དང་།འཁོར་བ་ལ་ནི་རྒྱབ་ཀྱིས་ཕྱོགས།།ཞེས་དང་།སངས་རྒྱས་ཀྱིས་གསུངས་ཞེས་པ་ལྟ་བུ་དང་།འིའི་མཐར་ས་སྦྱར་བ་བྱང་ཆུབ་སེམས་དཔའ་འིས།དེ་འིས་འདི་འིས་ཞེས་པ་ལྟ་བུ་འདིའི་དངོས་བསྟན་ལྟར་ན་ཐོབ་པ་འདྲ་བར་སྣང་ཡང་སྐད་གསར་བཅད་ལ།བྱང་ཆུབ་སེམས་དཔས།དེས་འདིས་ཞེས་པ་འདི་དག་གིས་བྱེད་པ་པོ་སོགས་གསལ་བར་སྣང་ངོ་།ཡི་ལ་ས་སྦྱར་བ་ནི།མཛའ་བོ་གཉིས་སྐྱེས་འདི་ཡིས་ནི།།ཞེས་སོགས་ལྟ་བུ་དང་།གྱི་ལ་ས་སྦྱར་བ།ཀུན་གྱིས་གོ་བར་བྱ་ཕྱིར་བཤད།ཅེས་དང་།གཏམ་གྱིས་བསྙད་ཅེས་དང་།གསོར་གྱིས་ཕུག་ཅེས་དང་།ཟིལ་གྱིས་མནན་ཞེས་པ་ལྟ་བུ་དང་།ཡང་མདོ་ལས།མིག་གི་འདུས་ཏེ་རེག་པའི་རྐྱེན་ཀྱིས་ཚོར་བ་ཞེས་སོགས་དང་།ཟིལ་གྱིས་མནན་ཞེས་དང་།རབ་འབྱོར་ཀྱིས་གསོལ་བ་ཞེས་སོགས་ན་ར་ལའི་མཐར་ཀྱི་སྦྱར་བ་ནི་ད་དྲག་གིས་ཡིན་པའི་དབང་དུ་བྱས་པ་སྟེ།འདིའང་མང་བར་གསུང་རབ་རྣམས་ན་ཡོད་པས་ཞིབ་ཏུ་དཔྱད་པར་བྱའོ།།སྟག་སྟོན་གྱིས།ད་བ་ས་གསུམ་གྱི་མཐར་དམིགས་བསལ་ལ་གྱིས་འཐོབ་པའི་དཔེར་བརྗོད་དུ།ཁྲུས་གྱིས།བག་ཡོད་ཀྱིིས།གསོལ་གདབ་ཀྱིས།ཞེས་པ་ལྟ་བུ་བཤད་པ་ནི།རྣམ་དབྱེའི་བྱེད་པ་དང་།ཚིག་མ་ཕྱེ་བའི་གསུང་སྟེ།འདིའི་གྱིས་ཞེས་པ་ནི་ཀུ་རུ་ཞེས་པ་བསྒྱུར་བའི་ཚིག་ཡིན་གྱི།རྣམ་དབྱེ་གསུམ་པའི་ཆ་ཤས་མིན་པའི་ཕྱིར་རོ།།
རྒྱན་སྡུད་ཀྱི་སྒྲ་བཤད་པ།
གཉིས་པ་དེའི་ཞར་བྱུང་རྒྱན་སྡུད་བཤད་པ་ནི།སྔར་འབྲེལ་བའི་སར་བཤད་པའི་ཀྱི་དང་འི་དང་ཡི་རྣམས་ཀྱི་ཨཱ་ལི་སྟེ་དབྱངས་དང་ཨི་ཡིག་ཕྱིས་ནས།ཀྱ་འ་ཡ་ཞེས་པར་སོང་བ་ལ།རྗེས་འཇུག་གཉིས་པ་ང་ཡིག་སྦྱར་བས།ཀྱང་འང་ཡང་ཞེས་པ་འབྱུང་བ་ནི།སྨྲ་བ་བཅད་ཀྱང་སྲིད་པ་འཆད་ཅེས་པ་ལྟ་བུ་ཚིག་རྒྱན་གཉིས་དང་།དེ་ལས་ལྔ་ནི་སྔོན་དུའང་འཇུག།ཅེས་པ་ལྟ་བུ་སྡུད་པ་དང་།རྒྱལ་བ་དེ་དག་ལ་ནི་མཆོད་པར་བགྱི།།ཞེས་པ་ལྟ་བུ་རྣམས་སྟེ།ཡང་དང་འང་ཉིད་ཚིགས་བཅད་ཀྱི་ཡིག་གྲངས་ཚང་ན་འང་དང་།མ་ཚང་ན་ཡང་དུ་འགྱུར་ཏེ།རྒྱན་སྡུད་དང་སྡུད་པ་ཅི་རིགས་པ་སྣང་ངོ་།།
ལྷག་བཅས་བཤད་པ།
གསུམ་པ་ལྷག་བཅས་ནི།སྔར་བཤད་པའི་ལ་དང་དོན་མཐུན་པའི་སུ་ཡིག་ལ་དབྱངས་ཨུ་ཕྱིས་ནས་དེ་ལ་སྡེ་པ་གསུམ་པ་ཏ་སྡེའི་དང་པོ་ཏ་སྦྱོར་བས་སྟ་ཞེས་པར་སོང་བ་དེ་ལ་དབྱངས་ཨཱ་ལི་གསུམ་པ་ཨེ་སྦྱར་བས་སྟེ་འབྱུང་བ་དེ་ནི་བརྗོད་བྱའི་དོན་དེ་མ་རྫོགས་པར་སྟོན་པ་ལྷག་མ་དང་བཅས་པའི་སྒྲའོ།།འདིའི་དཔེར་བརྗོད་ཀྱི་བསྡུ་བའི་ཚིགས་བཅད་ནི།ག་ང་བ་མ་འ་རྣམས་དང་།།རྐྱང་པ་མཐའ་རྟེན་མེད་པ་སྟེ།།ད་མཐར་དེ་དང་ད་དྲག་དང་།།ས་ན་ར་ལའི་མཐར་ཏེའོ།།ཞེས་པ་བཟུང་ནས།ལྷག་བཅས་ཀྱི་སྒྲ་རྗེས་འཇུག་གི་དབང་གིས་ཏེ་དང་དེ་དང་སྟེ་གསུམ་དུ་ངེས་པའང་རིམ་པ་བཞིན།རྗེས་འཇུག་ག་ང་བ་མ་དང་།འ་ཡིག་དངོས་སུ་ཡོད་པ་དང་།མིང་མཐའི་ཡི་གེ་རྐྱང་པ་དང་།མཐའ་རྟེན་འ་ཡིག་དངོས་སུ་མ་བྲིས་པས་མེད་པ་ལྟར་སྣང་བ་རྣམས་ཏེ་དེ་དག་གི་མཐར་ས་སྟེ་ཐོབ་པ།དཔེར་ན།རྟག་སྟེ།འཇིགས་པ་མེད་པའི་ཕྱིར་ཞེས་པ་དང་།འཇིག་ཅིང་འབྱུང་སྟེ་བྱས་བྱས་པའི་ཕྱིར་ཞེས་པ་དང་།རྒྱས་བཏབ་སྟེ་ཞེས་དང་།འདི་ནི་མཐོང་བའི་ལམ་སྟེ་ཞེས་དང་།དེ་ནི་བྱང་ཆུབ་སེམས་དཔའ་སྟེ་ཞེས་དང་།དཔག་བསམ་ཤིང་ཅན་རྒྱས་པ་སྟེ་ཞེས་དང་།ཤར་ལ་སོགས་པ་ཕྱོགས་བཅུ་སྟེ་ཞེས་པ་ལྟ་བུ་རྣམས་དང་།ད་ཡིག་གི་མཐར་དེ་ཐོབ་པ།འདི་ལྟར་བཤད་དེ་ཞེས་དང་།འདི་ལྟ་བུ་ཞིག་ཡོད་དེ་ཞེས་དང་།ཐེ་ཚོམ་བཅད་དེ་ཞེས་སོགས་དང་།ད་དྲག་དང་ས་ན་ར་ལའི་མཐར་ཏེ་རྐྱང་ཐོབ་པ།དེར་ཕྱིན་ཏེ་ཞེས་དང་།དེ་ལྟར་གྱུར་ཏེ་ཞེས་དང་།བཀའ་བསྩལ་ཏེ་ཞེས་དང་།སངས་རྒྱས་ཏེ།ཤེས་ཏེ།ཡིན་ཏེ།འོན་ཏེ་ཞེས་དང་།འབྱུང་བར་འགྱུར་ཏེ།བདལ་ཏེ་ཞེས་སོགས་མང་ངོ་།།འདི་རྣམས་ལའང་ལྷག་བཅས་ཏེ།ཚིག་ཕྱི་མ་སྒྲུབ་བྱེད་འདྲེན་པ་ལྟ་བུ་དང་།ཚིག་གི་འཇོག་མཚམས་དང་།ཚིགས་བཅད་ཀྱི་ཁ་སྐོང་ལྟ་བུ་དག་ཀྱང་སྣང་སྟེ།དཔག་བསམ་ཤིང་ཅན་རྒྱས་པ་སྟེ།ཞེས་པ་ལྟ་བུ་རྣམས་སོ།།
འབྱེད་སྡུད་ཀྱི་སྒྲ་བཤད་པ།
བཞི་པ་འབྱེད་སྡུད་བཤད་པ་ནི།རྗེས་འཇུག་གི་ཡི་གེ་བཅུ་པོ་ལ་རྗེས་འཇུག་ཉིད་ཀྱི་ཡི་གེ་དྲུག་པ་མ་ཡིག་སྦྱར་ན།འབྱེད་དང་སྡུད་པ་ལ་སོགས་པ་ཅི་རིགས་པར་འཇུག་པ་ཡིན་ཏེ།འབྱེད་པ་ནི།དེ་ལ་འབྱུང་པོ་ནི།ཤ་ཟའམ།སྨྱོ་བྱེད་དམ།གྲིབ་གནོན་ནམ།སྲིན་པོའམ་ཞེས་པ་ལྟ་བུ་དང་།སྡུད་པ་ནི།ལྷའམ་མིའམ།ལྷ་མ་ཡིན་ནམ།དུད་འགྲོ་འམ་སེམས་ཅན་དུ་གཏོགས་པ་དེ་དག་ཐམས་ཅད་ཀྱིས་ཞེས་པ་ལྟ་བུ་དང་།ཡང་འདི་རྟག་གམ་མི་རྟག་ཅེས་པ་ལྟ་བུ།དྲི་བ་དང་།ཐེ་ཚོམ་ལའང་འཇུག་ཅིང་།རིགས་ཀྱི་བུའམ་རིགས་ཀྱི་བུ་མོ་ཞེས་པ་ལྟ་བུ་གང་ཡང་རུང་བ་བསྡུ་བ་རྣམ་པར་བརྟག་པའམ་གདམ་ང་ཅན་ལའང་འཇུག་གོ།
རྣམ་དབྱེ་ལྔ་པ་དང་དགར་སྡུད་སོགས་བཤད་པ།
ལྔ་པ་རྣམ་དབྱེ་ལྔ་པ་དང་དགར་སྡུད་སོགས་བཤད་པ་ལ།རྣམ་དབྱེ་ལྔ་པ་དངོས་དང་།ཞར་བྱུང་དགར་སྡུད་བཤད་པ།བོད་པའི་རྣམ་དབྱེ་བཤད་པ་དང་གསུམ་གྱི་དང་པོ་རྣམ་དབྱེ་ལྔ་པ་དངོས་ནི།
རྣམ་དབྱེ་ལྔ་པ་དངོས་དང་ཞར་བྱུང་དགར་སྡུད་བཤད་པ།
རྗེས་སུ་འཇུག་པའི་ཡི་གེ་བཅུ་པོ་རྣམས་ཀྱི་བཞི་པ་ན་ཡིག་དང་དགུ་པ་ལ་ཡིག་དག་ལ་བཅུ་པ་ས་ཡིག་སྦྱར་བའི་ནས་དང་ལས་ཞེས་བྱ་བ་དག་ནི་རྣམ་དབྱེ་ལྔ་པ་འབྱུང་ཁུངས་ཀྱི་ས་སྟོན་པ་ཡིན་ཏེ།ཤར་ནས་ཉི་མ་འཆར།ནང་ནས་ནོན།རྒྱུ་ལས་འབྲས་བུ་ཞེས་སོགས་མང་པོ་སྣང་ངོ་།།
གཉིས་པ་ཞར་བྱུང་དགར་སྡུད་བཤད་པ་ནི།རིགས་དང་རྫས་དང་ཡོན་ཏན་སོགས་ཀྱི་སྤྱི་ལས་ལོགས་སུ་དགར་བ།ལྷ་ཡིས་ནང་ནས་ཚངས་པ་དང་།།མི་ཡིས་ནང་ནས་བྲམ་ཟེ་ཉིད།།ཅེས་པ་ལྟ་བུ་དང་།སྐྱེ་བོ་རྣམས་ལས་རྒྱལ་རིགས་དཔའ།།བུད་མེད་རྣམས་ལས་སྔོ་བསངས་མཛེས།།ཞེས་པ་ལྟ་བུ་དང་།སྡུད་པའང་དེ་བཞིན་དུ་འཇུག་པ་ཡིན་ཏེ།གཟུགས་ནས་རྣམ་མཁྱེན་གྱི་བར།ཞེས་སོགས་ཤིན་ཏུ་མང་ཞིང་།ལྷག་བཅས་ལའང་མཐོང་སྟེ།ཕྱག་འཚལ་ནས་བཤད་པར་བྱ།ཞེས་པ་ལྟ་བུ་དང་།སྔ་ཕྱི་མཚམས་སྦྱོར་བ་ལའང་སྟེ།དེ་ནས་ཞེས་པ་རྣམས་སོ།།
བོད་པའི་རྣམ་དབྱེ་བཤད་པ།
གསུམ་པ་བོད་པའི་རྣམ་དབྱེ་བཤད་པ་ནི།གང་ཡང་རུང་བའི་མིང་བརྗོད་པའི་དང་པོ་རུ།ཀྱེ་ཞེས་བྱ་བའི་སྒྲ་སྦྱར་བ་ནི་མིང་ནས་བོད་པའི་རྣམ་དབྱེ་ཡིན་པར་ཤེས་པར་བྱ་སྟེ།ཀྱེ་རྒྱལ་བའི་སྲས་དང་།ཞེས་པ་ལྟ་བུ་སྟེ་གོ་སླའོ།།
དགར་བརྣན་འབྱེད་སྡུད་སོགས་བཤད་པ།
གཉིས་པ་དགར་བརྣན་འབྱེད་སྡུད་ལ་སོགས་བཤད་པ་ལ།ནི་སྒྲའི་དགར་བརྣན་སྒོས་སུ་བཤད།དང་སྒྲ་འབྱེད་སྡུད་སྒོས་སུ་བཤད།དེ་དང་གང་གི་འཇུག་ཚུལ་བཤད།བདག་པོའི་ས་དང་དགག་སྒྲ་བཤད།ཚིགས་བཅད་འགྲོལ་བའི་མན་ངག་བཤད།རྗེས་འཇུག་མེད་མི་རུང་དུ་བཤད་པ་དང་དྲུག་གི་དང་པོ་ནི་སྒྲའི་དགར་བརྣན་སྒོས་སུ་བཤད་པ་ནི།
ནི་སྒྲ་བཤད་པ།
གང་མིང་ཞེས་སོགས་རྩ་བ་གསུམ་པའི་ཚིགས་སུ་བཅད་པ་སྟེ།གང་ཡང་རུང་བའི་མིང་གི་མཐའ་དང་མཐུན་པ་ཡི།རྗེས་འཇུག་བཞི་པ་ན་ཡིག་ལ་ནི་དབྱངས་ཨི་སྦྱར་བ་ནི་ཞེས་པའི་སྒྲ་འདི་མང་པོའི་ནང་ནས་དམིགས་ཀྱིས་དགར་བ་དང་།དོན་དང་ཁྱད་ཆོས་བྱ་བྱེད་མང་པོ་དམིགས་ཀྱིས་ངེས་བཟུང་བྱས་ཏེ་བསྣན་ནས་བརྗོད་པའི་ཚིག་ཏུ་འགྱུར་ཏེ།དཔེར་ན།ལྷའི་ཚོགས་འདི་དག་ལས་གདོང་བཞི་པ་འདི་བ་ནི་ཚངས་པའོ།།ལག་པ་བཞི་པ་འདི་ནི་ཁྱབ་འཇུག་གོ།མིག་སྟོང་ཡོད་པ་འདི་ནི་བརྒྱ་བྱིན་ནོ།།མགྲིན་པ་སྔོན་པོ་འདི་ནི་དབང་ཕྱུག་གོ།ཞེས་པ་ལྟ་བུའི་སྒྲ་ནི་དགར་བའི་ཚིག་ཡིན་ཏེ།སཾསྐྲིཏ་ལ་ཧི་དང་ཧུ་ཞེས་པ་ཡོད་བསྒྱུར་བའོ།།
བརྣན་པ་ནི།བཅོམ་ལྡན་འདས་ཆོས་ཐམས་ཅད་ནི་ཐུགས་སུ་ཆུད།།ཆོས་ཀྱི་འཁོར་ལོ་ནི་རབ་ཏུ་བསྐོར།སློབ་མའི་ཚོགས་ཤིན་ཏུ་དུལ་བ་མཐའ་ཡས་པ་ནི་མངའ།ཞེས་སོགས་ལྟ་བུའོ།།
དང་སྒྲ་བཤད་པ།
གཉིས་པ་དང་སྒྲ་འབྱེད་སྡུད་སྒོས་སུ་བཤད་པ་ནི།མིང་གང་ཡང་རུང་བའི་བར་མཚམས་རྣམས་སུ་རྗེས་འཇུག་གསུམ་པ་ད་ཡིག་ལ་ནི།རྗེས་འཇུག་གཉིས་པ་ང་ཡིག་སྦྱར་བས་དང་ཞེས་པའི་སྒྲར་གྱུར་པ་དེ་ནི་ཚིག་སང་ཕྱིའི་ནུས་པས་སྡུད་པ་ལའང་འཇུག་སྟེ།གང་དང་གང་ཡིན་པ་དེ་དང་དེ་ཐམས་ཅད་ཅེས་པ་ལྟ་བུ་དང་།ལྷ་དང་མི་དང་ལྷ་མ་ཡིན་རྣམས་ཀྱི་མཐོ་རིས་སོ།།ཞེས་པ་ལྟ་བུ།འབྱེད་པ་ལ་འཇུག་པའང་།ཕུང་པོ་ལ་ལྔ་སྟེ།གཟུགས་དང་ཚོར་བ་དང་།ཞེས་སོགས་ཀྱི་དང་སྒྲའོ།།
རྒྱུ་མཚན་ལ་འཇུག་པ་དཔེར་ན།ལེགས་པར་སློབས་དང་མཁས་པར་འགྱུར།ཞེས་པ་སྟེ།བསླབས་པས་ཞེས་པའི་དོན་ཅན་ནོ།།
ཚེ་སྐབས་ལ་འཇུག་པ།དུས་དང་བྱ་བ་མཉམ་དུ་བརྗོད་པ།ཉི་མ་ཤར་བ་དང་འགྲོ།ཞེས་པ་ལྟ་བུ།
གདམས་ངག་འདོམས་པའི་ཚིག་ལའང་།ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང་།ཉོན་དང་།གྱིས་དང་།ཞེས་སོགས་ལྟ་བུ་རྣམས་ཏེ།དེ་ལྟར་དང་སྒྲའི་འཇུག་པ་ནི་རྣམ་པ་ལྔའོ།།
དེ་སྒྲ་བཤད་པ།
གསུམ་པ་དེ་དང་གང་གི་འཇུག་ཚུལ་བཤད་པ་ནི།གང་ཡང་རུང་བའི་མིང་གི་ཡ་མཐའ་ཐོག་མ་རུ་རྗེས་འཇུག་གསུམ་པ་ད་ཡིག་ལ་དབྱངས་ཨེ་སྦྱར་བ་དེ་ཞེས་པའི་སྒྲ་འདི་ནི་འཇུག་ཚུལ་མང་སྟེ།ཐ་སྙད་ཀྱི་དབང་དུ་བྱས་ན་འདས་པ་དང་།རྣམ་གྲངས་གཞན་བརྗོད་པ་དང་།ལྷག་བཅས་དང་གསུམ་ལ་འཇུག་པ་ཡིན་ཏེ།ང་དེའི་ཚེ་དེའི་དུས་ན་ཞེས་པ་ལྟ་བུ་འདས་པ་དང་།མིག་ཀྱང་དེ་ཡིན་རིག་པའང་དེ་སྟེ།དེ་ནི་བློོ་དང་དེ་ཤེས་རབ་ཅེས་པ་ལྟ་བུ་རྣམ་གྲངས་གཞན་བརྗོད་པ་དང་།ཞབས་ལ་བཏུད་དེ་སྤྱི་བོས་བླང་ཞེས་པ་ལྟ་བུ་ལྷག་བཅས་རྣམས་ལ་འཇུག་པས་སོ།།
དངོས་པོའི་དབང་དུ་བྱས་ནས།བདག་གི་དངོས་པོ་དང་།གཞན་གྱི་དངོས་པོ་དང་།གསང་བའི་དངོས་པོ་དང་།དེ་ཁོ་ན་ཉིད་ཀྱི་དངོས་པོ་ཞེས་བྱ་བ་དང་བཞི་རུ་འཇུག་པར་བྱས་ཏེ།དཔེར་ན།བདག་གི་དེ།ཁྱོད་ཀྱི་དེ།དེ་སྦ་བར་བྱ།དེ་ཁོ་ན་ཉིད་ཅེས་པ་དང་།འདིའང་བརྡ་སྔོན་དུ་སོང་བ་ལ་བརྗོད་པ་ཉུང་བས་ཆོག་པ་དང་།གཞན་གྱི་གསལ་བར་ཤེས་ཀྱིས་དྭོགས་པའི་བརྗོད་པ་ལ་མཁོ་ཉིད་དོ།།
དུས་ཀྱི་དབང་དུ་བྱས་ནས་སྔར་བཤད་པ་དཔེར་བརྗོད་པ་ལྟར་འདས་པ་དང་།དེར་མ་ཟད་དེའི་དུས་ན་འཁོར་ལོས་བསྒྱུར་བའི་རྒྱལ་པོ་དུང་ཞེས་བྱ་བ་འབྱུང་བར་འགྱུར་ཞེས་པའི་དེ་ཡིག་ལྟ་བུ་མ་འོངས་པ་ལའང་འཇུག་པས་འཇུག་པ་རྣམ་པ་གཉིས་ཡིན་ནོ།།དེ་ལྟར་ན་དེ་ཞེས་བྱ་བའི་འཇུག་པའི་ནི།འདིར་གསུམ་དང་བཞི་དང་གཉིས་ཀྱི་དབྱེ་བས་རྣམ་པ་དགུ་སྟེ།འོན་ཀྱང་ཐ་སྙད་ཀྱི་སྐབས་སུའང་འདས་པ་འབྱུང་་བ་མི་ཟློས་པའི་རྒྱུ་མཚན་ནམ།ཡང་ན་ཐ་སྙད་ཀྱི་དབང་དུ་བྱས་པའི་གསུམ་གྱི་ཡ་གྱལ་གཞན་ཞིག་ཡིན་པབརྟག་པར་བྱའོ།།
གང་སྒྲ་བཤད་པ།
གང་ཡང་རུང་བའི་མིང་བརྗོད་པའི་དང་པོ་རུ།རྗེས་འཇུག་དང་པོ་ག་ཡིག་ལ་ནི་རྗེས་འཇུག་གཉིས་པ་ང་ཡིག་སྦྱར་བ་གང་ཞེས་པ་ནི་སྤྱི་ལ་ཁྱབ་པའི་སྒྲ་ཉིད་དུ་འགྱུར་ཏེ།གང་གི་དང་པོར་བྱང་ཆུབ་ཐུགས་བསྐྱེད་ནས།ཞེས་དང་།གང་དང་ཡང་དག་ལྡན་བྱས་ཞེས་དང་།གང་གི་བློ་གྲོས་སོགས་དང་།གང་བྱས་ན་མི་རྟག་སོགས་སྤྱི་ཁྱབ་ཀྱི་སྒྲ་ཡིན་པས་བྱེ་བྲག་ལའང་འཇུག་པ་ཉིད་དོ།།འདིར་སངས་རྒྱས་པ་རྣམས་ཀྱི་སྒྲ་འཇུག་པ་ལ་བརྡ་དང་བརྗོད་འདོད་ཀྱི་དབང་ཁོ་ན་ཡིན་གྱི་དོན་གྱི་སྒོ་ནས་ཤེས་པ་ཅི་ཡང་མེད་དེ་བརྗོད་འདོད་ངེས་པའི་རྒྱུ་ཡིན་ཕྱིར་ཞེས་དང་།བརྗོད་པར་འདོད་པའི་གཞན་དབང་ཕྱིར།།སྒྲ་རྣམས་གང་ལའང་མེད་པ་མིན།།ཞེས་རྟོག་གེའི་ཚུལ་ལས་འབྱུང་བས་སོ།།
བདག་སྒྲ་བཤད་པ།
བཞི་པ་བདག་པོའི་ས་དང་དགག་སྒྲ་བཤད་པ་ནི།གང་ཡང་རུང་བའི་མིང་གི་མ་མཐའ་ན།པུརུཥ་ནི་སྐྱེས་བུ་སྟེ།དེའི་རུ་དང་ཥ་ཕྱིས་པའི་པུ་ཡིག་ཀྱང་སྐྱེས་པའི་ཕོ་མཚོན་པའི་སྒྲ་ཡིན་ལ།ལིངྒ་ཞེས་རྟགས་སམ་མཚན་མ་སྟེ།པུ་ལིངྒ་ཡི་སྒྲ་པ་ཡིག་ལྟ་བུ་མེད་པ་དེ་ལ་པུ་ལིངྒའི་སྒྲ་སྦྱར་ན་དེ་བདག་པོའི་སར་ནི་ཤེས་པར་བྱ་ཞེས་པ་སྟེ།དཔེར་ན།རྟ་པ།གསེར་པ།སངས་རྒྱས་པ།མུ་སྟེགས་པ།ཚོང་པ་ཞེས་པ་སོགས་ལྟ་བུ་དང་།འདི་ལ་ཁ་ཅིག་ཏུ་བ་ཕྱེད་ཀྱང་སྣང་སྟེ།ཁ་ལོ་བ།ཕོ་ཉ་བ་སོགས་དང་།ཁ་ཅིག་ཏུ་པོ་ཡིག་སྟེ།བྱེད་པ་པོ།ཚོར་བ་པོ་སོགས་དང་།ཁ་ཅིག་ཏུ་ཅན་ཡིག་སྟེ།རལ་གྲི་ཅན།འཁོར་ལོ་ཅན་སོགས་དང་།འདིས་མཚོན་ནས།བློ་ལྡན་ཤེས་ལྡན་སོགས་ཀྱང་བདག་པོའི་སར་ཤེས་པེ་བྱའོ།།
དགག་སྒྲ་བཤད་པ།
གང་ཡང་རུང་བའི་མིང་གི་ཡ་མཐའ་སྟེ།ཐོག་མ་ན་སྟྲཱི་བུད་མེད་དམ་མོ།ལིངྒ་རྟགས་ཏེ།སྟྲཱི་ལིངྒ་ཡི་སྒྲ་མོ་རྟགས་མེད་པ་དེ་ལ་སྟྲཱི་ལིངྒ་སྦྱར་ན་སྒྲ་དེ་དག་པའི་གནས་སུ་ཤེས་པར་བྱའོ།།ཞེས་པ་སྟེ།འདིར་མོ་རྟགས་ནི་དགག་སྒྲ་སྟེ།བོད་སྐད་ལ་མ་མི་མེད་མིན་ཞེས་སོགས་ལྟ་བུ་སྟེ།དགག་སྒྲ་ཐོག་མ་ན་ཡོད་པ།མ་རིག་པ།མི་ཤེས་པ།མ་སྐྱེས་པ།མི་འགགས་སོགས་ལྟ་བུ་དང་།མ་མཐའ་ན་ཡོད་པ།གཟུགས་མེད།སྒྲ་མེད་སོགས་ལྟ་བུ་དང་།ཡོད་མིན་མེད་མིན་ཞེས་སོགས་ལྟ་བུ་དང་།འདི་དགག་པའི་གནས་སུ་ཤེས་པར་བྱའོ།།
ཚིགས་བཅད་འགྲོལ་བའི་མན་ངག་བཤད་པ།
ལྔ་པ་ཚིགས་བཅད་འགྲོལ་བའི་མན་ངག་བཤད་པ་ནི།གསུང་རབ་རྣམས་སུ་ཚིགས་སུ་བཅད་པ་བསྡེབས་པའི་དོན།རྣམ་དབྱེ་དང་ཚིག་ཕྲད་སོགས་མཚམས་སྦྱོར་རྣམས་ཀྱི་སྒྲ་ཅུང་ཟད་བསྡུས་པ་ཡོད་པ་དེ་ཡང་མཚམས་སྦྱོར་བསྡུས་པ་དེ་བཞིན་དུ་སྦྱར་ནས་བཤད་པར་བྱའོ།ཞེས་པ་ལྟ་བུ་སྟེ།འདིར་མཚམས་སྦྱོར་དང་རྣམ་དབྱེ་དང་ཚིག་སྔ་ཕྱིའི་ནུས་པ་སྟེ།དེ་རྣམས་ལ་བརྟགས་ནས་ཚིགས་བཅད་རྣམས་ལྷུག་པར་ཕྲལ་ཏེ་བཤད་ཅེས་པའ་ིདོན།
རྗེས་འཇུག་མེད་མི་རུང་བ་བཤད་པ།
དྲུག་པ་རྗེས་འཇུག་མེད་མི་རུང་དུ་བཤད་པ་ནི།མིང་དང་ཚིག་གི་དོན་གསལ་བར་བྱེད་པ་ལ་རྗེས་འཇུག་གི་ཡི་གེ་བཅུ་པོ་མེད་དུ་མི་རུང་བ་ཡིན་ཏེ།སྔོན་འཇུག་ལྔ་པོ་གང་རུང་ཡོད་དམ་མེད་ཀྱང་རུང་ལ།མིང་གཞིའི་ཡི་གེ་གང་ཡིན་ཞིག་ལ་གཉིས་སྦྲེལ་ཡོད་དམ་གསུམ་སྦྲེལ་ཡོད་ཀྱང་རུང་།ཨཱ་ལི་བཞི་ལས་གང་ཡང་རུང་བ་དང་འབྲལ་ཡང་རུང་།རྗེས་འཇུག་ཡི་གེ་བཅུ་པོ་གང་རུང་ཞིག་མ་ཞུགས་ན།མིང་གཞན་སྦྱོར་བ་སྟེ།རྗེས་འཇུག་བཅུ་པོ་གང་རུང་ཞུགས་པ་ལས་གཞན་པའི་མིང་གི་སྦྱོར་བ་ཐོན་མི་བདག་གིས་བརྡ་སྦྱར་བའི་གསུང་རབ་ལ་ཡོད་མི་སྲིད་པའི་ཕྱིར།།
སྐབས་གསུམ་པ།བསྔགས་པ་བརྗོད་དེ་མཇུག་བསྡུ་བ།
གསུམ་པ་བསྔགས་པ་བརྗོད་དེ་མཇུག་བསྡུ་བ་ལ།རྗེས་འཇུག་ཤེས་པས་མཁས་པར་གྱུར།མཁས་པས་ཉམས་སུ་བླང་ཚུལ་བཤད།དེའི་ཐོག་མའི་བསླབ་རིམ་བསྟན།བསླབ་པར་བྱ་བའི་དུས་ཀྱི་བྱ་བ་བསྟན་པ་དང་བཞིའི་དང་པོ་རྗེས་འཇུག་ཤེས་པས་མཁས་པར་གྱུར་པ་ནི།
རྗེས་འཇུག་ཤེས་པས་མཁས་པར་འགྱུར་བ་བཤད་པ།
རྗེས་འཇུག་བཅུ་ཡི་དོན་གྱི་འཇུག་ཚུལ་མཁས་པར་ཤེས་ན།གསུང་རབ་ཡི་གེར་འབྲི་པ་དང་།གླེགས་བམ་དུ་བྱས་པ་ཀློག་པ་དང་སློབ་པ་ལ་བཤད་པ་བྱེད་པ་རྣམས་ཀྱི་དུས་སུ་རྗེས་འཇུག་དང་འབྲེལ་བའི་མཚམས་སྦྱོར་གྱི་སྒྲ་ལ་རྨོངས་པའི་ཐོགས་པ་མེད་ཅིང་ཚིག་དོན་འབྲེལ་བ་སྨྲ་བ་འབེལ་བའི་གཏམ་ལ་མཁས་པའི་མཆོག་ཏུ་འགྱུར་ཞིང་གཞན་ཡང་རྗེས་འཇུག་ཤེས་པ་ཡི་ཕན་ཡོན་གྱི་གསུང་རབ་དེའི་དོན་གྱི་རྣམ་པར་འབྱེད་པའི་སྦྱོར་བ་སྟེ།འགྲེལ་བ་སོགས་མ་མཐོང་བཞིན་དུའང་དོན་རྣམ་པར་འབྱེད་པའི་འགྲེལ་པ་དང་མཐུན་པའི་ངག་ཚིག་སྦྱོར་བ་ཤེས་པར་འགྱུར་བའོ།།
མཁས་པས་ཉམས་སུ་བླང་ཚུལ་བཤད་པ།
གཉིས་པ་མཁས་པས་ཉམས་སུ་བླང་ཚུལ་བཤད་པ་ནི།དེ་ལྟ་བུའི་མཁས་པ་དེས་རྗེས་འཇུག་གི་སྦྱོར་བ་ལ་མཁས་པར་འགྱུར་པའི་ཚེ་ན།རྗེས་འཇུག་གི་སྦྱོར་བ་མཁས་པ་དེས་ལུང་གི་དོན་དང་ཕྱིན་ཅི་བ་ལོག་པར་སྦྱོར་བ་སྟེ།གསུང་རབ་ཀྱི་དོན་མ་ནོར་བར་ཤེས་པ་དང་།དེས་བླ་མའི་མན་ངག་ཕྱིན་ཅི་མ་ལོག་པར་གོ་བར་འགྱུར་བས་རྗེས་འཇུག་ལ་མཁས་པ།ལུང་སྟོན་ལ་མཁས་པ།བླ་མའི་མན་ངག་ལ་མཁས་པ་སྟེ་དེ་གསུམ་སྦྱར་ནས་སྙིང་པོའི་དོན་ཉམས་ལེན་གྱི་ཐོག་ཏུ་དབབ་པར་བྱ་ཞེས་པའོ།།
ཐོག་མའི་བསླབ་རིམ་བསྟན་པ།
གསུམ་པ་དེའི་ཐོག་མའི་བསླབ་རིམ་བསྟན་པ་ནི།སྔར་སྨོས་པའི་རིམ་པ་དེ་དག་ནི་ལས་དང་པོ་པ་བསླབ་པ་ལ་བརྩོན་པའི་གང་ཟག་གིས།དང་པོ་ང་རོ་དྲག་པོ་ཀ་ལ་སོགས་པ་རྣམས་ལ་རང་རང་གི་འབྱུང་གནས་ལས་ལེགས་པར་ཐོན་པའི་སྐད་ཀྱིས་སྦྱང་བར་བྱ་ཞིང་།དེ་ལས་སྔོན་འཇུག་དང་མིང་གཞི་དང་རྗེས་གསུམ་སྦྱར་ནས་ཀློག་པ་དང་།དེ་ནས་ཚིག་བར་གཅིག་གི་བར་གྱི་ཡི་གེ་བསྡུས་ནས་ཀློག་པ་སོགས་བྱ་སྟེ།ཀློག་ཚུལ་རྒྱས་པར་རྗེ་བཙུན་བསོད་ནམས་རྩེ་མོས་མཛད་པའི་བྱིས་པ་བདེ་བླག་ནས་འབྱུང་བ་བཞིན་དུ་སྟེ།རྒྱས་པར་དེ་ཉིད་དུ་བལྟའོ།།རིམ་པ་དེ་དག་ནི་ཀློག་དག་པའི་ཆེད་དུ་ངེས་པར་བསླབ་དགོས་པ་ཡིན།རྟགས་འཇུག་ནས་འབྱུང་བ་ལྟར།རྗེས་འཇུག་བཞི་ཡིས་སྦྱོར་བ་སྟེ།གང་ལ་འཇུགགང་གིས་འཇུགཇི་ལྟར་འཇུགཅིའི་ཕྱིར་འཇུག་པ་རྣམས་ནི་ཤིན་ཏུ་གཅེས་པས་བླ་མ་ལས་ཆོས་མཉན་པ་དང་།རང་ཉིད་ཀྱི་བསམས་པ་དང་གཞན་ལ་བསྟན་པའི་ཆེད་དུ་ངེས་པར་སྦྱོར་བའོ།།མཉན་པ་སོགས་ཀྱི་ཡན་ལག་དེ་དག་གི་མཐུ་ཡིས་ནི་འཐོབ་བྱ་འབྲས་བུའི་ཆེད་དུ་གསུང་རབ་ཀྱི་དོན་རྣམ་པར་ངེས་པར་གཏན་ལ་དབབ་པར་བྱའོ།།དེ་ལྟ་བུའི་བསླབ་པའི་རིམ་པ་འདི་ཡིས་ནི།སྐྱེས་བུ་གང་ཞིག་འབད་པ་ཆུང་དུས་ཀྱང་།ཤེས་རབ་མྱུར་དུ་གྲོལ་བར་འགྱུར་ན་ཆེན་པོས་ལྟ་ཅི་སྨོས།རྒྱུ་མཚན་དེའི་ཕྱིར་ན་མཁས་པར་འདོད་པས་དུས་དང་པོར་སྔར་སྨོས་པའི་བསླབ་པའི་རིམ་པ་འདི་ཉིད་ལ་བསླབ་པར་བྱ་ཞིང་།དེ་ཤེས་ནས་བརྡ་སྤྲོད་པའི་གཞུང་།རྒྱས་པའང་མཉན་པར་བྱས་ནས་བསླབ་པ་གསུམ་གང་ལ་དད་པ་ཡི།གཞུང་ཉིད་བླ་མ་རྣམས་ལས་མཉན་པར་བྱ།།ཞེས་པའོ།།
བསླབ་པར་བྱ་བའི་དུས་ཀྱི་བྱ་བ་བསྟན་པ།
བཞི་པ་བསླབ་པར་བྱ་བའི་དུས་ཀྱི་བྱ་བ་བསྟན་པ་ནི།ལས་དང་པོ་པས་དེ་ལྟར་སློབ་པའི་ཚེ་ཁེངས་པ་མེད་པས་སློབ་དཔོན་ཉིད་དུ་འཛིན་ཅིང་།ལེ་ལོ་གཡེང་བ་རྣམ་པར་སྤང་བར་བྱ་སྟེ།རྟག་སྦྱོར་གྱི་བརྩོན་འགྲུས་དང་།ཟོ་བཟང་དད་པ་སྟེ་གུས་སྦྱོར་གྱི་བརྩོན་འགྲུས་གཉིས་ལ་བསྟེན་པའི་སྐྱེས་བུ་དེས་ནི་སློབ་པ་མྱུར་དུ་རྟོགས་པར་འགྱུར་ཏེ།ཡོན་ཏན་མ་ལུས་བརྩོན་འགྲུས་རྗེས་འགྲོ་ཞིང་།།ཞེས་འབྱུང་བ་ལྟར་རོ།།དེ་ལྟ་བུའི་གང་ཟག་དོན་དུ་འགྱུར་བ་ཉིད་ཀྱི་ཕྱིར་དུས་སུ་འདོམས་པར་བྱ་ཞིང་།དེ་ལས་ཅིག་ཤོས་ནི་སྔར་བཤད་པའི་ཁྱད་པར་དེ་ལས་ལྡོག་པ་ཉིད་ཀྱི་ཕྱིར་རེ་ཞིག་བཏང་སྙོམས་སུ་བྱ་ལ།དེ་ལའང་དོན་དུ་གཉེར་ཅིང་འདུན་པར་འགྱུར་པ་ན་ཕྱིས་ལེགས་པར་འདོམས་པར་བྱའོ།།བྱཱ་ཀ་ར་ཎའི་རྩ་བ་ཤོ་ལོ་ཀ་སུམ་ཅུ་པ་ཞེས་བྱ་བའི་རྣམ་པར་འགྲེལ་པ་ཞ་ལུ་ལོ་ཙཱ་བ་དགེ་སློང་དྷརྨ་པཱ་ལ་བྷ་དྲས་སྦྱར་བ་རྫོགས་སོ།།།།
༄༅།།བྱཱ་ཀ་ར་ཎའི་རྟགས་ཀྱི་འཇུག་པ་རྣམ་པར་གསལ་བའི་ལེགས་བཤད་བཞུགས་སོ།།
ཞ་ལུ་ལོ་ཙཱ་བ་ཆོས་སྐྱོང་བཟང་པོས་བརྩམས།
སྔོན་འགྲོ།
༄༅།།ན་མོ་ཤྲཱི་གུ་ར་ཝ།
མཐའ་ཡས་ཤེས་བྱའི་ཆོས་ཀུན་ཀུན་ཏུ་གཟིགས་པའི་གཟིགས་པ་སྒྲིབ་མེད་མངའ།།བགྲང་ཡས་མ་ལུས་ལུས་ཅན་ཀུན་ལ་བརྩེ་བའི་བརྩེ་བས་རྟག་ཏུ་བརླན།།
དཔག་ཡས་ལྷགས་པའི་བདུད་དཔུང་དཔུང་འཇོམས་མཛད་པའི་མཛད་པ་རྨད་བྱུང་བ།།
བསམ་ཡས་འཇམ་དབྱངས་དབྱངས་ཅན་ལ་སོགས་ལྷ་ཡི་ལྷ་གྱུར་རྣམས་ལ་འདུད།།
གང་གི་མཁྱེན་དང་བརྩེ་བའི་ཚ་ཟེར་གྱིས།།
གངས་ཅན་སྐྱེ་བོའི་རྣམ་དཔྱོད་འདི་སྐྱེས་ལ།།
སྟོབས་བཅུའི་དགོངས་དོན་སྦྲང་རྩི་རྒྱས་མཛད་པ།
སྤྲུལ་པའི་ལོ་ཆེན་སམྦྷོ་ཊ་ལ་འདུད།།
གཉིས་པ་རྟགས་ཀྱི་འཇུག་པ་བཤད་པ་ལ་གསུམ།ཡི་གེ་སོ་སོའི་རྟགས་ཀྱི་དབྱེ་བ་བཀོད་པ།སྔོན་འཇུག་གི་རྟགས་ཀྱི་འཇུག་པ་བཤད་པ།རྗེས་འཇུག་གི་རྟགས་ཀྱི་འཇུག་པ་བཤད་པའོ།།
སྐབས་དང་པོ།མིང་གཞིའི་ཡི་གེ་སོ་སོའི་དབྱེ་ཞིབ་ཏུ་བཀོད་པ།
དང་པོ་ཡི་གེ་སོ་སོའི་རྟགས་ཀྱི་དབྱེ་བ་བཀོད་པ་ནི།སྤྱིར་ཡི་གེ་ལ་ཕོ་དང་མོ་གཉིས་ཏེ།དབྱངས་ཡིག་བཞི་ནི་མོ་ཡིག་ཡིན་པར་འདིས་ཤུགས་ལ་བསྟན་ནས་པ་དེའི་ཕྱིར་གསལ་བྱེད་ཀྱི་ཡི་གེ་རྣམས་ནི།ཕོ་ཡི་ཡི་གེ་འབའ་ཞིག་ཡིན་པ་དེ་ལ་བཞི་ཚན་གྱི་སྡེ་པ་ཕྱེད་དང་བརྒྱད་དུ་གནས་པ་དེའང་།སྡེ་ཚན་ལྔ་རུ་དྲིལ་བར་བྱས་ནས་བཤད་པར་བྱ་བ་ལ་སྡེ་ལྔ་ནི།ཕོ་དང་།མ་ནིང་དང་།མོ་དང་།ཤིན་ཏུ་མོ་དང་།མོ་གཤམ་མམ་མ་ནིང་མཚན་མེད་ཅེས་བྱ་བ་རྣམས་ཡིན་པས་ཡི་གེ་སུམ་ཅུ་པོ་སྡེ་ཚན་ལྔ་རུ་བསྡུ་ཚུལ་ནི།ཕོ་དང་མ་ནིང་མོ་དང་ནི།།ཤིན་ཏུ་མོ་དང་བཞི་བཞི་རུ།།རིམ་པས་ཕྱེ་སྟེ་སྡེ་པ་བཞི་པ་པ་སྡེ་ཡན་ཆད་དབྱེ་བས།ཀ་ཅ་ཏ་པ་རྣམས་ཕོ།ཁ་ཆ་ཐ་ཕ་རྣམས་མ་ནིང་།ག་ཇ་ད་བ་རྣམས་མོ།ང་ཉ་ན་མ་རྣམས་ཤིན་ཏུ་མོའོ།དེའི་རྗེས་སུ་མ་ཕྱེ་བའི་ལྷག་མ་བཅུ་བཞི་གནས་པ་དེ་ལ།སྡེ་པ་ལྔ་པའི་ཙ་སོགས་གསུམ་ནི་སྟེ།ཅ་སོགས་དང་འདྲ་བར་ཕོ་དང་མ་ནིང་མོ་ཡིན་པར་སྦྱར་བར་བྱ་ཞིང་།ཝ་ནི་སྔར་བ་མོ་རུ་བཤད་པ་དང་སྦྱར་བར་བྱ་སྟེ་མོ་ཡིག་གོ།དེ་ནས་ལྷག་མ་ཞ་ཟ་འ་ཡ་ཤ་ས་སྟེ་དྲུག་ནི་མོ་རུ་སྦྱར་ཏེ་མོ་ཡིག་གོ།དེ་ནས་ར་ལ་ཧ་གསུམ་ནི་མོ་གཤམ་སྟེ་མིང་གཞན་མ་ནིང་མཚན་མེད་ངེས་ཀྱང་བྱ་སྟེ།དེ་ལྟར་ན།ཕོ་ཡིག་ནི།ཀ་ཅ་ཏ་པ་ཙ་སྟེ་ལྔ་དང་།མ་ནིང་ཁ་ཆ་ཐ་ཕ་ཚ་སྟེ་ལྔ་དང་།མོ་ཡིག་ག་ཇ་ད་བ་ཛ་ཝ་ཞ་ཟ་འ་ཡ་ཤ་ས་སྟེ་བཅུ་གཉིས་དང་།ཤིན་ཏུ་མོ་ང་ཉ་ན་མ་བཞི་དང་།མ་ནིང་མཚན་མེད་ར་ལ་ཧ་གསུམ་སྟེ།ཡི་གེ་ཉི་ཤུ་རྩ་དགུ་ནི་སྡེ་ཚན་ལྔར་གནས་ལ།འདིར་ཨ་ཡིག་མ་བསྡུས་པ་ལ་ལོ་ཙཱ་བ་ནམ་མཁའ་བཟང་པོས་ཨ་ཡིག་རྟགས་མེད་པའོ་ཞེས་གསུངས་སོ།།ལྔ་པོ་དེ་ཡང་བསྡུ་ན་གསུམ་དུ་འགྱུར་ཏེ།ཤིན་ཏུ་མོ་དང་མ་ནིང་མཚན་མེད་ཀྱང་མོ་ཉིད་ཡིན་པར།མོ་ཡི་ཡི་གེ་ནང་ནས་ནི།།འཇུག་པའི་ཡི་གེ་བཅུ་དབྱུང་བྱ།།ཞེས་པས་བསྟན་པའི་ཕྱིར་རོ།།དེ་ལ་ཕོ་མོ་མ་ནིང་ལ་སོགས་པའི་དབྱེ་བའི་ཁྱད་པར་ཡི་གེ་སོ་སོ་ལ་དབྱེ་བ་ནི་བརྗོད་པའི་ཚེ་སྐད་ཀྱི་ང་རོ་དྲག་ཞན་ལས་ཡིན་ཏེ།འོག་ནས།ཕོ་ནི་དྲག་པའི་ཚུལ་གྱིས་ཏེ།།ཞེས་སོགས་འབྱུང་བ་ལྟར་ཡིན་ལ།མིང་ལ་སྦྱར་ན་ཕོ་མོ་ལ་སོགས་པར་བཤད་པ་ལ་ནི་བརྗོད་པའི་སྒྲ་དྲག་ཞན་དང་བརྗོད་བྱའི་དངོས་པོ་དེ་ཕོ་མོ་གཉིས་མིན་དུ་གནས་པ་ཅི་རིགས་པར་ཡོད་དེ།དང་པོ་ནི།ཆུའི་མིང་ལ་ཨཔྲ་ཞེས་ཡོད་པ་ཕོ་རྟགས་ཅན་དང་།ཛ་ལམ྄།ཆུ།ཞེས་པ་མ་ནིང་དང་།ན་དཱི།ཆུ་ཀླུང།ཞེས་པ་མོ་རྟགས་དང་།ཆུང་མའི་སྐད་དོད་ལ་ཡང་།དཱརཿཆུང་མ་ཞེས་པ་ཕོ་རྟགས་དང་།སྟྲི་ཆུང་མ་ཞེས་པ་མ་ནིང་དང་།བྷཱར྄་ཡཱ་ཆུང་མ་ཞེས་མོ་རྟགས་ཅན་ཡིན་པ་ལྟ་བུ་སྟེ།བོད་སྐད་ལ་བུད་མེད་ལ་ཕོ་ཡི་མིང་སྦྱར་བ་དང་།དཔོན་མོ་ཆེ་དང་ཆེན་མོ་བ་སོགས་ཕོ་ལ་མོའི་སྒྲ་སྦྱར་བ་ན་ར་དང་ན་དཱི།སྐྱེས་པ་དང་བུ་མེད།དེ་བ་དང་དེ་བཱི།ལྷ་དང་ལྷ་མོ་ཞེས་པ་ལྟ་བུ་སྟེ།རྒྱ་ཆེར་བརྟགས་ནས་དཔེར་བརྗོད་རྟོགས་པར་བྱའོ།།
སྐབས་གཉིས་པ།སྔོན་འཇུག་གི་རྟགས་ཀྱི་འཇུག་བཤད་པ།
གཉིས་པ་སྔོན་འཇུག་གི་རྟགས་ཀྱི་འཇུག་པ་བཤད་པ་ལ།ཐུན་མོང་སྔོན་རྗེས་བསྡུ་བའི་ཚུལ།སྔོན་འཇུག་རྟགས་ཀྱི་དབྱེ་བ་བཤད།དེའི་འཇུག་ཚུལ་རྒྱས་པར་བཤད་པ་དང་གསུམ་གྱི་དང་པོ་ཐུན་མོང་སྔོན་རྗེས་བསྡུ་བའི་ཚུལ་ནི།
ཐུན་མོང་སྔོན་རྗེས་བསྡུ་བའི་ཚུལ་བཤད་པ།
མོའི་ཡི་གེ་ལ་མོ་ཙམ་དང་ཤིན་ཏུ་མོ་དང་མོ་གཤམ་དང་གསུམ་དུ་གནས་པའི་ནང་ནས་ནི་རྗེས་སུ་འཇུག་པའི་ཡི་གེ་བཅུ་དབྱུང་བར་བྱ་སྟེ།ག་ད་བ་འ་ས་ལྔ་པོ་མོ་ཙམ་གྱི་ནང་ནས་དང་།ང་ན་མ་གསུམ་ཤིན་ཏུ་མོའི་ནང་ནས་དང་།ར་ལ་གཉིས་མ་ནིང་མཚན་མེད་ཀྱི་ནང་ནས་དབྱུང་བའི་ཕྱིར་རོ།།ཆོས་རྗེ་ས་སྐྱ་པཎྜི་ཏས།ད་ས་དག་ནི་ཡང་འཇུག་པ་དག་གོ།།ཞེས་ད་དང་ས་གཉིས་རྗེས་འཇུག་གང་རུང་ཞུགས་པའི་རྗེས་སུ་སླར་ཡང་འཇུག་པས་ཡང་འཇུག་ཅེས་པའི་ཐ་སྙད་དང་།ད་ནི་ན་ར་ལ་རྣམས་ཀྱིའོ།ས་ནི་ག་ང་བ་མ་རྣམས་ཀྱིའོ་ཞེས་སོ་སོའི་ངེས་འབྱེད་མཛད་པ་ནི།འདིར་ཕོ་ཡིས་ཕོ་ཡི་མིང་མཐའ་དྲངས།།ཞེས་སོགས་ཀྱི་དགོངས་པའི་ཟེའུ་འབྲུ་གསལ་བར་བྱེད་པའི་ལེགས་བཤད་ཀྱི་སྣང་བ་ཆེན་པོ་ཉིད་དོ།།རྗེས་སུ་འཇུག་པ་བཅུའི་ནང་ནས་ནི།སྔོན་འཇུག་ཡི་གེ་ལྔ་དབྱུང་བར་བྱ་སྟེ།ག་ད་བ་འ་མ་རྣམས་རྗེས་འཇུག་ཁོ་ནར་མ་ཟད་སྔོན་འཇུག་ཀྱང་ཡིན་པས་སོ།།
སྔོན་འཇུག་གི་རྟགས་ཀྱི་དབྱེ་བ་བཤད་པ།
གཉིས་པ་སྔོན་འཇུག་རྟགས་ཀྱི་དབྱེ་བ་བཤད་པ་ནི།སྔོན་འཇུག་གི་ཡི་གེ་ལྔ་པོ་ལ་ཕོ་དང་མ་ནིང་དང་མོ་དང་ཤིན་ཏུ་མོ་དང་བཞི་རུ་དབྱེ་བར་བྱ་སྟེ།བ་ནི་སྔོན་འཇུག་གི་ཕོ་དང་།ག་ད་གཉིས་མ་ནིང་།འ་མོ་དང་།མ་ཤིན་ཏུ་མོ་ཡིན་པར།འོག་ནས།ཕོ་ནི་ཕོ་དང་མོ་ལ་འཇུག།ཅེས་སོགས་ཀྱི་རིགས་པས་གཞན་དུ་མི་འཁྲུལ་བར་ངེས་པའི་ཕྱིར་རོ།།
དེ་དག་གི་འཇུག་ཚུལ་སྤྱིར་བཤད་པ།
གསུམ་པ་དེའི་འཇུག་ཆུལ་རྒྱས་པར་བཤད་པ་ལ་དྲི་བས་མཚམས་སྦྱར་བ་དང་།ལན་གྱིས་རྒྱས་པར་བཤད་པ་གཉིས་ལས།དང་པོ་དྲི་བས་མཚམས་སྦྱར་བ་ནི།སྔོན་འཇུག་ལྔ་པོ་དེ་དག་རེ་རེའང་དྲི་བ་བཞིའི་སྒོ་ནས་མཚམས་སྦྱར་ནས་འཆད་པར་བྱ།ལྔ་པོ་དེ་དག་མིང་གཞི་གང་དང་གང་ལ་སྔོན་དུ་འཇུག་པར་བྱེད།ཡི་གེ་རང་གི་ངོ་བོ་གང་གིས་བྱེད།ཚུལ་ཇི་ལྟར་འཇུག་པར་བྱེད།དགོས་པ་ཅིའི་ཕྱིར་འཇུག་པར་བྱེད་ཅེས་པ་བཞིའོ།།
གཉིས་པ་ལན་གྱིས་རྒྱས་པར་བཤད་པ་ལ།གང་ལ་འཇུག་པ།གང་གིས་འཇུག་པ།ཇི་ལྟར་འཇུག་པ།ཅིའི་ཕྱིར་འཇུག་པ་བཤད་པ་དང་བཞིའི་དང་པོ་གང་ལ་འཇུག་པ་ལ།
གང་ལ་འཇུག་པ་བཤད་པ།
གང་ལ་འཇུག་པ་དངོས་བཤད་པ།དེ་མི་འཇུག་པ་བཤད་པ་གཉིས་ཀྱི་དང་པོ་གང་ལ་འཇུག་པ་དངོས་བཤད་པ་ནི།སླར་ཡང་དྲི་བ་རྗེས་སུ་བརྗོད་དེ།སྔོན་འཇུག་དེ་དག་ཡི་གེ་གང་ལ་སྔོན་དུ་འཇུག་པར་བྱེད་ཅེ་ན།སྔོན་འཇུག་གི་ཕོ་བ་ཡིག་ནི་མིང་གཞིའི་ཕོ་ཀ་ཅ་ཏ་ཙ་བཞི་དང་།མོ་ག་ང་ཞ་ཟ་ཤ་ས་དྲུག་ལ་སྟེ་བཅུའི་སྔོན་དུ་འཇུག་པའི་བས་འཕུལ་ནི་བཅུར་ངེས་པ་ཉིད་དེ།དཔེར་ན།བཀས་བཅད་ཕྱག་རྒྱས་བཏབ་པ་བཙལ།།གོ་བགོས་མདུན་དུ་བདར་ཏེ་བཞེངས།།བཟང་པོའི་བཤོས་གཙང་བསངས་ཤིང་སྦྱངས།།ཞེས་པ་ལྟ་བུས་མཚོན་ནོ།།སྔོན་གྱི་དག་ཡིག་འགའ་ཞིག་ན།ན་བཟའ་བནབས་པ་བས་འཕུལ་ལྡན་ཞེས་པ་དང་།གླེགས་བམ་འགའ་ནའང་སྣང་བ་གྲགས་ཆུང་ཞིང་དགོས་པ་ཆུང་བས་མཁས་པ་ཕྱི་མ་དག་མི་བཞེད་པ་ལེགས་ཤིང་།གྱོན་པ་མན་པས་པ་མས་འཕུལ་ཉིད་དོ།།ཡང་སུམ་པ་ལོ་ཙཱ་བས།བས་ཇ་འཕུལ་བ་དང་།ཀླུ་མེས་དབང་ཕྱུག་གྲགས་ཀྱིས།བས་ཉ་འཕུལ་བར་བཞེད་པ་ནི་སྔོན་གྱི་མཁན་པོ་རྣམས་ཀྱི་ལུགས་ལས་གཞན་ཡིན་ནོ་ཞེས་པ་དབུས་པ་བློ་གསལ་གྱིས་སུམ་ཅུ་པའི་འགྲེལ་པར་བཀག་པ་ལྟར་རོ།།སྔོན་འཇུག་གི་མོ་འ་ཡིག་ནི་མིང་གཞིའི་མོ་ག་ཇ་ད་བ་ཛ་ལྔ་དང་།མ་ནིང་ཁ་ཆ་ཐ་ཚ་རྣམས་ཏེ།འས་འཕུལ་ཡང་བཅུར་ངེས་ཏེ།འགའ་ཞིག་འཇིག་རྟེན་འདི་འབའ་ཞིག།འཛིན་ཅིང་འཁོད་དེ་གནས་འཆའ་བ།།མི་འཐད་འཕོ་ཚེ་བདེ་བ་འཚལ།།ཞེས་པ་ལྟ་བུ་འོ།།སྔོན་འཇུག་གི་མ་ནིང་ལ།ག་དང་ད་གཉིས་ཡོད་པ་ཡང་ནི་མིང་གཞིའི་ཕོ་དང་མོ་ལ་སྔོན་དུ་འཇུག་པའོ།།དེ་ལ་ག་ནི་ཕོ་ཅ་ཏ་ཙ་གསུམ་དང་།མོ་ཉ་ད་ན་ཞ་ཟ་ཡ་ཤ་ས་བརྒྱད་དེ་བཅུ་གཅིག་གི་སྔོན་དུ་འཇུག་པའི་གས་འཕུལ་བཅུ་གཅིག་ཏུ་ངེས་ཏེ།དཔེར་ན།གཅིག་པུ་གཏམ་གཙང་གཉིས་མེད་གསུང་།།གདེངས་ཅན་གནས་སུ་འཚོ་ཞིང་གཞེས།།གཡེལ་མེད་གཟིགས་པའི་བདེ་གཤེགས་རྒྱལ།།ཞེས་པ་ལྟ་བུའོ།སྔོན་འཇུག་གི་མ་ནིང་གཉིས་པ་ད་ཡིག་ནི་ཕོ་ཀ་དང་པ།མོ་ག་ང་བ་མ་སྟེ་དྲུག་ལ་འཇུག་པས་དས་འཕུལ་དྲུག་ཏུ་ངེས་ཏེ།དཀར་པོ་དགེ་བའི་དངོས་གྲུབ་ཏུ།དཔལ་འབྱོར་དབང་ཕྱུག་མིར་ཕན་ཐོགས།ཅེས་པ་ལྟ་བུའོ།སྔོན་འཇུག་གི་ཤིན་ཏུ་མོ་མ་ཡིགམིང་གཞིའི་མ་ནིང་ཁ་ཆ་ཐ་ཚ་དང་།མོ་ག་ད་ཇ་ཛ་དང་།ཤིན་ཏུ་མོ་ཉིད་ཀྱི་ནང་ནས་ང་ཉ་ན་གསུམ་ལ་འཇུག་མས་འཕུལ་བཅུ་གཅིག་ཏུ་ངེས་པ་ཉིད་དེ།མཁས་པ་མཆེད་ཀྱི་མཐོང་བའི་མཚོར་།།མགོན་པོ་མཇལ་ཏེ་མདོང་གསོལ་མཛད།།མངའ་བདག་མཉེས་ནས་མནར་མེད་བསྒྲལ།།ཞེས་པ་ལྟ་བུའོ།།
ཞར་བྱུང་མི་འཇུག་པ་བཤད་པ།
གཉིས་པ་དེ་མི་འཇུག་པ་བཤད་པ་ནི།དེ་ལྟར་འཇུག་པ་བཤད་ནས་དེའི་མཐའ་གཅོད་པའི་ཕྱིར།མི་འཇུག་པ་བཤད་པ་ནི་འདི་དག་སྟེ།སྔོན་འཇུག་གི་ཕོ་བ་ཡིག་ནི་མིང་གཞིའི་མ་ནིང་ཁ་ཆ་ཐ་ཚ་རྣམས་ལ་མི་འཇུག་པར་ངེས་ཤིང་།སྔོན་འཇུག་གི་མོ་འ་ཡིག་ནི་མིང་གཞིའི་ཕོ་ཀ་ཅ་ཏ་པ་ཙ་རྣམས་ལ་འཇུག་པ་མིན།མིང་གཞིའི་མ་ནིང་རང་སྡེ་ཁ་ཆ་ཐ་ཚ་རྣམས་ལ་སྔོན་འཇུག་གི་མ་ནིང་རང་སྡེ་ག་ད་གཉིས་མི་འཇུགབཞི་ཚན་དུ་གནས་པའི་རང་གི་སྡེ་དང་ཕྲད་པ་ན།སྔོན་འཇུག་གི་ཕོ་བ་ཡིག་ལྟ་བུ་ཡང་མོ་མ་ཡིག་ལ་འཇུག་པར་མི་འགྱུར་རོ།།སྔོན་འཇུག་གི་མ་ནིང་ག་དང་ད་གཉིས་ཀྱི་ག་ཡིག་ཀྱང་རང་གི་སྡེ་པའི་ཕོ་ཀ་དང་མོ་ང་ཡིག་ལ་མི་འཇུག་ཅིང་།ད་ཡིག་ཀྱང་རང་སྡེའི་ཕོ་ཏ་དང་མོ་ནའི་སྔོན་དུ་མི་འཇུག་གོ།སྔོན་འཇུག་གི་མོ་འ་ཡིག་ཀྱང་རང་སྡེའི་མོ་ཞ་ཟ་ཡ་གསུམ་གྱི་སྔོན་དུ་མི་འཇུག་པ་དང་།སྔོན་འཇུག་གི་ཤིན་ཏུ་མོ་མ་ཡིག་ཀྱང་རང་སྡེའི་ཕོ་པ་དང་མ་ནིང་ཕ་དང་མོ་བ་དང་ཤིན་ཏུ་མོ་མ་རྣམས་ཀྱི་སྔོན་དུ་འཇུག་མི་སྲིད་པས།མ་ནིང་མོ་ཡང་དེ་བཞིན་ནོ།།ཞེས་གསུངས་སོ།།
གང་གིས་འཇུག་པ་བཤད་པ།
གཉིས་པ་གང་གིས་འཇུག་པ་བཤད་པ་ནི།འོག་ཏུ་རྗེས་འཇུག་གི་སྐབས་སུ།གང་གི་བཅུ་པོ་དེ་དག་གིས།ཞེས་འབྱུང་བ་དང་།གོང་གི་དྲི་བ་གཉིས་ཀའི་ཤུགས་བསྟན་གྱིས།གང་གི་ལྔ་པོ་དེ་དག་གིས་ཞེས་སྦྱར་ཏེ་བཤད་དོ།།
ཇི་ལྟར་འཇུག་པ་བཤད་པ།
གསུམ་པ་ཇི་ལྟར་འཇུག་པ་བཤད་པ་ནི།ཇི་ལྟར་འཇུག་པར་བྱེད་ཅེ་ན།།ཞེས་མཚམས་སྦྱར་ནས།སྔོན་འཇུག་གི་ཕོ་བ་ཡིག་ནི་སྐད་གདངས་དྲག་པའི་ཚུལ་གྱིས་འཇུག་པ་ཡིན་ཏེ།འཇིག་རྟེན་ན་སྐྱེད་པ་སྐད་ཀྱི་རང་བཞིན་མཐོ་བ་བཞིན་ནོ།།དེ་བཞིན་དུ་མ་ནིང་ག་དང་ད་གཉིས་ནི་སྐད་གདངས་མཐོ་དམན་རན་པར་འཇུག་པ་ཡིན་ལ།མོ་འ་ཡིག་སྐད་གདངས་ཞན་པའི་ཚུལ་གྱིས་འཇུག་ཅིང་ཤིན་ཏུ་མོ་མ་ཡིག་ནི་སྐད་གདངས་དྲག་ཞན་མཉམ་པས་འཇུག་པརབྱེད་པས་སོ།།
ཅིའི་ཕྱིར་འཇུག་པ་བཤད་པ།
བཞི་པ་དགོས་པ་ཅིའི་ཕྱིར་འཇུག་པ་བཤད་པ་ནི།ཅིའི་ཕྱིར་འཇུག་པ་བྱེད་ཅེ་ན།ཞེས་མཚམས་སྦྱར་ཏེ།སྔོན་འཇུག་གི་ཕོ་བ་ཡིག་ནི།དུས་འདས་པ་དང་དངོས་པོ་གཞན་བྱ་བ་བསྒྲུབ་པའི་ཕྱིར་འཇུག་པ་གཙོ་ཆེ་བ་ཉིད་དོ།།
དེ་ཡང་འདས་པ་ལ་འཇུག་པ་ནི།ཆུ་བཀགགོས་བཀབ།སྣོད་ཆུས་བཀང་།ལོགས་སུ་བཀར།བལ་བཀལ།དུམ་བུར་བཀས་སོགས་དང་།རྐང་པ་བཅགལུས་ལ་བཅངས།ཤིང་བཅད།སྲོག་བཅད།ཉེས་པ་བཅབས།བདུད་བཅོམ།མིག་བཅར།ཁྲལ་བཅལ་སོགས་དང་།མིང་བཏགས།སྦྱིན་པ་བཏང་།ས་བོན་བཏབ་སོགས་དང་།ཆུ་བཙགས།ནོར་བཙོངས།སྟོང་པ་བཙལ།བུ་བཙས་སོགས་དང་།གོས་བགོས།རྙེད་པ་མཉམ་པོར་བགོས་སོགས་དང་།མདུན་དུ་བདར།སྤོས་ཀྱིས་བདུགས།གཞུ་བདུངས་སོགས་དང་།ལག་ཏུ་བཞགདགྱེས་ནས་དྲག་ཏུ་བཞད།སྐྲ་བཞར།གདན་ལ་བཞུགས།ནང་དུ་བཞུད།སྟན་ལས་བཞེངས།བསོད་སྙོམས་བཞེས།ལག་ཏུ་བཟུང་།དྲི་མ་བསངས་སོགས་ཤིན་ཏུ་མང་སྟེ་གླེགས་བམ་བཀླགས་པ་ལས་རྒྱ་ཆེར་རྟོགས་པར་བྱའོ།།
གཞན་ལ་འཇུག་པ་ནི།དཔེར་ན།བདག་ཉིད་མྱ་ངན་ལས་འདས་ནས་སེམས་ཅན་མྱ་ངན་ལས་བཟླ་བར་བྱའོ།།ཞེས་པའི་བས་འཕུལ་འདི་ལྟ་བུ་གཞན་མྱ་ངན་ལས་བཟླར་གཞུག་པའི་དོན་ཅན་ཏེ་སེམས་ཅན་མྱ་ངན་བཟླས་ལ་དགོད་ཅེས་སོགས་དང་།གཞན་གྱིས་གོ་བར་བྱེད་དུ་འཇུག་པ་ལ་དེའི་ཚུལ་བཟླུགས་པར་བྱ་ཞེས་པ་ཡང་སྟེ་གཞན་ལ་བསྙད་པར་བྱ་ཞེས་པའི་དོན་ཅན་ནོ།།
བས་འཕུལ་བྱ་བའི་ཡུལ་ལ་འཇུག་པ་ནི།བསྒྲུབ་པར་བྱ་བ་དང་།བསྡུ་བ་དང་།བསྐྱེད་པ་དང་།བསྐྲུན་པ་དང་།བཙལ་བ་དང་།བརྗོད་པ་སོགས་བས་འཕུལ་ཡིན་ནོ།།འདིར་འདས་དང་བསྒྲུབ་ཕྱིར་ཞེས་པ་གཉིས་གསུངས་པས།བས་འཕུལ་འདས་པ་ལ་འཇུག་པ་སྔར་བཤད་པ་རྣམས་དང་།གཞན་ཡང་དུས་གསུམ་ག་ལ་སྦྱར་ནས་དཔེར་བརྗོད་པས་ཀྱང་ངེས་པར་བྱ་སྟེ།བསྒྲུབས་ཟིན་པ་དང་བསྒྲུབ་པར་བྱ།།བྱུག་པ་བསྐུས་པ་བསྐུ་བར་བྱ།།དྲིན་གྱིས་བསྐྱངས་པ་བསྐྱང་བར་བྱ།།དཔོན་དུ་བསྐོས་དང་བསྐོ་བར་བྱ།ནོར་བརྐུས་པ་དང་བརྐུ་བར་བྱ།།བསྒྲལ་ནས་གཞན་དག་བསྒྲལ་བར་བྱ།།ལེགས་པར་བསྒོམས་ཟིན་བསྒོམ་བྱ།།བསྒྱེལ་ཟིན་པ་དང་བསྒྱེལ་རྒྱུ་དང་།།བསྒྱུར་ཟིན་པ་དང་བསྒྱུར་རྒྱུ་དང་།།ཕྲེང་བ་བརྒྱུས་དང་བརྒྱུ་བར་བྱ།།རྩྭ་སོགས་བརྔས་དང་བརྔ་བ་དང་།།དགེ་རྩ་བསྔོས་ཟིན་བསྔོ་བར་བྱ།།དེ་སྐད་བརྗོད་ཟིན་བརྗོད་པར་བྱ།།མིག་གིས་བལྟས་དང་བལྟ་བར་བྱ།།ཞགས་པས་བསྡམས་དང་བསྡམ་པར་བྱ།།ནང་དུ་བསྡུས་དང་པར་བྱ།།བྱ་བ་བརྩམས་པ་བརྩས་པར་བྱ།།གྲངས་ཀྱི་བརྩིས་དང་བརྩི་པ་དང་།།མཁར་བརྩིགས་པ་དང་བརྩིག་པར་བྱ།།བྱིན་གྱིས་བརླབས་དང་བརླབ་པར་བྱ།།གཞན་དག་མྱ་ངན་བཟླས་ལ་བཀོད།།མྱ་ངན་བཟླ་ཕྱིར་འབད་པར་བྱ།།ལེགས་པར་བསླབས་དང་བསླབ་པར་བྱ།མཆོད་པ་བཤམས་དང་བཤམ་པར་བྱ།།རིང་དུ་བསྲིངས་དང་བསྲིང་བར་བྱ།།ཉི་མས་བསྲོས་དང་བསྲོ་བ་དང་།།དྲང་པོར་བསྲངས་དང་བསྲང་བ་དང་།།ཚུལ་ཁྲིམས་བསྲུངས་དང་བསྲུང་བ་དང་།།ཕྱོགས་གཅིག་བསྲེས་དང་བསྲེ་བ་དང་།།མེ་ཡིས་བསྲེགས་དང་བསྲེག་པར་བྱ།།ལེགས་པར་བསམས་དང་བསམ་པར་བྱ།།ཞེས་སོགས་དེ་ལྟར་བཤད་པ་རྣམས་ཀྱི་སྔ་མ་སྔ་མ་རྣམས་འདས་པའི་ཚིག་དང་ཕྱི་མ་ཕྱི་མ་རྣམས་བྱ་བ་ལ་འཇུག་པ་སྟེ།བྱ་བའི་སྒྲ་མ་སྦྱར་ཡང་དོན་གྱིས་རྟོགས་པར་བྱའོ།།
དེ་རྣམས་ཀྱི་ཟླས་དྲངས་པའི་ད་ལྟ་བའི་སྒྲ་རྣམས་ལ་ནི་བས་འཕུལ་མེད་དེ།སྒྲུབ་པར་བྱེད།སྣུམ་སྐུ་བར་བྱེད།དྲིན་གྱིས་སྐྱོང་བ།སྡེ་དཔོན་སྐོ་བར་བྱེད།ནོར་རྐུ་བར་བྱེད།སེམས་ཅན་སྒྲོལ་བར་བྱེད།ཏིང་ངེ་འཛིན་སྒོམ་པར་བྱེད།རྩིག་པ་སྒྱེལ་བར་བྱེད།ཆོས་སྒྱུར་བར་བྱེད།ཕྲེང་བ་རྒྱུད་པར་བྱེད།རྩ་སོགས་རྔ་བར་བྱེད།དགེ་བ་སྔོ་བར་བྱེད།དེ་སྐད་རྗོད་པར་བྱེད།མིག་གིས་ལྟ་བར་བྱེད།ལྕགས་སྒྲོག་གིས་སྡོམ་པར་བྱེད།ནང་དུ་སྡུད་པར་བྱེད།བརྩོན་འགྲུས་རྩོམ་པར་བྱེད།རྒྱུ་སྐར་རྩི་བར་བྱེད།ཁང་པ་རྩིག་པར་བྱེད།བྱིན་གྱིས་རློབ་པར་བྱེད།སེམས་ཅན་ངན་ལས་ཟློ་བར་བྱེད།སློབ་མ་ལ་སློབ་པར་བྱེད།མཆོད་པ་ཤོམ་པར་བྱེད།ཚེ་སྲིང་བར་བྱེད།མེ་ལ་སྲོ་བར་བྱེད།དྲང་བོར་སྲོང་བར་བྱེད།ཚུལ་ཁྲིམས་སྲུང་བར་བྱེད།མེས་སྲེག་པར་བྱེད།དོན་ལ་སེམས་པར་བྱེད།ཅེས་པ་རྣམས་སོ།།
ཡང་དེ་ལྟ་བུའི་སྒྲ་རྣམས་བྱ་བ་བྱེད་པ་ལ་སྦྱོར་ཞིང་བསྐུལ་བའི་ཚིག་རྣམས་བས་འཕུལ་མེད་པ་ཉིད་ཡིན་པས་བས་འཕུལ་ཅན་དུ་འཁྲུལ་བར་མི་བྱ་སྟེ།དཔེར་ན་ཁྱོད་ཀྱིས་སྒྲུབས་ཤིགབྱུག་པ་སྐུས་ཤིགབརྩེ་བས་སྐྱོངས་ཤིགདཔོན་དུ་སྐོས་ཤིགདེ་ལས་རྐུས་ཤིགའགྲོ་བ་སྒྲོལ་ཅིགབསམ་གཏན་སྒོམས་ཤིགཁང་པ་སྒྱེལ་ཅིགདབང་སྐུར་ཅིགཕྲེང་བ་རྒྱུས་ཤིགཞིང་རྔོས་ཤིགདགེ་བ་སྔོས་ཤིགདེ་སྐད་རྗོད་ཅིགམིག་གིས་ལྟོས་ཤིགཞགས་པས་སྡོམས་ཤིགབརྩོན་འགྲུས་རྩོམས་ཤིགམ་ནོར་བར་རྩིས་ཤིགསེམས་ཅན་མྱ་ངན་ལས་ཟློས་ཤིགལེགས་པར་སློབས་ཤིགམཆོད་པ་ཤོམས་ཤིགཚེ་སྲིངས་ཤིགམེལ་སྲོས་ཤིགདྲང་བོར་སྲོངས་ཤིགཚུལ་ཁྲིམས་སྲུངས་ཤིགཕྱོགས་གཅིག་སྲེས་ཤིགམེས་སྲེགས་ཤིགལེགས་པོར་སོམས་ཤིགཅེས་སོགས་རྣམས་ལྟ་བུ་སྟེ་འདི་དག་གིས་མཚོན་ནས་རྒྱ་ཆེར་རྟོགས་པར་བྱའོ།།
སྔོན་འཇུག་གི་མ་ནིང་ག་ད་གཉིས་ནི་དངོས་པོ་བདག་གཞན་གཉིས་དང་།དུས་ད་ལྟ་བའི་ཆེད་དུ་གཙོ་ཆེ་བ་ཉིད་ཡིན་ཏེ།དཔེར་ན།གས་འཕུལ་བདག་གཞན་གཉིས་ཀ་ལ་འཇུག་པ།།གཏན་ཚིགས་གཏམ་གཏོང་བསམ་གཏན་དང་།།གཏར་ངག་དོན་གཉེར་གཉེན་པོ་དང་།།ཁ་གསག་གསོག་འཇོག་གསུས་པ་དང་།།སེམས་གདུག་སྐད་གདངས་ལུས་གནད་དང་།།གནས་ལུགས་རྣམ་གཞག་གཞལ་མེད་ཁང་།།གཡས་གཡོན་གཡང་དང་གཡུལ་འགྱེད་སོགས།།
གས་འཕུལ་ད་ལྟ་བ་ལ་འཇུག་པ་ནི།སྦྱིན་པ་གཏོང་བ།ཤིང་གཅོད་པ།སེམས་ཅན་གསོད་པ།འོག་ཏུ་གནོན་པ་རྣམས་ལྟ་བུ་སྟེ།དེ་རྣམས་ལ་རྣ་རུ་མེད་པ།གཏར་བ།གཅད་པ།གསད་པ།གནན་པ།ཞེས་པར་གྱུར་པ་ན་བྱ་བའི་ཡུལ་མ་འོངས་པའང་འཇུག་ལ།བ་དང་མས་འཕུལ་བ།བཏང་།བསད།མནན།ཅེས་པར་གྱུར་པ་ན་འདས་པའི་ཚིག་གོམས་འཕུལ་བའང་འདས་པར་གྱུར་པ་ཅི་ཞེ་ན།ཤིན་ཏུ་མོ་ནི་མཉམ་ཕྱིར་རོ།།ཞེས་སྔོན་འཇུག་གི་ཤིན་ཏུ་མོ་མ་ཡིག་ནི་བདག་གཞན་དང་དུས་གསུམ་ལ་མཉམ་པར་འཇུག་པའི་ཕྱིར་རོ།།
འདིར་དུས་གསུམ་ལས་བརྩམས་ཏེ་ག་དང་བའི་འཇུག་ཚུལ་དཔེར་བརྗོད་པ་ཅུང་ཟད་གནད་ཆེ་བར་བཀོད་པ་ནི།མ་འོངས་པ་དང་ད་ལྟར་འདས།།དཔེར་བརྗོད་འདི་ཡི་གོ་རིམ་མོ།།གཅད་དང་གཅོད་དང་བཅད་པ་དང་།།གཞལ་བ་འཇལ་བྱེད་བཅལ་བ་དང་།།གདིང་དང་འདིང་བ་བཏིངས་པ་དང་།།གདགས་དང་འདོགས་དང་བཏགས་པ་དང་།།གདབ་དང་འདེབས་དང་བཏབ་པ་དང་།།གདུལ་དང་འདུལ་དང་བཏུལ་བ་དང་།།གདེག་དང་འདེགས་དང་བཏེག་པ་དང་།།གཏང་དང་གཏོང་བཏང་བ་དང་།།གདོན་དང་འདོན་དང་བཏོན་པ་དང་།།གནན་དང་གནོན་མནན་པ་དང་།།གཞིག་དང་འཇིག་དང་བཤིག་པ་དང་།།གཞིལ་དང་འཇིལ་དང་བཅིལ་བ་དང་།།གཞོམ་དང་འཇོམ་དང་བཅོམ་པ་དང་།།གཞག་དང་འཇོག་དང་བཞག་པ་དང་།།གཞུག་དང་འཇུག་བཅུག་པ་དང་།།གཟུགས་དང་འཛུགས་དང་བཙུགས་པ་དང་།གཟུང་དང་འཛིན་དང་བཟུང་བ་དང་།།གསད་དང་གསོད་དང་བསད་པ་དང་།།ཞེས་པ་ལྟ་བུ་ལ་སོགས་པ་གས་འཕུལ་མ་འོངས་པ་ལ་འཇུག་པ་དུ་མ་སྣང་བས་ད་ལྟ་བ་ལ་འཇུག་པར་བཤད་པ་དང་མི་འགལ་ཏེ།གཙོ་ཆེ་བའི་དབང་གིས་གསུངས་པའི་ཕྱིར་རོ།།
དས་འཕུལ་བ་བདག་གཞན་གཉིས་ཀ་ལ་འཇུག་པ་ནི།དགེ་བ།དགའ་བ།དགོས་པ་སོགས་པ་རང་གཞན་གཉིས་ཀ་ལ་སྤྱིར་རུང་བའི་སྒྲ་རྣམས་ཡིན་ལ།ད་ལྟ་བ་ལ་འཇུག་པ་ནི།དགོངས་སུ་གསོལ།རྒྱས་པར་མཛོད་ལྟ་བུ་རྣམས་སོ།།འདིར་དས་འཕུལ་བ་བྱ་བའི་ཡུལ་མ་འོངས་པ་ལའང་འཇུག་པ་མང་པོ་སྣང་སྟེ།དགང་བྱ་འགེང་དང་བཀང་བ་དང་།།དགག་དང་འགོག་དང་བཀག་པ་དང་།།ཟོང་དགྲོམ་འགྲེམ་དང་བཀྲམ་པ་དང་།།དགྲོལ་དང་འགྲོལ་དང་བཀྲོལ་བ་དང་།།དགུག་དང་འགུགས་དང་བཀུག་པ་དང་།།དགོད་བྱ་འགོད་དང་བཀོད་པ་དང་།།དབུལ་དང་འབུལ་དང་ཕུལ་བ་དང་།།དབབ་དང་འབེབས་དང་ཕབ་པ་དང་།།དབུག་བྱ་འབིགས་དང་ཕུག་པ་དང་།།དབྲོག་བྱ་འཕྲོག་དང་ཕྲོགས་པ་དང་།།དབྱེ་བྱ་འབྱེད་དང་ཕྱེ་བ་དང་།།སུན་དབྱུང་སུན་འབྱིན་སུན་ཕྱུང་སོགས་སོ།།
སྔོན་འཇུག་གི་མོ་འ་ཡིག་ནི་དངོས་པོ་བདག་དང་དུས་མ་འོངས་པ་སྟོན་པའི་ཕྱིར་དུ་འཇུག་སྟེ།དཔེར་ན།མགོན་པོ་ཆེན་པོ་བདག་འཚལ་ལོ།།ཞེས་དང་།བདག་ཕྱག་འཚལ་དང་བདག་འདུད་དོ།།ཞེས་སོགས་བདག་གི་སྒྲ་སྦྱར་བ་དང་།མ་སྦྱར་བའང་དེའི་དོན་ཅན་གྱིས་འས་འཕུལ་ཅན་རྣམས་དང་།མ་འོངས་པ་སོགས་ལ་འཇུག་པ་ནི།བྱ་བ་འགྲུབ་པར་འགྱུར།སངས་རྒྱས་འབྱུང་བར་འགྱུར།སྡིག་པ་འཛད་པར་འགྱུར།ནད་ལ་འཛེམ་པར་བྱ།ཞེས་སོགས་མང་པོ་རྣམས་སོ།།
རྩ་བར་མ་བཤད་ཀྱང་འས་འཕུལ་ད་ལྟ་བ་ལ་འཇུག་པ།སྔར་དུས་གསུམ་ག་ལ་སྦྱར་བའི་དཔེར་བརྗོད་གོང་དུ་བཀོད་པའི་འཇལ་དང་།འདིང་དང་།འགོད་པ་སོགས་རྣམས་སུ་ཤེས་པར་བྱའོ།།
ཤིན་ཏུ་མོ་མ་ཡིག་ན་བདག་གཞན་དང་དུས་གསུམ་ག་ལ་མཉམ་པའི་ཕྱིར་འཇུག་སྟེ།དེ་ཡང་འདས་པ་ལ་འཇུག་པ་ནི་དཔེར་ན།མཁས་པ།དེས་མཚན་པ།མཛེས་པ་དང་།འོག་ཏུ་མནན་པ་དང་།མགུ་བའི་མཉེས་དང་།ཀོ་བ་མཉེས་པ་དང་།སྡུག་བསྔལ་གྱིས་མནར་བ་དང་།ལུང་མནོས་པ་དང་།ན་བཟའ་མནབས་པ་ལ་སོགས་པ་རྣམས་སོ།།
ད་ལྟ་བ་ལ་ནི།དེ་མཛོད་ཅེས་པ་དང་།ཆུ་ལས་སྒྲོལ་བར་བྱེད་པའི་མཉན་པ་ཞེས་པ་ལྟ་བུ་དང་།མ་འོངས་པ་ལ་ནི་ཆོས་མཉན་པར་བྱ་ཞེས་པ་ལྟ་བུ་དང་།བདག་དང་གཞན་ལ།མགོན་དང་མཚུངས་དང་མཐེང་ལ་སོགས་པ་སྟེ།འདི་ཡང་བདག་གཞན་དུས་གསུམ་ལ་རིས་སུ་མ་ཆད་པར་སྤྱིར་འཇུག་པ་དང་།སོ་སོ་ལ་འཇུག་པ་གཉིས་སུ་བརྟགས་ཏེ་ཤེས་པར་བྱའོ།དེ་དག་ནི་སྔོན་འཇུག་ལྔ་པོའི་འཇུག་པ་ལས་བརྩམས་ཏེ་ཕྱོགས་ཙམ་བརྗོད་པའོ།།
སྐབས་གསུམ་པ།རྗེས་འཇུག་གི་རྟགས་ཀྱི་འཇུག་པ་བཤད།
གསུམ་པ་རྗེས་འཇུག་གི་རྟགས་ཀྱི་འཇུག་པ་བཤད་པ་ལ་གཉིས།རྗེས་འཇུག་རྟགས་ཀྱི་དབྱེ་བ་བཤད།དེའི་འཇུག་པ་རྒྱས་པར་པཤད་པའོ།།
རྗེས་འཇུག་རྟགས་ཀྱི་དབྱེ་བ་བསྟན་པ།
དང་པོ་རྗེས་འཇུག་རྟགས་ཀྱི་དབྱེ་བ་བཤད་པ་ནི།རྗེས་སུ་འཇུག་པའི་ཡི་གེ་བཅུ་པོ་ལ་ཡང་རྟགས་ཕོ་མོ་མ་ནིང་གསུམ་དུ་དབྱེ་བར་བྱ་སྟེ།།དེ་ཡང་ད་བ་ས་གསུམ་ནི་རྗེས་འཇུག་གི་ཕོ་ཡིག་དང་།འ་དང་ར་གཉིས་མོ་ཡིག་དང་།ག་ང་ན་མ་འ་རྣམས་མ་ནིང་དུ་ཤེས་པར་བྱས་ནས།སླར་ཡང་ནང་གསེས་ཀྱི་དབྱེ་བ་ནི།ཕོ་ལ་སྐྱེས་བུ་རབ་འབྲིང་གསུམ་སྟེ་ད་བ་ས་རྣམས་སོ།།མོ་ལ་མོ་ཙམ་དང་ཤིན་ཏུ་མོ་གཉིས་ཏེ་འ་དང་རའོ།།མ་ནིང་ལ་འགྱུར་བ་མ་ནིང་ག་ང་ན་གསུམ་དང་།མཚན་གཉིས་པ་མ་དང་།མ་ནིང་མཚན་མེད་ལ་ཡིག་དག་དང་བཅས་པ་རྗེས་འཇུག་གི་མ་ནིང་རྣམ་པ་གསུམ་དུ་འདོད་ཅེས་པ་སྟེ།ཐོག་མར་རྟགས་ཀྱི་དབྱེ་བས་ངེས་པར་བྱའོ།།འདི་ལ་ངོས་འཛིན་ལུགས་མི་འདྲ་བ་འགའ་སྣང་ཡང་།རེ་ཞིག་འདི་འཐད་པར་མངོན་ནོ།།
དེ་དག་གི་འཇུག་ཚུལ་སྤྱིར་བཤད་པ།
གཉིས་པ་དེའི་འཇུག་པ་རྒྱས་པར་པཤད་པ་ལ།དྲི་བས་མཚམས་སྦྱར་བ་དང་།ལན་གྱིས་རྒྱས་པར་བཤད་པ་གཉིས་ཀྱི་དང་པོ་དྲི་བས་མཚམས་སྦྱར་བ་ནི།དེ་ལྟར་རྗེས་འཇུག་གི་ཡི་གེ་རྟགས་ཀྱིས་ངེས་པར་བྱས་ནས།དེ་ཡང་སྔར་སྔོན་འཇུག་གི་སྐབས་སུ་བཤད་པ་བཞིན་བྱེད་པ་བཞི་བྱེད་དེ།ཡི་གེ་གང་ལ་འཇུག་པར་བྱེད་པ་དང་།ངོ་བོ་གང་གིས་འཇུག་པར་བྱེད་པ་དང་།ཚུལ་ཇི་ལྟར་འཇུག་པར་བྱེད་དང་།དགོས་པ་ཅིའི་ཕྱིར་འཇུག་པར་བྱེད་པ་རྣམས་སོ།།
གཉིས་པ་ལན་གྱིས་རྒྱས་པར་བཤད་པ་ལ་བཞི།གང་ལ་འཇུག་པ་བཤད།གང་གིས་འཇུག་པ་བཤད།ཇི་ལྟར་འཇུག་པ་བཤད།ཅི་ཕྱིར་འཇུག་པ་བཤད་པའོ།།
གང་ལ་འཇུག་པ་བསྟན་པ།
དང་པོ་གང་ལ་འཇུག་པ་བཤད་པ་ནི།རྗེས་འཇུག་བཅུ་པོ་ཡི་གེ་གང་ལ་འཇུག་པར་བྱེད་ཅེ་ན།སྔོན་འཇུག་དང་མི་འདྲ་བར་ཡི་གེ་ཐམས་ཅད་ལ་རྗེས་སུ་འཇུག་པར་བྱེད་ཅེས་པའོ།།
གང་གིས་འཇུག་པ་བཤད་པ།
གཉིས་པ་གང་གིས་འཇུག་པ་བཤད་པ་ནི།འཇུག་བྱེད་ཡི་གེ་གང་ཞིག་གིས་ཞེ་ན།རྗེས་འཇུག་བཅུ་པོ་དེ་དག་འཇུག་གི་གཞན་གྱིས་མ་ཡིན་ཞེས་པའོ།།
ཇི་ལྟར་འཇུག་པ་སྤྱིར་བཤད་པ།
གསུམ་པ་ཇི་ལྟར་འཇུག་པ་ལ་རྣམ་པ་གཉིས་ཡིན་ཏེ།སྒྲས་འཇུག་ཚུལ་དང་།དོན་གྱིས་འཇུག་ཚུལ་ལོ།།
སྒྲས་འཇུག་ཚུལ་ལས་དྲག་ཞན་སྤྱིའི་འཇུག་ཚུལ་བཤད་པ།
དང་པོ་སྒྲས་འཇུག་ཚུལ་ལ།དྲག་ཞན་སྤྱིའི་འཇུག་ཚུལ་བཤད།ནང་གསེས་ཞིབ་ཏུ་འཇུག་ཚུལ་བཤད།མ་ནིང་གིས་འཇུག་ཚུལ་རྒྱས་པར་བཤད་པ་དང་གསུམ་གྱི་དང་པོ་དྲག་ཞན་སྤྱིའི་འཇུག་ཚུལ་བཤད་པ་ནི།རྗེས་འཇུག་བཅུའི་ནང་ནས་ཕོ་ད་བ་ས་གསུམ་དང་།མོ་ལ་མོ་ཙམ་འ་དང་ཤིན་ཏུ་མོ་ར་སྟེ་གཉིས་དང་།མ་ནིང་ལ་འགྱུར་བ་མ་ནིང་ག་ང་ན་གསུམ་དང་མཚན་གཉིས་པ་མ་དང་།མ་ནིང་མཚན་མེད་ལ་ཡིག་སྟེ།དེ་ལྟར་གསུམ་ཡོད་པའི་ཕོ་ཡིག་རྣམས་སྒྲ་གདངས་དྲག་པོའི་ཚུལ་དང་།མོ་ཡིག་རྣམས་ཞན་པའི་ཚུལ་དང་།མ་ནིང་རྣམས་བར་མའི་ཚུལ་ཏེ།དེ་ལྟར་དྲག་ཞན་བར་མ་རྣམ་པ་གསུམ་དུ་འཇུག་གོ།
ནང་གསེས་ཞིབ་ཏུ་འཇུག་ཚུལ་བཤད་པ།
གཉིས་པ་ནང་གསེས་ཞིབ་ཏུ་འཇུག་ཚུལ་བཤད་པ་ནི།སྔོན་འཇུག་དང་མིང་གཞི་དང་རྗེས་འཇུག་གསུམ་ག་ཕོ་ཡིག་ཡིན་པ་ནི།དྲག་པ་གསུམ་ཉིད་ནང་ཕྲད་པ་སྟེ།དཔེར་ན།བཀས་བཅད།བསད་ཅེས་པ་དྲག་པའི་དྲག་པོར་ཤེས་པར་བྱ་ལ།གལ་ཏེ་སྔོན་འཇུག་དང་མིང་གཞི་དང་རྗེས་འཇུག་གསུམ་ག་མོ་ཡིག་ཡིན་པ་ནི་ཞན་པ་ནང་ཕྲད་པ་སྟེ།དཔེར་ན།འགང་འཚལ་ཞེས་པ་ལྟ་བུ་སྒྲ་ཞན་པའི་ཞན་པར་ཤེས་པར་བྱ་ཞིང་།དེ་བཞིན་དུ་བཤད་མ་ཐག་པ་དེ་དག་ལ་ནང་གི་ཆ་ཤས་ཡི་གེ་དྲག་ཞན་གྱིས་དེ་དག་སོ་སོ་ལ་ཡང་།དྲག་པའི་དྲག་པ།དྲག་པའི་ཞན་པ།ཞན་པའི་དྲག་པ།དྲག་པའི་ཞན་པ་ཞེས་དྲག་ཞན་གཉིས་སུ་དབྱེ་བར་བྱའོ།།
མ་ནིང་གིས་འཇུག་ཚུལ་རྒྱས་པར་བཤད་པ།
གསུམ་པ་མ་ནིང་གིས་འཇུག་ཚུལ་རྒྱས་པར་བཤད་པ་ནི།རྗེས་འཇུག་གི་མ་ནིང་ལ་སོགས་པ་གསུམ་དུ་གང་གཏོགས་པ་དེ་དག་གི་སྒྲའི་འཇུག་ཚུལ་ལས།ཐོག་མར་འགྱུར་བ་མ་ནིང་ག་ང་ན་གསུམ་ནི་ཕོ་ཡིག་དྲག་པོ་རྣམས་དང་ཕྲད་ན་དྲག་པར་ཏེ་ཕོ་ཡིག་ཏུ་འགྱུར་ཏེ།རྟག་པ།རྐང་པ།སྟོན་པ་ལྟ་བུའོ།།ཞན་པ་མོ་ཡིག་རྣམས་དང་ཕྲད་ན།ཞན་པ་འགྱུར་ཏེ་མཉམ་པར་འཇོག་གོ།མཐོང་ངོ་།།ཡིན་ནོ།།ལྟ་བུའོ།།དེའི་ཕྱིར་འགྱུར་བ་མ་ནིང་ཞེས་བྱའོ།།མ་ནིང་མཚན་གཉིས་པ་མ་ཡིག་ནི་དྲག་ཞན་གཉིིས་ཀ་དང་ནི་ཕྲད་གྱུར་ན་ཞེས་པ།ཡེ་ཤེས་པ་བསྟིམས།རྐང་པ་བསྟུམས།བརྩོན་འགྲུས་བརྩམས་ལྟ་བུ་མ་ཡིག་སྟེ།ས་དང་ར་ནི་མོ་ཡིག་དང་ཀ་ཏ་བ་རྣམས་ཕོ་ཡིན་པ་གཉིས་ཀ་ཕྲད་པའོ།དེ་ནི་གཉིས་ཀ་ཅན་དུ་འགྱུར་ཞེས་པ།ཕོ་མོ་གཉིས་ཀའི་རྟགས་ཅན་དུ་འགྱུར་ཏེ།མ་ནིང་མཚན་གཉིས་པ་སྐྱེས་པ་དང་བུད་མེད་གཉིས་ཀའི་མཚན་དང་ལྡན་པ་བཞིན་ནོ།།མ་ནིང་མཚན་མེད་ལ་ཡིག་ནི་དྲག་ཞན་གཉིས་ཀ་དག་དང་མ་ཕྲད་ན།གང་དུ་ཡང་མི་འགྱུར་ཏེ།ཕྱག་འཚལ།མཁལ་མ་དང་།ཐལ་མོ་དང་།འཚལ་བ་སོགས་མ་ནིང་དང་ཕྲད་པས་དྲག་ཞན་གཉིས་ཀའི་རྟགས་མེད་པ་སྟེ།མ་ནིང་མཚན་མེད་པ་ཕོ་མོའི་རྟགས་མེད་པ་བཞིན་ནོ།།རྒྱུ་མཚན་དེས་ན་རྗེས་འཇུག་གི་མ་ནིང་ལ་འགྱུར་བ་མ་ནིང་དང་།མ་ནིང་མཚན་གཉིས་པ་དང་།མཚན་མེད་མ་ནིང་སྟེ་གསུམ་དུ་འདོད་དོ།།དེ་དག་ནི་རྗེས་འཇུག་བཅུའི་སྒྲའི་འཇུག་ཚུལ་ལོ།།
དོན་གྱིས་འཇུག་ཚུལ་ལས་སྔ་མ་གང་ལྟར་འགྱུར་བ་བཤད་པ།
གཉིས་པ་དོན་གྱི་འཇུག་ཚུལ་ནི་རྣམ་པ་གཉིས་ཡིན་ཏེ།སྔ་མ་གང་ལྟར་འགྱུར་བ་བཤད་པ་དང་།ཕྱི་མ་གང་ལྟར་འགྱུར་བ་བཤད་པའོ།།
དང་པོ་མ་ནིང་གིས་འཇུག་ཚུལ་རྒྱས་པར་བཤད་པ་ནི།རྗེས་འཇུག་བཅུའི་དོན་གྱི་འཇུག་ཚུལ་ཡང་མིང་ངམ་ཚིག་སྔ་མ་གང་ལྟར་འགྱུར་པ་ནི།སྔར་སྔོན་འཇུག་ལྔའི་སྐབས་སུ།ཅི་ཕྱིར་འཇུག་པར་བྱེད་ཅེ་ན།ཕོ་ནི་འདས་དང་གཞན་བསྒྲུབ་ཕྱིར།།མ་ནིང་གཉིས་ཀ་ད་ལྟར་ཆེད།།མོ་ནི་བདག་དང་མ་འོངས་ཕྱིར།།ཤིན་ཏུ་མོ་ནི་མཉམ་ཕྱིར་རོ།།ཞེས་བཤད་པ་བཞིན་སྦྱར་པར་བྱའོ།གལ་ཏེ་འདིར་འགའ་ཞིགསྔ་མ་སྔོན་འཇུག་སྔར་བཞིན་སྦྱར།།ཞེས་པ་ནི་ཚུལ་ཇི་ལྟར་འཇུག་པ་སྔར་སྔོན་འཇུག་གི་སྐབས་སུ།ཕོ་ནི་དྲག་པའི་ཚུལ་གྱིས་ཏེ།ཞེས་སོགས་བཤད་པ་བཞིན་སྦྱར་བར་བྱ་ཡིན་ཞིང་འདས་དང་གཞན་བསྒྲུབ་ཅེས་སོགས་ནི་སྔོན་འཇུག་གི་ཅི་ཕྱིར་འཇུག་པ་བཤད་པའི་སྐབས་ཡིན་པས་འདིར་མ་འབྲེལ་ཞིང་།རྗེས་འཇུག་གི་ཅི་ཕྱིར་འཇུག་པ་འོག་ནས་སྟོན་པས་སོ་སྙམ་དུ་དོགས་པར་གྱུར་ན་དེའི་ཕྱིར་བརྗོད་པར་བྱ་སྟེ།གཞུང་འདིར་སྔོན་འཇུག་དང་རྗེས་འཇུག་གཉིས་ཀ་འཆད་པའི་སྐབས་སུ།དེ་ཡང་བྱེད་པ་བཞི་བྱེད་དེ།།གང་ལ་འཇུག་བྱེད་གང་གིས་བྱེད།།ཇི་ལྟར་འཇུག་བྱེད་ཅི་ཕྱིར་བྱེད།།ཅེས་བཞི་བཞིའི་སྒོ་ནས་སྟོན་པར་འདྲ་ཡང་ཁྱད་པར་ཅུང་ཟད་ཡོད་དེ།སྔོན་འཇུག་ཇི་ལྟར་འཇུག་པའི་ཚུལ་འཆད་པ་ན།སྒྲའི་འཇུག་ཚུལ་གཙོ་བོར་བྱས་ནས།ཕོ་ནི་དྲག་པོའི་ཚུལ་གྱིས་ཏེ།།ཞེས་སོགས་བཤད་ཅིང་དོན་གྱི་འཇུག་ཚུལ་དང་ཅི་ཕྱིར་འཇུག་པར་བྱེད་པ་ཐུན་མོང་དུ།ཕོ་ནི་འདས་དང་གཞན་བསྒྲུབ་ཕྱིར།།ཞེས་སོགས་གསུངས་སོ།།རྗེས་འཇུག་གི་སྐབས་སུ་ནི་ཇི་ལྟར་འཇུག་པའི་ཚུལ་ལ་སྒྲའི་འཇུག་ཚུལ་དང་དོན་གྱི་འཇུག་ཚུལ་གཉིས་སུ་ཕྱེ་ནས།སྒྲའི་འཇུག་ཚུལ་ཕོ་མོ་མ་ནིང་ལ་སྦྱར་བ་ནང་གསེས་ཀྱི་དབྱེ་བ་དང་བཅས་པ་རྒྱས་པར་བཤད་ཅིང་།དོན་གྱི་འཇུག་ཚུལ་སྔོན་འཇུག་ལ་ག་འཕངས་ནས་ཅི་ཕྱིར་འཇུག་པ་ནི་སྔོན་འཇུག་དང་རྗེས་འཇུག་གཉིས་ཀའི་ཐུན་མོང་བའི་དོན་སྟོན་པར་བྱེད་པ་ཡི་གེ་བཅུ་པོ་འདི་ལ་རག་ལས་སོ།།ཞེས་པ་ཙམ་སྟོན་པར་བྱེད་པའི་ཕྱིར་དང་།སྒྲའི་འཇུག་ཚུལ་བཤད་མ་ཐག་པའི་རྗེས་སུ་ཡང་།སྔ་མ་སྔོན་འཇུག་ལྔ་བཞིན་སྦྱར།།ཞེས་པ་ལ་ཕོ་ནི་དྲག་པའི་ཚུལ་གྱིས་ཞེས་སོགས་སྒྲའི་འཇུག་ཚུལ་ཟློས་པའི་སྐྱོན་དང་།དོན་གྱིས་འཇུག་ཚུལ་ཆད་པའི་སྐྱོན་དུ་འགྱུར་བ་དང་།ཕོ་ནི་འདས་དང་གཞན་བསྒྲུབ་ཕྱིར།།ཞེས་པ་ལ་སོགས་པར།ཆུ་བཀགཤིང་བཅད།དུམ་བུར་བཀས།ཞེས་སོགས་སྔོན་འཇུག་གི་བ་ཡིག་གི་ནུས་པར་མ་ཟད།རྗེས་འཇུག་གི་ཕོ་ཡིག་ད་བ་ས་རྣམས་ཀྱི་བྱེད་པར་ཡང་ཤིན་ཏུ་སྣང་བའི་ཕྱིརརོ།།
ཕྱི་མ་གང་ལྟར་འགྱུར་བ་སྤྱིར་བཤད་པ།
གཉིས་པ་ཕྱི་མ་གང་ལྟར་འགྱུར་བ་བཤད་པ་ལ།དྲག་ཞན་སྒྲ་མཐུན་འདྲེན་པའི་ཚུལ།རྣམ་དབྱེ་སྔ་ཤུགས་ལ་འདྲེན་པའི་ཚུལ།དེའི་ནང་གསེས་བྱ་བའི་ཚུལ་དང་གསུམ་ལས།
དྲག་ཞན་སྒྲ་མཐུན་འདྲེན་པའི་ཚུལ་བཤད་པ།
དང་པོ་དྲག་ཞན་སྒྲ་མཐུན་འདྲེན་པའི་ཚུལ་ནི།རྗེས་འཇུག་གི་ཡིག་གེ་བཅུ་པོ་ཞུགས་པའི་རྗེས་སུ་དོན་གསལ་བར་བྱེད་པའི་ཚིག་ཕྲད་དང་།རྣམ་དབྱེ་ཕྱི་མ་དག་གི་འདྲེན་ཚུལ་ནི།ཕོ་ཡིས་ཏེ་མིང་གཞིའི་ཕོ་ཀ་ཅ་ཏ་པ་རྣམས་ཀྱིས་རྗེས་འཇུག་ཕོ་ཡི་མིང་མཐའ་འདྲེན་ཏེ།ད་བ་ས་གསུམ་ཞུགས་པ་དྲང་བར་བྱ་སྟེ།དཔེར་ན།སྟོན་ཀདཔྱིད་ཀཐད་ཀལན་ཅིགསྐད་ཅིགཐབས་ཅིགབསད་དེ།གྱུར་ཏེ།བཅས་ཏེ་དང་།བསད་པ།བཏབ་པ།བཀས་པ་རྣམས་ལྟ་བུའོ།།མིང་གཞིའི་མོ་མ་ཡིག་རྗེས་འཇུག་གི་མི་ཡི་མིང་མཐའ་སྟེ་འ་ར་གཉིས་ཀྱིས་མིང་མཐའ་ཅན་དྲང་བར་བྱ་སྟེ།དགའ་མ།ཟར་མ་ཞེས་པ་ལྟ་བུའོ།།རྗེས་འཇུག་གི་མ་ནིང་ག་ལྟ་བུ་དག་གིས་ནི་རྗེས་འཇུག་གི་མ་ནིང་ག་ང་ན་མ་ལ་རྣམས་ཞུགས་པའི་མིང་མཐའ་དྲང་བར་བྱ་སྟེ།དཔེར་ན།བདག་གིདྲུང་གིལྷས་བྱིན་གྱི།གཏམ་གྱིས་སྦྱོར་བ།དལ་གྱིས་བྱ་བ་ཞེས་པ་ལྟ་བུའོ།།སྔར་སུམ་ཅུ་པར་རྣམ་དབྱེ་དྲུག་པའི་སྒྲ་མཐུན་སྦྱོར་བའི་ཆ་ནས་དང་འདིར་རྗེས་འཇུག་གི་སྒྲ་མཐུན་སྦྱོར་བའི་ཆ་ཤས་ནས་སྦྱར་བའོ།།
རྣམ་དབྱེ་སྔ་ཤུགས་འདྲེན་པའི་ཚུལ་བཤད་པ།
གཉིས་པ་རྣམ་དབྱེ་སྔ་ཤུགས་ལ་འདྲེན་པའི་ཚུལ་ནི་བཤད་མ་ཐག་པའི་མིང་མཐའ་དེ་དག་ཉིད་ཀྱིས་ཀྱང་ནི་མིང་མཐའ་དེ་ཉིད་རང་གི་སྒྲ་དང་མཐུན་པའི་རྣམ་དབྱེ་རྣམས་འདྲེན་ཏེ།རྣམ་དབྱེ་དང་པོ་ཆོས་དངོས་ཏེ་ངོ་བོ་ཙམ་བརྗོད་པ།སངས་རྒྱས།སེམས་ཅན།ཀ་བ།བུམ་པ།སྣམ་བུ།རེ་ལྡེ་ཞེས་པ་ལ་སོགས་པ་མིང་རྐྱང་པ་རྣམས་དང་།གཉིས་པ་ལས་སུ་བྱ་བ་སྟེ།ཤིང་ལ་འཛེགས།ས་ལ་འབབ།ཤར་ཕྱོགས་སུ་འགྲོ།སངས་རྒྱས་སུ་འགྱུར།ཞེས་སོགས་ཀྱི་ལ་དང་སུ་ལ་སོགས་པ་རྣམ་དབྱེའི་སྒྲ་ཡིན་པ།སྔར་ལ་དོན་སུ་རུ་དུ་ཞེས་སུམ་ཅུ་བར་དཔེར་བརྗོད་པ་རྣམས་དང་།རྣམ་དབྱེ་གསུམ་པ་བྱེད་པ་ནི་སྟ་རེ་ཤིང་བཅད།ལྷས་བྱིན་གྱིས་ཟས་ཟོས་སོགས་ཀྱི་སྒྲ་དང་།རྣམ་དབྱེེ་བཞི་པ།ཡང་དག་པར་རབ་ཏུ་སྦྱིན་པ།འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག་དང་།བདག་དོན་བདག་ལ་ཐུགས་བརྩེའི་ཕྱིར།།ཞེས་པ་དང་།སེམས་ཅན་ཀུན་ལ་སྨད་སླད་དུ།།ཞེས་དང་།སངས་རྒྱས་ཀུན་ལ་བསྙེན་བཀུར་བྱས།།ཞེས་སོགས་ཀྱི་ཕྱིར་དང་།སླད་དང་།ལའི་སྒྲ་རྣམས་དང་།རྣམ་དབྱེ་ལྔ་པ་འབྱུང་ཁུངས་ནི།སངས་རྒྱས་ལས་ཆོས་ཆོས་ལས་འཕགས་པའི་ཚོགས།།ཞེས་དང་།རི་དབང་རྩེ་ནས་གང་ཞིག་ལྷུངས་གྱུར་པ།།ཞེས་དང་།འདམ་རྫབ་མེད་པར་འདམ་ལས་སྐྱེས་པ་འབྱུང་།།ཞེས་སོགས་ཀྱི་ནས་དང་ལས་ཀྱི་སྒྲ་རྣམས་དང་།དྲུག་པ་འབྲེལ་བ་ནི།ཤིང་གི་ཡལ་གཁྱོད་ཀྱི་ལག་པ།གཏན་གྱི་འདུན་མ།རི་ཡི་རྩེ་མོ།དེ་བཞིན་གཤེགས་པའི་དབུ།ཞེས་པ་ལྟ་བུའི་གི་གྱི་ཀྱི་འི་ཡི་རྣམས་དང་།བདུན་པ་གནས་གཞི་ནི།ཤིང་ལ་བྱ་གནས།ས་འོག་ན་ཀླུ་ཞེས་སོགས་ཀྱི་ན་དང་།ལའི་སྒྲ་རྣམས་དང་།རྣམ་དབྱེ་དང་པོ་ཉིད་དོན་དེ་མངོན་དུ་ཕྱོགས་པར་བྱ་བའི་ཕྱིར་སྦྱར་བ།བོད་པའི་སྒྲ་ཡང་དྲང་པར་བྱ་སྟེ།ཀྱེ་རྒྱལ་བའི་སྲས་དག་ཅེས་པ་ལྟ་བུ་རྣམས་དང་གཞན་ཡང་རྗེས་འཇུག་བཅུ་པོ་ལ་ཨོ་ཡིག་སྦྱར་བ་སླར་བསྡུ་བའི་སྒྲ།རྟོག་གོ།ཡོད་དོ།།སོགས་དང་།ལ་དོན་སུ་ལ་ཨུ་ཕྱིས་ནས།ཞེས་པའི་སྐབས་སུ་བཤད་པའི་ལྷག་བཅས་ཀྱི་སྒྲ་སྟེ་ཏེ་དེ་ཞེས་པ་རྣམས་དང་།རྗེས་འཇུག་ཡི་གེ་བཅུ་པོ་ལ་དྲུག་པ་སྦྱར་བ་འབྱེད་སྡུད་ཀྱི་སྒྲའི་ཞེས་པ་ལ་སོགས་པ་དང་ནིའི་སྒྲ་ལྟ་བུ་ངེས་གཟུང་ངམ་བསྣན་པ་དང་།བདག་པོའི་སྒྲ་རྟ་པ་དང་གསེར་པ་སོགས་པུ་ལིངྒའི་རྟགསསུ་བཤད་པ་རྣམས་དང་།དགག་པའི་སྒྲ་གཟུགས་མེད་སོགས་དང་།མ་རིག་པ་སོགས་སྔར་སྟྲཱི་ལིངྒའི་རྟགས་སུ་བཤད་པ་རྣམས་དང་།དགག་པའི་སྒྲ་མེད་པའི་བསྒྲུབ་པ་དང་།ཡོད་ཀྱང་ལྟ་བུའི་ཚིག་གི་རྒྱན་དང་།དུས་འདས་མ་འོངས་པ་ལ་འཇུག་དེ་ཞེས་པ་ལ་སོགས་པ་དེ་དག་མིང་སྔ་མའི་ཤུགས་ཀྱིས་ཚིག་ཕྲད་དང་རྣམ་དབྱེ་སྒྲ་ཕྱི་མ་དག་འདྲེན་པས་སྒྲ་དྲག་ཞན་རྗེས་སུ་མཐུན་པ་དག་གིས་དོན་གསལ་བར་བྱེད་པ་འབྱུང་བ་ཡིན་ནོ།།
དེ་དག་གི་ནང་གསེས་གང་ལ་འཇུག་པ་བཤད་པ།
གསུམ་པ་དེའི་ནང་གསེས་བྱ་བའི་ཚུལ་ནི།བཤད་མ་ཐག་པ་དེ་དག་གིས་ནང་གསེས་གང་ལ་འཇུག་པ།དེས་དེ་དག་ནང་གསེས་རྣམ་པར་དབྱེ་ཞེས་སྦྱར་ཏེ་ཇི་ལྟར་ཞེ་ན།མིང་མཐར་སྦྱར་བའི་ཚིག་ཟླ་བོ་འོག་མའི་མིང་དོན་ལས།དོན་གྱི་ཁྱད་པར་གསལ་བྱེད་ཀྱི་སྒྲ་སྤྱི་འཇུག་ཅེས་པ་སྤྱི་ལ་ཁྱབ་པའི་སྒྲ་གང་ཞེས་པ་ལྟ་བུ་ཡོད་དམ་སྟེ།ཡོད་པར་གྱུར་ན་དེ་ཡིས་དེ་ཞེས་པའི་སྒྲ་འདྲེན་པར་བྱེད་ལ།རྣམ་དབྱེ་གསུམ་པ་བྱེད་པའི་སྒྲ།གིས་གྱིས་ཀྱིས་ལ་སོགས་པ་ཡོད་ན།དེས་བྱས་པའི་སྒྲ་འདྲེན་པ་དང་།དེ་བཞིན་དུ་བཞི་པ་ཆེད་བྱེད་ཀྱི་སྒྲ་དང་།རྟེན་བྱེད་བདུན་པ་གནས་གཞིའི་སྒྲ་དང་།གཉིས་པ་ལས་སུ་བྱ་བ་དང་།བླང་བྱ་སྟེ་ལྔ་བ་འབྱུང་ཁུངས་དང་།བསྒྲུབ་པར་བྱ་བ་དྲུག་པ་འབྲེལ་བ་སྟེ།ཤིང་གི་ཡལ་ག་ཞེས་པར།ཡལ་ག་དེ་ཤིང་གི་ཡིནཔར་བསྒྲུབ་པར་བྱ་བ་ལྟ་བུ་དང་།མིང་དེའི་སྔོན་དུ་བོད་པའི་སྒྲ་ཀྱེ་ཞེས་པ་ལྟ་བུ་གནས་པའམ་གཞན་ཡང་ཚིག་དོན་འོག་མ་ལས་གོང་མའི་ངག་དོན་ལྷག་མ་བསྡུ་རྒྱུ་ཡོད་པ་དཔེར་ན།གཟུགས་ནས་ཞེས་པས་རྣམ་མཁྱེན་ཞེས་པ་སྡུད་པ་དང་།ཕྱག་འཚལ་ནས་ཞེས་པས་བཤད་པར་བྱ་ཞེས་པ་ལྟ་བུ་དང་བསྡུ་རྒྱུ་མེད་པ་འདི་ནི་གཟུགས་སོ།།འདི་ནི་ཚོར་བའོ་ཞེས་པ་ལྟ་བུ་དང་།ཚིག་དོན་གོང་མ་ལས་ཀྱང་ངག་དོན་ཕྱི་མ་དང་བསྡུ་རྒྱུ་ཡོད་པ་སྔ་མ་དེ་བཞིན་ཏེ་ཇི་སྙེད་ཀྱི་དེ་སྙེད་འདྲེན་པའམ།ཇི་སྙེད་ཅེས་པ་དེ་སྙེད་ལ་བསྙེགས་པ་དང་།དེ་བཞིན་དུ།གང་ཕྱིར་དང་དེ་ཕྱིར་ཇི་ལྟར་དང་དེ་ལྟར་གང་དག་དང་དེ་དག་ལ་སོགས་པ་ངག་དོན་ཕན་ཚུན་བསྡུ་རྒྱུ་ཡོད་པ་དང་།རྣམ་གྲངས་དག་གང་གི་བཀོད་པ་ལ།།བསྐྱར་བ་ཡོད་དམ་མེད་པ་ལ།།ཞེས་མིང་གི་རྣམ་གྲངས་ཀྱི་སྒྲ།རྒྱས་པ་དང་།དབྱེ་བ་དང་།གསལ་བ་སོགས་བཀོད་པས།དོན་ལ་བསྐྱར་བ་ཡོད་ཀྱང་ཚིག་ལ་བསྐྱར་བ་མེད་པ་དང་།ཚིག་ལ་བསྐྱར་བ་ལེགས་སོ་ལེགས་སོ་ཞེས་པ་ལ་སོགས་པ་ངོ་མཚར་བ་དང་།དགའ་བ་དང་།སྨད་པ་དང་།བརྩེ་བ་ལ་སོགས་པ་ལ་འཇུག་པ་ཟློས་ཀྱང་ཟློས་པའི་སྐྱོན་མེད་པ་དང་།མེ་ཏོག་གཏོར།རབ་ཏུ་གཏོར།མངོན་པར་རབ་ཏུ་གཏོར་ཞེས་པ་དང།དགའ་ཞིང་མགུ་ལ་རངས་པ་ཞེས་པ་དང་།འུར་འུར་རབ་ཏུ་འུར་འུར་ཀུན་ཏུ་རབ་ཏུ་འུར་འུར་ཞེས་སོགས་ནི།ཆུང་ངུ་དང་འབྲིང་དང་།ཆེན་པོའི་དབྱེ་བས་ཟློས་པའི་སྐྱོན་མེད་པ་ལྟ་བུ་དང་།རྟ་པ་དང་།གསེར་པ་སོགས་ཕོ་སྒྲ་པུ་ལིངྒ་དང་ནི་གཟུགས་མེད་སོགས་དགག་པའི་མོ་སྒྲ་སྟྲཱི་ལིངྒ་དགམིང་གི་མཐའ་ན་ཡོད་མེད་དང་།།ཚིག་རྒྱན་གཉིས་དང་སྡུད་པར་འགྱུར།།ཞེས་པའི་སྐབས་སུ་བཤད་པའི་ཀྱང་དང་འང་དང་།ཉེ་སྒྱུར་སམ་དང་།པ་རི་དང་།བི་དང་།ནི་ར྄་ལ་སོགས་ཚིག་གི་རྒྱན་དུ་གྱུར་པ་རྣམས་ལ་ཡང་དོན་ལ་བསྙེགས་པ་ཡོད་པ།དཔེར་ན།བསུང་ལྡན་རྣམས་ཀྱང་ཡོངས་སུ་རྒྱས།།བུང་བ་ཡང་ནི་དགའ་བ་འཕེལ།།སྐྱེད་མོས་ཚལ་དེའང་ལྷ་གནས་བཞིན།།ཞེས་པ་ལྟ་བུ་རྒྱན་སྡུད་གཉིས་ཀ་ཡིན་པ་དང་།དོན་ལ་བསྙེགས་པ་མེད་པའི་རྒྱན།ཤིན་ཏུ།རབ་ཏུ།ཀུན་ཏུ།རྣམ་པར་ངེས་པར་སོགས་ཀྱི་སྒྲ་ཉིས་འབྲེལ་དང་གསུམ་འབྲེལ་ཅན་ག་ཅིག་ཡིན་ཏེ།དོན་ལ་ལྷག་པར་བསྙེགས་པ་མེད་པ་རྣམས་ནི་ཚིག་གི་ལྷད་ཀྱིས་བསྟན་མི་དགོས་ཀྱིས་དོན་བཞིན་དུ་ཐོགས་ཤིང་།ཞེས་སྒྲ་སྦྱོར་བམ་པོ་གཉིས་པ་ལས་གསུང་ཏེ།དཔེར་ན།ཉོན་མོངས་ཀུན་ལས་རྣམ་གྲོལ་བ།།ཞེས་པའི་སྐད་དོད་ལ།བིནིར྄ཡུཀྟ་རྣམ་པར་ངེས་པར་གྲོལ་བ་ཞེས་པར་ཡོད་ཀྱང་ངེས་པར་ཞེས་པ་རྒྱན་ཡིན་གྱི་དོན་ལ་བསྙེགས་པ་མེད་པ་ལྟ་བུ་དང་།བསྟན་བྱ་ལྷག་མ་ཡོད་པ་སྟེ་དང་དེ་ཏེ་རྣམས་ལྷག་བཅས་ཀྱི་སྒྲ་དང་།ལྷག་མ་མེད་པ་སླར་བསྡུ་རྫོགས་པ་སོགས་ཚིག་དང་།སྐབས་ཀྱི་བརྗོད་བྱའི་ཚིག་དོན་རྫོགས་པ་དང་མ་རྫོགས་པ་སོགས་ཀྱི་རྗེས་འཇུག་དེ་དག་གིས་ནང་གསེས་ཀྱི་བརྗོད་བྱ་ཕྲ་རགས་ཀྱི་འཇུག་བའི་རྣམ་དབྱེ་རྒྱ་ཆེར་རྟོགས་པར་བྱའོ།།
ཅིའི་ཕྱིར་འཇུག་པ་སྤྱིར་བསྟན་པ།
བཞི་པ་ཅི་ཕྱིར་འཇུག་པ་བཤད་པ་ལ།འཕྲོས་དོན་ཡི་གེའི་འཇུག་པ་སྤྱིར་བཤད་པ་དང་།སྐབས་ཀྱི་གཞུང་ལུགས་ཀྱི་ཚིག་འབྲུ་དབྱེ་སྟེ་བཤད་པ་གཉིས་ཀྱི་དང་པོ་འཕྲོས་དོན་ཡི་གེའི་འཇུག་པ་སྤྱིར་བཤད་པ་ནི།
ཡི་གེ་སྤྱིའི་འཇུག་པ་བཤད་པ།
སྤྱིར་ཡི་གེས་དོན་སྟོན་པ་ནི་ཡི་གེ་འཇུག་པའི་གནས་བརྒྱད་ལ་བརྟེན་པ་ཡིན་ཏེ།དེ་དག་ཀྱང་གང་ཞེ་ན།སྒྲ་དང་སྐད།མིང་དང་མཚན་མ།བརྡ་དང་ཐ་སྙད།ཚིག་དང་དོན་རྣམས་སོ།དེ་ལ་སྒྲ་ནི་འདིར་ཟིན་པའི་སྒྲ་སེམས་ཅན་དུ་སྟོན་ཅིང་ལུང་སྟོན་པའོ།།སྐད་ནི་ལེགས་པར་སྦྱར་བ་དང་།རང་བཞིན་དང་།ཟུར་ཆག་དང་།ཤ་ཟའི་སྐད་དེ་བཞི་ལས།གངས་ཅན་པའི་སྐད་ནི་ཟུར་ཆག་ཏུ་འདོད་དེ།སློབ་དཔོན་དཎྜཱིའི་མེ་ལོང་དུ།བ་ལང་རྫི་ལ་སོགས་པའི་ཚིག།སྙན་ངག་ལ་ཟུར་ཆག་ཅེས་གནས།།བསྟན་བཅོས་རྣམ་ལ་ལེགས་སྦྱར་ལས།།གཞན་པ་ཟུར་ཆག་ཉིད་དུ་འདོད།།ཅེས་པའོ།།འོ་ན།ལེགས་སྦྱར་ལ་སོགས་པའི་སྐད་རིགས་བཞི་པོ།འཕགས་ཡུལ་ཁོ་ནའི་མ་ཡིན་ནམ་ཞེ་ན།བདེན་མོད་ཀྱིས།འོན་ཀྱང་ཡི་གེ་འཇུག་པའི་གནས་ཀྱི་སྐད་ལ་ལེགས་སྦྱར་ལ་སོགས་པ་བཞི་ལས་མ་བཤད་པ་དང་།དཎྜཱིའི་ལུང་གི་ལེགས་སྦྱར་ལས་གཞན་པ་ཟུར་ཆག་ཏུ་གྲུབ་པ་དང་།བོད་དང་རྒྱ་ནག་ལ་སོགས་པའི་ཡུལ་ཆེན་པོའི་སྐད་དུ་ཡང་།སྡུད་པ་པོ་རྣམས་ཀྱིས་གསུང་རབ་བསྡུས་པར།འཕགས་པ་འཇིག་རྟེན་དབང་ཕྱུག་གིས་གསུངས་པའི་རིགས་པས།ལེགས་སྦྱར་ལས་གཞན་པའི་ཡུལ་སྣ་ཚོགས་པའི་སྐད་གསུང་རབ་ལ་འཇུག་པའི་སྐད་ཐམས་ངད་ཟུར་ཆག་ཏུ་མངོན་ནོ།།མིང་ནི་ཆོས་རྣམས་ཀྱི་ངོ་བོ་ཉིད་ཀྱི་ཚིག་བླ་དྭགས།ཆོས་མངོན་པའི་ལུགས་ཀྱི་ཡི་གེ་འདུས་པའི་བདག་ཉིད་ཅན་དང་།བརྡ་སྤྲོད་པའི་ལུགས་ཀྱི་རྣམ་དབྱེའི་མཐའ་ཅན།དཔེར་ན།ཀ་བ།བུམ་པ།ས།ཆུ།མེ།རླུང་།བ་ལང་།སེང་གེཞེས་པ་ལྟ་བུ་ལ་སོགས་པ་སྟེ།དེ་ལྟར་བརྗོད་པས་དོན་ལ་བློ་གཞོལ་བར་བྱེད་པས་ནཱམ་སྟེ་མིང་ཞེས་བྱ་ལ།དོན་དེ་མཚོན་པར་བྱེད་ཅིང་སྣང་བར་ནུས་པའི་ཆ་ནས་མཚན་མ་ཞེས་བྱ་སྟེ།མིང་དང་མཚན་མ་ནི་དེ་ལྟ་བུའོ།།དེ་ལ་བརྡ་ནི།མིང་དང་མིང་ཅན་འབྲེལ་བར་བྱེད་པ།སྒྲ་དང་དོན་གྱིས་སྤྱིའི་རྣམ་པ་ཅན་སྨྲ་བར་བྱེད་པའི་དུས་ཅན་གྱི་བདག་ཉིད།དཔེར་ན།ཤིང་ཞེས་པའི་མིང་དེ།མིང་ཅན་ཡལ་ག་ལོ་མ་ཅན་དེའི་རིགས་དང་རྟོགས་པས་གཅིག་ཏུ་སྦྲེལ་བར་བྱེད་དེ།སྨྲ་བ་པོས་ཤིང་ཞེས་བརྗོད་པ་ན།ཉན་པ་པོ་དང་སྨྲ་བ་པོ་གཉིས་ཀའི་རྟགས་ཡུལ་དུ་ཤིང་གི་རྣམ་པ་དོན་སྤྱིར་འཆར་ཞིང་།ངག་དེ་ཐོས་པ་ལས་ཤིང་རང་མཚན་པ་དངོས་ལ་ཐ་སྙད་འདོར་ལེན་བྱེད་པ་ཡིན་ནོ།།ཐ་སྙད་ནི།དངོས་ལ་ཐ་སྙད་མེད་པ།འཇུག་ལྡོག་བྱེད་པའི་ཕྱིར་ནམ་གྱིས་བཏགས་པ་སྟེ།གདུང་འདེགས་ཀྱི་ཤིངལ་ཀ་བ་ཞེས་བཏགས་པ་ལྟ་བུ་དང།འདི་ཡང་བཏགས་པའི་ཤེས་པ་དང་།བརྗོད་པ་དང་འཇུག་པར་བཅས་པ་སྟེ་འདི་ཀ་བ་ཡིན་ནོ་སྙམ་པའི་ཤེས་པ་ནི་བཏགས་པའི་ཤེས་པ་དང་།ཀ་བ་ཞེས་པའི་སྒྲར་བརྗོད་པ་ནི་བརྗོད་པ་དང་།ཀ་བ་ཡིན་པས་ཁང་ཁྱིམ་བྱེད་པར་བརྩོན་པ་ནི་འཇུག་པ་སྟེ།དེ་ལྟར་ན་བརྡ་ནི།དོན་དེ་ལ་ཐ་སྙད་བྱ་བའི་ཕྱིར་ཐོག་མར་མིང་དུ་བཏགས་པ་སྟེ།གོ་བར་བྱེད་པ་དང་སྨྲ་བར་བྱེད་པའི་དུས་ཅན་ནོ།།ཐ་སྙད་ནི་འཇུག་པར་བྱེད་པའི་བདག་ཉིད་ཅན་ནོ།།རིགས་པའི་གཏེར་ལས།ཡལ་ག་ལོ་མ་ལྡན་མཐར་གང་ནས།།དེ་ལ་ཤིང་གི་བརྡ་འདོགས་པ།།བརྡ་དེ་རིགས་ལ་སྦྱོར་བར་བྱེད།།རིགས་དེ་གཞན་སེལ་ལས་གཞན་མིན།།ཞེས་དང་།ཚད་མ་རྣམ་འགྲེལ་ལས།སྒྲ་རྣམས་ཀྱིས་ནི་བརྡར་བཏགས་སྟོན།།དེ་ནི་ཐ་སྙད་ཆེད་དུ་བྱས།།དེ་ཚེ་ངང་གི་མཚན་ཉིད་མེད།།དེས་ན་དེ་ལ་བརྡར་མ་ཡིན།།ཞེས་གསུངས་སོ།།དེས་ན་མིང་དང་།མཚན་མ་དང་།བརྡ་དང་།ཐ་སྙད་དང་།དེའི་དོན་དེའི་ངོ་བོ་ཙམ་བརྗོད་པའི་ཆ་ནས་མིང་དང་།དོན་དེ་མཚོན་པར་བྱེད་པས་མཚན་མ་དང་།ཐ་སྙད་ཀྱི་ཕྱིར་སྔར་མེད་པ་ལ་གློ་བུར་དུ་འདོད་པས་སྦྱར་བ་བརྡ་དང་།དེ་ཉིད་འཇུག་ལྡོག་བྱེད་པའི་ཕྱིར་བརྗོད་པས་ཐ་སྙད་དོ།།ཞེས་བྱའོ།ཚིག་ནི་ཆོས་མངོན་པའི་ལུགས་ཀྱིས།མིང་འདུས་ནས་དོན་གྱི་ཁྱད་པར་བརྗོད་པ་སྟེ།འདུས་བྱས་མི་རྟག་ཅེས་པ་ལ་སོགས་པ་ལྟ་བུའོ།།བརྡ་སྤྲོད་པའི་ལུགས་ཀྱིས།རྣམ་དབྱེ་ཏིང྄་སུཔ྄་གང་རུང་གི་མཐའ་ཅན་དོན་གྱི་ངོ་བོ་དང་ཁྱད་པར་ཅི་རིགས་པ་བརྗོད་པའོ།།དོན་ནི་ཆོས་རྣམས་ཀྱི་གནས་ལུགས་ཇི་ལྟརགནས་པ་ཉིད་དོ།།དེ་ལྟར་སྒྲ་དང་སྐད་ལ་སོགས་པ་བརྒྱད་པོ་དེ་དག་ལ་ཡི་གེ་དག་ཇི་ལྟར་འཇུག་ན་སྒྲ་དང་དོན་གཅིག་ཏུ་བསྲེས་ནས་འཛིན་པའི་བློའི་དབང་གིས་འཇུག་སྟེ།བློ་དེ་སྐྱེ་བ་ལ་ཡང་།བརྡ་བྱེད་པའི་དུས་ན་ཤེས་པ་གཞན་ལས་ཁྱད་པར་དུ་བྱེད་པའི་ཆོས་ལྔ་དང་ལྡན་དགོས་ཏེ།དོན་ལ་དམིགས་པ་དང་།སྒྲ་ལས་བྱུང་བ་དང་།མཐུན་པར་སྣང་བ་དང་།ཐུན་མོང་དུ་གྲགས་པ་དང་།མངོན་པར་ཞེན་པ་རྣམས་སོ།།དེ་དག་སོ་སོའི་ནུས་པ་ཡང་།དོན་ལ་དམིགས་པས་ནི་དོན་སྤྱིའི་ནུས་པ་སྐྱེད་པར་བྱེད་དོ།།སྒྲ་ལས་བྱུང་བས་ནི་སྒྲ་སྤྱིའི་རྣམ་པ་སྐྱེད་པར་བྱེད་དོ།།མཐུན་པར་སྣང་བ་དང་།ཐུན་མོང་དུ་གྲགས་པས་ནི་ཞེན་པ་སྐྱེ་ཞིང་གཞན་ལ་གོ་བར་ནུས་སོ།།མངོན་པར་ཞེན་པས་ནི་མིང་དང་མིང་ཅན་འབྲེལ་བར་བྱེད་དོ།།སྐྱེ་བའི་རིམ་པ་དང་།བརྡ་བྱེ་པའི་དུས་ན།ཕལ་ཆེར་ནི་དང་པོར་གདུང་འདེགས་པའི་ཤིང་མཐོང་བ་ན།འདིའི་མིང་ཅི་ཞེས་ཐ་སྙད་འདོགས་པའི་བློ་སྐྱེ་ལ།དེའི་ཚེ་གཞན་གྱིས་འདི་ཀ་བའོ་ཞེས་བརྗོད་པ་ན་འདི་ཀ་བ་ཡིན་སྙམ་པའི་སྒྲའི་རྣམ་པ་སྐྱེ་ཞིང་ཀ་བ་ཞེས་སྒྲ་རྗོད་པར་བྱེད་དོ།།ཁ་ཅིག་ནི་དངོས་པོ་ཀ་བ་ཞེས་པའི་སྒྲ་ཙམ་ཐོས་ནས།འདི་གང་གི་མིང་ཡིན་པ་འཚོལ་བའི་བློ་སྐྱེ་ལ།དེའི་ཚེ་སྨྲ་བ་པོ་གཞན་གྱིས་ཀ་བ་ཞེས་བསྟན་པ་ནི་མིང་ཅན་དང་འབྲེལ་བའི་ཤེས་པ་སྐྱེའོ།།མངོན་པར་ཞེན་པ་གསུམ་པ་ནི།དང་པོ་དོན་མངོན་སུམ་དུ་གྱུར་ནས།དེ་ནས་ཕྱིས་དོན་དང་འདྲ་བའི་མིང་ཅན་གྱི་ཤེས་པ་སྐྱེ་བ་ན་རྣམ་པ་དེ་ཉིད་ལ་དོན་དེ་ཉིད་དུ་མངོན་པར་ཞེན་པ་སྐྱེའོ།།དེ་ནས་མིང་གི་ཐ་སྙད་བཏགས་པ་ན་སྒྲའི་རྣམ་པ་ཡི་གེའི་རྣམ་པའི་བདག་ཉིད་དུ་མངོན་པར་ཞེན་པ་སྐྱེའོ།།དེ་ནས་སྒྲའི་རང་གི་མཚན་ཉིད་བརྗོད་པ་ན།རང་གི་མཚན་ཉིད་ལ་རྣམ་པ་དེ་ཉིད་དུ་མངོན་པར་ཞེན་པ་སྐྱེ་སྟེ།དེ་ལྟར་ཞེན་པའི་དབང་གིས་མིང་དང་མིང་ཅན་འབྲེལ་བར་བྱེད་དོ།།ཞེན་པ་གསུམ་པ་འདི་ལ་མངོན་པར་ཞེན་པས་ནི་སྨྲ་བ་པོ་རྣམས་དོན་སྟོན་པ་ལ་སྒྲ་སྨྲ་བར་བྱེད་པའང་ཡིན་ལ།ཉན་པ་པོ་བརྡ་ལ་བྱ་བ་དག་སྒྲ་ཡི་དོན་ཁོངས་སུ་ཆུད་པར་བྱེད་པའང་ཡིན་ནོ།།ཞེན་པ་བཞི་པ་ནི་གང་ཟག་བླུན་པོ་བསྟན་བཅོས་ལ་བློ་མ་བྱང་བ།སློབ་མར་ཞུགས་པ་དག་ཡི་གེ་སྟོན་པའི་གཟུགས་ལ་ཡི་གེ་ཉིད་དུ་འཛིན་ཏེ།དེའི་དབང་གིས་ཡི་གེའི་རྣམ་པ་རྣམ་པར་རྟོག་པ་དང་བཅས་པའི་ཤེས་པ་ལ་ནི་གསལ་བར་སྣང་བ།སྒྲ་སྤྱིའི་རྣམ་པའང་ཡི་གེ་གཟུགས་ཀྱི་རྣམ་པར་ཡིད་ལ་བྱེད་པར་འགྱུར་ཏེ།གླེགས་བམ་བྲིས་པ་ལ་བརྗོད་པའི་ཡུལ་བྱེད་པ་ཡིན་ནོ།།སྨྲ་བ་པོ་དང་ཉན་པ་པོ་བརྡ་ལ་བྱང་བ་དག་ལ་སྒྲ་ལས་བྱུང་བའི་ཤེས་པ་སྐྱེ་བའི་ཚུལ་ནི།སྨྲ་བ་པོ་དག་སྒྲ་བརྗོད་པ་ནི་སྔོན་བརྡ་བྱེད་པའི་དུས་སུ་ཡན་ལག་ལྔ་ཚུལ་བཞིན་འདྲིས་པར་བྱས་པས།ཕྱིས་ཐ་སྙད་བྱེད་པ་ན་ཚུལ་དེ་འབད་པ་མེད་པར་འབྱུང་སྟེ།འདི་ལྟར་དོན་གྱི་དངོས་པོ་ཉེ་ཡང་རུང་རིང་ཡང་རུང་།དོན་དང་ཡདྲ་བ་དོན་ཉིད་དུ་ཤེས་པའི་རྣམ་པ་གཉིས་མངོན་སུམ་དུ་བྱས་ཏེ།སྒྲའི་རྣམ་པར་ཞེན་པ་ལས་སྒྲ་རང་གི་མཚན་ཉིད་ཉིད་ཀྱི་རྐྱེན་གཞན་དག་ལའང་བརྟེན་ཏེ་སྒྲ་རྗོད་པར་བྱེད་དོ།།ཉན་པ་པོ་དག་ཀྱང་སྔོན་བརྡའི་དུས་ན་གོམས་པས་ད་ལྟ་སྒྲ་ཐོས་པ་ན་སྒྲའི་མཐུས་སྒྲ་ཙམ་གྱིས་རྣམ་པ་སྐྱེས་པ་ལ།སྔོན་སྒྲའི་རྣམ་པ་ལ་དོན་གྱིས་རྣམ་པར་ཞེན་པ་དེའི་དབང་གིས་དེ་ནི་འདི་ཡིན་ནོ་སྙམ་དུ་སྔོན་བརྡའི་དུས་དང་གཅིག་ཏུ་བསྲེས་ནས་དོན་གྱི་རྣམ་པར་རྟོག་གོ།སྔོན་གྱི་ཡུལ་ལ་དམིགས་པ་ད་ལྟར་གྱི་ཡུལ་ར་དམིགས་པ་གཉིས་རྟོག་བཅས་ཀྱི་ཤེས་པས་གཅིག་ཏུ་བསྲེས་པའི་ཕྱིར་མཐུན་པར་སྣང་བའི་ཡན་ལག་དགོས་སོ།།སྔོན་གྱི་སྒྲའི་རྣམ་པའང་དེ་བཞིན་དུ་བསྲེ་དགོས་པས་ཐུན་མོང་དུ་གྲགས་པའི་ཡན་ལག་དགོས་སོ།།འོ་ན་བསྲེས་པས་ཅི་ཞིག་བྱེད་ཅེ་ན།མ་བསྲེས་ན་སྔོན་གྱི་དོན་ཡང་གཞན་ཡིན་ལ།ད་ལྟར་གྱི་དོན་ཡང་གཞན་ཡིན་པས།སྔོན་གྱི་དོན་ལ་བརྗོད་པའི་སྒྲས་ད་ལྟར་གྱི་དོན་ལ་འཇུག་མི་ནུས་ཏེ་བརྡ་ཤེས་པ་ཙམ་ལ་དོན་དགག་པ་བརྗོད་པས་དོན་མེད་པར་འགྱུར་རོ།།སྒྲ་ཡང་དེ་བཞིན་ཏེ།ད་ལྟར་གྱི་སྒྲ་སྔོན་མ་ཡིན་པས་དོན་ལ་འཇུག་མི་ནུས་པ་སྟེ།དེའི་ཕྱིར་གཅིག་ཏུ་བསྲེས་པས་སྒྲའི་དོན་གོ་བར་བྱེད་པའི་ནུས་པ་ཡོད་པ་ཡིན་ནོ།།ཡན་ལག་དེ་དག་གི་ངོ་བོ་ཡང་དོན་ལ་དམིགས་པ་ནི།སྔར་དབང་པོ་དང་ཤེས་པ་དོན་དང་ཕྲད་པ་ན་དོན་མཐོང་བ་ལྗོན་ཤིང་ལྟ་བུ་དང་།ཕྱིས་དེའི་རྣམ་པ་སྣང་བ་ལ།ཁ་དོག་དང་དབྱིབས་དང་བྱ་བ་བྱེད་པའི་ནུས་པ་དག་ལ་ཞེན་པའི་སྒོ་ནས་དོན་ལ་དམིགས་པ་འཆར་བ་ཡིན་ནོ།།སྒྲ་ལས་བྱུང་བ་ནི།ཐུན་མོང་དུ་གྲགས་པའི་སྒྲ་ལས་བྱུང་བ་སྟེ།ཐུན་མོང་དུ་མ་གྲགས་པའི་སྒྲ་དབུས་པས་མཐའ་འཁོབ་པའི་སྒྲ་ཐོས་པ་ལས་བྱུང་བ་ལྟ་བུ་ནི་ཡན་ལག་ཉམས་པའི་རྒྱུ་ཡིན་ནོ།།མཐུན་པར་སྣང་བ་ནི་ཀ་བའི་ཁ་དོག་དང་དབྱིབས་དང་བྱ་བ་བྱེད་པའི་ནུས་པ་དག་བརྡ་སློབ་པའི་ཤེས་པ་ལ་ཇི་ལྟར་སྣང་བ་དེ་ལྟར་བརྡ་སྟོན་པ་པོ་དང་གཞན་དག་ལ་ཡང་དེ་ལྟར་སྣང་བ་ཡིན་ཏེ།འདིས་དམིགས་པ་མཐུན་པར་སྣང་བ་ཡིན་ནོ།།ཐུན་མོང་དུ་གྲགས་པ་ནི་བརྡ་སྟོན་པ་པོའི་སྒྲ་གཞན་དག་དང་ཐུན་མོང་དུ་གྲགས་པ་སྟེ་སྒྲ་སྤྱིའི་རྣམ་པའང་དེ་ཉིད་དོ།།མངོན་པར་ཞེན་པ་ནི་བཤད་ཟིན་ཏོ།།ཡི་གེ་འཇུག་པའི་གནས་བརྒྱད་པོ་དེ་དག་སྔོན་གྱི་མཁས་པ་ཆེན་པོ་དག་གིས་གནས་བརྒྱད་བཤད་པའི་རྗེས་སུ་འབྲངས་ཏེ་ཅུང་ཟད་བཤད་པའོ།།
སྐབས་ཀྱི་གཞུང་དོན་དངོས་བཤད་པ།
གཉིས་པ་སྐབས་ཀྱི་གཞུང་ལུགས་ཀྱི་ཚིག་འབྲུ་དབྱེ་སྟེ་བཤད་པ་ནི།ལེགས་པར་སྦྱར་བའི་སྐད་དུ་ཡ་།ཁམས་དང་རྐྱེན་གྱིས་འཇུག་པ་མཐའ་ཡས་པ་བསྟན་བཅོས་རྒྱ་ཆེན་པོས་རྟོགས་པར་བྱ་དགོས་པ་ཡོད་ནའང་།གངས་ཅན་གྱི་སྐད་འདི་ལ་རྗེས་འཇུག་གི་ཡི་གེ་བཅུས་བསྡུས་ཏེ་གཞུང་ཉུང་ངུས་ཤེས་སླ་བར་མཛད་པ་ནི་རྗེ་བཙུན་འཇམ་པའི་དབྱངས་ཀྱི་རྣམ་སྤྲུལ་མཁན་པོ་ཆེན་པོ་འདིའི་ཕུལ་དུ་བྱུང་བའི་རྣམ་པར་ཐར་བ་ཉིད་ཡིན་པས།རྒྱ་གར་གྱི་མཁན་པོ་དག་གིས་བསྔགས་པ་མཛད་པར་གྲག་གོ།དེ་ནས་རྗེས་འཇུག་བཅུའི་དོན་སྟོན་བྱེད་ཀྱི་གཙོ་བོ་བསྟན་པ་ནི།རྗེས་འཇུག་རྣམས་ཅི་ཕྱིར་འཇུག་པར་བྱེད་ཅེ་ན་ཞེས་མཚམས་སྦྱར་ནས།མིང་དང་ཚིག་གི་དོན་གསལ་བར་བྱེད་པ་ནི།སྤྱིར་མོ་ཡིག་དང་།ཁྱད་པར་སྔོན་འཇུག་དང་རྗེས་འཇུག་གི་ཡི་གེ་ལ་རག་ལས་སོ་ཞེས་སྟོན་པ་སྟེ།ཚུལ་ཇི་ལྟར་ན།ཡི་གེའི་ཁོངས་ནས་ཏེ་ཡི་གེ་གཉིས་སམ་དུ་མ་འདུས་པ་ལས་མིང་ཀ་བ་ཞེས་སོགས་བྱུང་སྟེ་མིང་གི་ཁོངས་ནས་ཏེ་མིང་གཉིས་སམ་གསུམ་འདུས་པ་ལས་ཚིགའདུས་བྱས་མི་རྟགཟག་བཅས་སྡུག་བསྔལ་སོགས་དང་ཙན་དན་གྱི་ཀ་བ་གསེར་གྱི་བུམ་པ་ཞེས་སོགས་བྱུང་སྟེ།ཚིག་གི་དོན་རྣམ་པར་སྟོན་པར་བྱེད་པ་ནི།དཔེར་ན།ཙན་དན་གྱི་ཀ་བས་བཏེག་པའི་ཁང་བཟང་གི་རྟ་བབས་སྟེང་ན་གསེར་གྱི་བུམ་པ་དག་བཀོད་པ།ཞེས་སོགས་ཀྱི་ངག་ཏུ་གྲུབ་པ་ནི་རྗེས་འཇུག་མོ་ཡིག་ལ་རག་ལས་པ་ཉིད་ཀྱི་ཕྱིར་མོའི་ཡི་གེ་མེད་པར་གྱུར་པ་ན་ཕོ་ཡིག་རྣམས་ལ་དོན་སྟོན་པའི་ངག་བརྗོད་པར་འགྱུར་ལ།ཕོ་ཡིག་དེ་དག་རྣམས་ལ་ཡང་འཇུག་པར་བཅས་པ་སྟེ།སྔོན་འཇུག་དང་རྗེས་འཇུག་དག་མེད་ན་ནི།དོན་གྱི་ངོ་བོ་ཙམ་བརྗོད་པའི་མིང་དང་ཁྱད་པར་བརྗོད་པའི་ཚིག་ཀྱང་གསལ་བྱེད་མི་ནུས་ཤིང་།མིང་ཚིག་གསལ་བར་གྱུར་པ་མེད་ན་ནི།འཇིག་རྟེན་དུ་དོན་རྣམ་པར་བརྗོད་པའི་ངག་ཡོད་པར་མི་འགྱུར་རོ།།དེ་ལྟར་གྱུར་ན་འཇིག་རྟེན་དུ་ཐ་མལ་པ་གྲུབ་མཐའ་ལ་མ་ཞུགས་པ་རྣམས་ཀྱི་དོན་མཚོན་པའི་བརྗོད་པ་ཀུན་ཀྱང་མེད་པར་འགྱུར་ལ།གང་ཟག་གྲུབ་མཐའ་ལ་ཞུགས་པ་ལའང་ཕྱི་ནང་གཉིས་ལས།ཕྱི་རོལ་མུ་སྟེགས་ཀྱི་བསྟན་བཅོས་རིག་བྱེད་བཞི་སྨྲ་བའང་ཡོད་པར་མི་འགྱུར་ཞིང་།ནང་པ་སངས་རྒྱས་པའི་ཉན་ཐོས་དང་།རང་རྒྱལ་དང་།སངས་རྒྱས་ཀྱི་བསླབ་པ་བརྗོད་པའི་གཞུང་རྣམས་ཀྱང་མེད་པར་འགྱུར་རོ།།དཔེར་ན།ཇི་ལྟར་འཇིག་རྟེན་ན་གནས་པའི་སེམས་ཅན་རྣམས་ལ་ཕུང་པོ་དང་།ཁམས་དང་།སྐྱེ་མཆེད་དང་།གྲུབ་མཐའ་མཆོག་དམན་ལ་སོགས་པ་ཁྱད་པར་གཞན་ཡང་ཡོད་མོད་ནའང་།འདི་དང་འདིའོ་ཞེས་བརྡ་མ་སྤྲད་པར་ཐོག་མ་ནས་རང་ཉིད་ཀྱིས་ནི་མི་ཤེས་པ་བཞིན་ནོ།།དེ་བཞིན་དུ་ཡི་གེའི་འཇུག་ཚུལ་རྣམས་སྨྲ་བ་ཀུན་ལ་གནས་པར་གྱུར་ཀྱང་།བརྡ་མ་སྤྲད་པར་ཚིག་རང་གི་གནས་ཚུལ་དེ་ཉིད་ཇི་ལྟ་བ་བཞིན་མ་ཤེས་པས་ཚིག་འདིས་དོན་འདི་སྟོན་ནོ་ཞེས་པ་རྣམ་པར་དབྱེ་བ་མ་འདྲེས་པར་དོན་ལ་སྦྱོར་བ་ག་ལ་ཤེས།རྒྱུ་མཚན་དེའི་ཕྱིར་སྨྲ་བའི་དབང་ཕྱུག་གི་རྗེས་སུ་འབྲང་སྟེ་ཐོན་མི་སམྦྷོ་ཊ་བདག་གིས་སྨྲས་པ་འདི་གངས་ཅན་སྐྱེ་བོ་ཀུན་གྱི་རྟོགས་པར་གྱུར་ཅིག་ཅེས་པའོ།།བྱཱ་ཀ་རཱ་ཎའི་རྟགས་ཀྱི་འཇུག་པ་ཞེས་བྱ་བའི་བསྟན་བཅོས་སློབ་དཔོན་ཨ་ནུས་མཛད་པའི་རྣམ་པར་བཤད་པ་རྫོགས་སོ།།འདི་ནི་མཁྱེན་རབ་ཐུག་རྗེ་ཚད་མེད་པ་མངའ་བའི་རྡོ་རྗེ་སློབ་དཔོན་ཆེན་པོ་དཔལ་ཀུན་བཟང་བརྩེ་པའི་ཞལ་སྔ་ནས་གཞུང་འདི་དག་བོད་སྐད་ཀྱི་རྩ་བ་ཁུངས་མར་འདུག་པས་ཤིན་ཏུ་གསལ་བར་གྱིས་ཞེས་བཀའ་གནང་བ་དང་།དོན་དུ་གཉེར་བའི་བློ་གསལ་བ་པཎྱཤྲཱིས་ཡང་ཡང་བསྐུལ་བ་ལ་བརྟེན་ནས།བརྡ་སྤྲོད་པའི་གཙུག་ལག་ཆ་ཤས་རིག་པ་འགོས་ལོ་ཙཱ་བ་དྷརྨ་པཱ་ལ་བྷ་དྲ་ཞེས་བགྱི་པས་སྦྱར་བའོ།།ཞེས་པ་བསིལ་ལྡན་ལྗོངས་ཀྱི་བསྟན་པའི་སྲོལ་འབྱེད་ཆེན་པོ་ཐོན་མི་སམྦྷོ་ཊས་མཛད་པའི་སུམ་རྟགས་རྩ་འགྲེལ་འདི་ཉིད་འབྲི་ཀློག་མཐའ་དག་ལ་མེད་དུ་མི་རུང་བ་ལྟ་བུའི་ངེས་པ་རྙེད་ནས་སྡེ་དགེ་ལྷུན་གྲུབ་སྟེང་དུ་སྡེ་དགེ་གདན་ས་པ་སངས་རྒྱས་བསྟན་པས་རབ་བྱུང་བཅུ་གཉིས་པའི་ཉི་སྒྲོལ་བྱེད་པ་ཤིང་སྤྲེལ་ལོའི་ས་ག་ཅན་གྱི་ཟླ་བའི་དཀར་ཚེས་ལ་ཆོས་སྦྱིན་མི་ཟད་པའི་རྒྱུན་སྤེལ་བའི་དགེ་བས་ལུང་རྟོགས་དམ་པའི་ཆོས་ཀྱི་ཚིག་དོན་འཁྲུལ་མེད་དར་ཞིང་རྒྱས་པའི་རྩ་ལག་ཏུ་གྱུར་ཅིག།།།
