ཁྱེད་གྲགས་ཅན་ཡིན་པའི་ང་རྒྱལ་ཡོད་ན་འདི་ཀློགས།

ཁྱེད་ཉིད་གལ་ཏེ་སྐད་གྲགས་ཤིག་གི་ཆེད་སློབ་སྦྱོང་བྱེད་པ་དང་ལས་ཀ་བྱེད་བཞིན་ཡོད་ཚེ། རང་གི་མི་ཚེའི་ཚེ་ཚད་དང་ཁོར་ཡུག་སོགས་ཀུན་ལ་སྔ་བལྟས་ཕྱི་བལྟས་ཤིག་ངེས་པར་དུ་བྱེད་དགོས་ལ། ཁྱེད་ཉིད་སྤྱི་ཚོགས་ཆུང་ཆུང་ཞིག་གི་ནང་ཐལ་བའི་སྐད་གྲགས་ཡོད་པ་དང་། རྩོམ་རྩལ་གྱི་མིང་གྲགས་ཡོད་པ་དེས་རང་ཉིད་གྲགས་ཅན་ཞིག་ཡིན་ནམ་ཡང་བསམ་མི་ཉན། ཁྱེད་ཀྱི་སྐད་གྲགས་དེ་འཛམ་གླིང་ནང་བརྒྱ་ཆ་གཅིག་ཕར་ཞོག ཚེག་༡ཙམ་ཡང་ཟིན་ཐུབ་མེད།

མི་བདེན་བསམ་ན། རང་ཉིད་ཀྱི་ཁོར་ཡུག་ཆུང་ཆུང་དེའི་ཕ་རོལ་ན་ཕེབས་ཏེ། རང་གི་མིང་ཤེས་མཁན་ཇི་ཙམ་འདུག་གཟིགས་དང་། གཅིག་ཀྱང་མེད་ངེས་རེད་ལ། འཛམ་གླིང་མཁས་པ་ཚོགས་སར་བཅར་ཏེ། ཁྱེད་ཀྱི་མིང་དང་གྲགས་པ་ཐོས་མྱོང་མཁན་ཇི་ཙམ་འདུག་གཟིགས་དང་། ཚང་མས་མགོ་གཡུག་གཡུག་བྱས་སོང་ན། དེ་ཁྱེད་ཀྱི་གཟི་བརྗིད་དུ་རྩི་དགོས། གང་ཡིན་ཞེ་ན། ཁོང་ཚོས་རང་ལ་ལན་ཙམ་ཞིག་གནང་བས་སོ།

དེས་ན། ང་ཆུང་ཆུང་ཡིན་དུས། ང་སྐད་གྲགས་ལ་དགའ་ཞིང་། མཚན་སྙན་གྲགས་ཀྱི་ཆེད་དུ་གང་ཡང་བྱེད་དགོས་བསམ་པའི་སྙིང་སྟོབས་རྫུན་མ་ཞིག་ཡོད་ལ། དེའི་ཆེད་དུ་རང་གིས་མང་པོ་ཞིག་བློས་བཏང་བྱས་ཏེ། སློབ་སྦྱོང་བྱས་ཁུལ་ཡིན། དེ་ཡང་རང་ཉིད་ཀྱི་ཁོར་ཡུག་ཆུང་ཆུང་དེའི་ནང་རྡོ་འབུར་འབུར་ཞིག་བྱེད་དགོས་བསམ་པ་དེ་ལས་རིང་བ་དང་ཟབ་པའི་དམིགས་ཡུལ་དང་རེ་བ་གང་ཡང་མེད། རྒྱུ་མཚན་ནི། རང་གི་ཁོར་ཡུག་ཆུང་ཆུང་དེ་ནི་འཛམ་བུ་གླིང་དང་དོན་གཅིག་ཁྱབ་པ་སྒོ་བརྒྱད་ཡིན་བསམ་པ་དེ་་རེད།

འདི་ལྟ་བུའི་འདུ་ཤེས་འཛིན་མཁན་ནི་ཁོ་བོ་གཅིག་པུ་མིན་པར་མི་བུ་མང་དག་ཅིག་ཡོད་ངེས་རེད། ང་ཚོས་མཚམས་རེར་ཕྱི་རོལ་ན་དོན་ཏེ་རང་གི་ཁོར་ཡུག་ལ་ཕྱི་བལྟས་ཤིག་སློག་ན་རང་གི་ཐུན་མོང་མ་ཡིནཔའི་གཟི་བརྗིད་མང་པོ་ཞིག་མཐོང་ཐུབ་ལ། དེ་དང་མཉམ་དུ་རང་ཉིད་ཅི་ཞིག་ཡིན་མིན་དང་གང་ཞིག་ཏུ་ལྷག་ཡོད་མེད་ཀྱང་རང་བཞིན་གྱིས་ཤེས་ཡོང་།
དེ་དུས། ཁོར་ཡུག་ཆུང་ཆུང་དེའི་ནང་མིང་གྲགས་དང་རང་མཐོང་གི་འདུ་ཤེས་དེ་རང་བཞིན་གྱིས་རླག་འགྲོ་ལ། དེ་དང་མཉམ་དུ་མཐུན་མོང་མ་ཡིན་པའི་སློབ་གཉེར་དང་ཤེས་ཡོན་དེའི་རིན་ཐང་ཡང་མཉམ་དུ་ཚོར་ཡོང་།

དེས་ན། ཁོར་ཡུག་ཆུང་ཆུང་དེའི་ནང་མིང་གྲགས་ཀྱི་ཆེད་དུ་སློབ་གཉེར་གནང་མི་རུང་ཞིང་། གནང་ནའང་ཕན་ཐོགས་མེད། ཕན་མ་ཐོགས་པ་ཙམ་དུ་མ་ཟད། སྙིང་པོ་གང་ཡང་མེད། དེས་ན། སུས་ཀྱང་འགྲན་དུ་མེད་པའི་སློབ་གཉེར་ལམ་ལུགས་དེ་བཟུང་ཞིང་། ཕྱི་མ་ལ་ཕན་པའི་སློབ་སྦྱོང་ཞིག་བྱེད་ཨེ་ཐུབ་ལྟ་དགོས་ལ། དེ་ལྟར་མ་བྱུང་། རང་གི་སེམས་ཀྱི་འཚར་ལོང་ལ་ཕན་པའི་སློབ་གཉེར་ཞིག་བྱེད་ཨེ་ཐུབ་མ་ལྟ་ན། མི་ཚེ་འདི་སྟོང་པ་རེད་ལ། སྟོང་པ་སྟོང་རྐྱང་རེད། གང་ཡིན་ཞེ་ན། ཁོར་ཡུག་ཆུང་ཆུང་དེའི་ནང་གི་སྐད་གྲགས་ནི་ངོ་མ་དགད་མོ་བྲོ་རྒྱུ་ལས་མི་འདུག

༢༠༡༤། ༡། ༢༦ ཉིན་སྦེལ་ཀོབ་གྲོང་ནས།