ཧ་རྩོམ་ཐོལ་བྱུང་མ།
འབྲི་གུང་ཚེ་བརྟན་རྡོ་རྗེ།
ཨ་ཁུ་ཆོས་རྒྱལ་ཕོ་ཉས་མ་འཁྲིད་པར།།
ཧ་ཧ་གད་མོ་དགོད་བཞིན་དྲ་ཐོགས་སུ།།
ཨ་མཚར་ཡི་གེའི་ཕོ་ཉ་མངགས་པའི་གྲོགས།།
ཧ་ཅང་བདེ་བར་མཇལ་བས་སེམས་པ་དགའ།།
བེ་རི་དཔལ་ལྡན་རྣམ་རྒྱལ།
ཧ་ཧ་རྒོད་པའི་ང་ཡི་དྲ་གྲོགས་ཚོ།།
ཧ་ཅང་ལྐུགས་པའི་བན་ཆུང་ཁོ་བོ་ཡང་།།
ཧ་ལོ་སྐད་ཡིག་སྐབས་ཤིག་རྒྱབ་བསྐྱུར་ནས།།
ཧ་ཧ་ཟེར་བཞིན་འདི་ན་སླེབས་ཡོད་ལགས།།
འབྲི་གུང་ཚེ་བརྟན་རྡོ་རྗེ།
ཧ་ཅང་མང་དུ་དགོད་ཀྱང་དགེ་མཚན་མེད།།
ཧ་ལམ་མཛུམས་མདངས་བྲལ་ཡང་ཡག་པོ་མེད།།
ཧ་ཅང་རན་པའི་གད་མོའི་དགོད་སྒྲ་ལས།།
ཧ་ལམ་སྲིད་ན་བྲལ་བའི་ལེགས་བཤད་གསུངས།།
བེ་རི་དཔལ་ལྡན་རྣམ་རྒྱལ།
ཧ་ཧ་རྒོད་ན་འཕྲོད་བསྟེན་ཆེ་རབས་ཟེར།།
ཧ་ཅང་སྐྱིད་ན་ཧ་ཧ་ཤོར་ནས་འགྲོ།།
ཧ་ཧ་ཁ་ལས་རྒོད་དེ་ཁོག་པ་ལ།།
ཧ་ཅང་སྡུག་བསྔལ་ཆཻ་ན་ཕན་ཐོགས་མེད།།
འབྲི་གུང་ཚེ་བརྟན་རྡོ་རྗེ།
ཧ་ཧ་དགོད་རྗེས་ཧུའུ་ཧུའུ་སྨྲེ་ངག་ཡོད།།
ཧ་ལམ་འཕྲོད་བརྟེན་ཕྱོགས་ལ་ཕན་སྲིད་ཀྱང་།།
ཧ་ཧ་གད་མོ་རྟ་སྐད་མ་དགོད་ཞེས།།
ཧ་ཅང་འདུལ་བའི་ནང་ནས་གསལ་གསུངས་ཟེར།།
བེ་རི་དཔལ་ལྡན་རྣམ་རྒྱལ།
ཧ་ལོ་ཧ་ལོ་ཟེར་ནས་ཨིན་མོ་ཐུག།
ཧ་ལམ་སྡོམ་པ་དེ་ཡང་ཤོར་གྲབས་ཡིན།།
ཧ་ཅང་གསང་བ་ཡིནཔའི་ནོར་བུ་དེ།།
ཧ་ལོ་དེ་ཚོར་ནམ་ཡང་སྤྲོད་ཐབས་མེད།།
འབྲི་གུང་ཚེ་བརྟན་རྡོ་རྗེ།
ཧ་ཅང་ཉག་ཕྲའི་དུས་སྐབས་སུ།།
ཧ་ལོའི་སྐད་ཡིག་ཤིན་ཏུ་འཁོ།།
ཧ་ལམ་ཙམ་ལས་སྡོམ་པ་ལས།།
ཧ་ཅང་གཅེས་པར་འཛིན་མཁན་དཀོན།།
བེ་རི་དཔལ་ལྡན་རྣམ་རྒྱལ།
ཧ་ཧ་མ་རྒོད་སྤྱོད་འཇུག་གཞུང་ལས་གསུངས།།
ཧ་ཅང་མཉམ་ཆུང་ཡིན་ན་མ་གཏོགསཔ།།
ཧ་ཅང་དཀའ་བའི་འདུལ་བའི་ཁྲིམས་ཤིང་འོག།།
ཧ་ལམ་འཛུལ་ཐབས་མི་འདུག་གྲོགས་པོ་ལགས།།
འབྲི་གུང་ཚེ་བརྟན་རྡོ་རྗེ།
ཧ་ཅང་མཛུལ་བར་ཐལ་ཞེས་སྨྲེ་ངག་ལས།།
ཧ་ལམ་མི་ཚེ་དུས་ཐུང་འདི་ཉིད་ནང་།།
ཧ་ཅང་ཡོངས་རྫོགས་མེད་ཀྱང་རྩ་བ་བཞི།།
ཧ་ཅང་གཙིགས་སུ་འཛིན་དང་ཆོས་གྲོགས་ལགས།།
བེ་རི་དཔལ་ལྡན་རྣམ་རྒྱལ།
ཧ་ཅང་ཆུང་ངུའི་དུས་ནས་སློབ་གྲྭ་རུ།།
ཧ་ལོ་ཧ་ལོ་ཟེར་ནས་སྦྱངས་མྱོང་ཡོད།།
ཧ་ལོའི་མེ་ཏོག་འདྲ་བའི་སྡོམ་པ་དེ།།
ཧ་ལོ་ཧ་ལོ་ཟེར་ནས་ཤོར་ཡོང་དྲན།།
བེ་རི་དཔལ་ལྡན་རྣམ་རྒྱལ།
ཧ་ཅང་འཁྲུག་འཛིང་ཆཻ་བའི་ཁོར་ཡུག་ནང་།།
ཧ་ཅང་དཀའ་མོའི་ཁྲིམས་དེ་ཐེག་པར་དཀའ།།
ཧ་ཅང་མཛེས་པའི་བུ་མོའི་བཞིན་མཐོང་ན།།
ཧ་ལམ་རང་དབང་ཟེར་བ་མི་འདུག་ད།།།
འབྲི་གུང་ཚེ་བརྟན་རྡོ་རྗེ།
ཧ་ལམ་ཉིན་མཚན་མེད་པར་དྲ་ཐོག་ནས།།
ཧ་ལས་ཧོན་ཐོར་གནས་ཚུལ་མང་བལྟས་ཐར།།
ཧ་ཧ་དགོད་པའི་གད་མོ་མ་ཡིན་པར།།
ཧ་ལམ་མིག་ཆུའི་ཕྲེང་བ་ཆད་མཚམས་བྲལ།།
ཧ་ཅང་རྒྱག་ན་ཡིད་ལ་འཆར་སྒོས་འཁེངས།།
ཧ་ཅང་ལྟོགས་ན་ཟ་འདོད་མེ་ལྟར་འབར།།
ཧ་ལམ་བཀྲེས་ལྟོགས་གཉིས་ཀྱི་གནད་དོན་འདིས།།
ཧ་ཅང་མི་བུའི་དཀའ་ངལ་སྣ་ཚོགས་བཟོས།།
བེ་རི་དཔལ་ལྡན་རྣམ་རྒྱལ།
ཧ་ལམ་དུས་ཚོད་གང་རག་ཐམས་ཅད་ལ།།
ཧ་ལོ་ཟེར་ནས་དྲ་ཐོག་ཡོང་གི་ཡོད།།
ཧ་ཅང་སྡུག་དུས་སྐྱོ་གྲོགས་ཁྱེད་རྣམས་དང།།
ཧ་ཅང་སྐྱིད་དུས་སྐྱིད་རོགས་ཁྱེད་རྣམས་རེད།།
འབྲི་གུང་ཚེ་བརྟན་རྡོ་རྗེ།
ཧ་རིའི་ལྗོན་པ་དྲི་ལྡན་མཆོག་ཡིན་ཟེར།།
ཧ་ལོའི་མེ་ཏོག་གསེར་བུམ་རྒྱན་མིན་ཟེར།།
ཧ་ཅང་རང་སྣང་གང་དགའི་ལུགས་སྲོལ་ལས།།
ཧ་ཅང་ཆོས་ཉིད་དོན་མཐུན་དཀོན་པར་སྣང་།།
བེ་རི་དཔལ་ལྡན་རྣམ་རྒྱལ།
ཧ་ཅང་རྒྱག་ན་བུ་མོས་མིག་ལོག་བལྟ།།
ཧ་ཅང་སྐམ་ན་སློབ་གཉེར་བྱེད་ཐབས་བྲལ།།
ཧ་ཅང་ཧེ་བག་ཆེ་བའི་འཛམ་གླིང་ནང་།།
ཧ་ལམ་བུ་མོ་མ་རག་ཐག་ཆོད་རེད།།
འབྲི་གུང་ཚེ་བརྟན་རྡོ་རྗེ།
ཧ་ཤང་ལྟ་བ་དུག་གི་སྡོང་པོ་ཟེར།།
ཧ་ལམ་རྣ་བར་གོ་ཡང་མི་མཆོག་ཟེར།།
ཧ་ལས་ཧོན་ཐོར་བོད་པའི་ལུགས་སྲོལ་ཟེར།།
ཧ་ལམ་ཀུན་གྱི་མཐུན་སྣང་གཅིག་མཚུངས་འདྲ།།
ཁམས་བཟང་བསོད་དབང་ལགས།
བེ་རི་དཔལ་ལྡན་རྣམ་རྒྱལ།
ཧ་ཅང་ཐུང་ཐུང་ཡིན་པའི་མི་ཚེའི་ནང་།།
ཧ་ཅང་མཛེས་པའི་བུ་མོ་ཞིག་དང་ལྷན།།
ཧ་ཅང་དྲོ་སྐྱིད་ལྡན་པའི་མི་ཚེ་ཞིག།
ཧ་ལམ་ང་ལ་མེད་ཐག་ཆོད་སོང་ལགས།།
འབྲི་གུང་ཚེ་བརྟན་རྡོ་རྗེ།
ཧ་རེ་ཧུར་རེ་མ་འབྲི་བསམ་བློ་ཐོངས།།
ཧ་ཅང་ཐལ་ན་གཞན་སེམས་དཀྲུག་ཉེན་ཆེ།།
ཧ་རིའི་ལྗོན་པའི་དྲི་བསུང་ཇི་བཞིན་དུ།།
ཧ་ལམ་སྙན་ཞིང་འཇེབས་པའི་གླུ་དབྱངས་ལོངས།།
བེ་རི་དཔལ་ལྡན་རྣམ་རྒྱལ།
ཧ་ཤང་ལྟ་བ་ཟེར་ནས་ཕར་ལ་གཡུགས།།
ཧ་ཅང་ལོག་ལྟ་གསུང་ནས་རྒྱབ་ཏུ་གཡུགས།།
ཧ་ཅང་ཞིབ་མོའི་བློ་ཡིས་བརྟག་པ་ན།།
ཧ་ལམ་བདེནཔ་ཟེར་བ་ཀུན་རྫོབ་ཅིག།།
འབྲི་གུང་ཚེ་བརྟན་རྡོ་རྗེ།
ཧ་ལམ་འཁོར་བ་སྤངས་པའི་བུ་ཁྱོད་ལ།།
ཧ་ཅང་འཇིག་རྟེན་སྙིང་པོ་ཐོབ་པར་དཀའ།།
ཧ་ལམ་སྲིད་ན་བྲལ་བའི་འཕགས་ནོར་ལ།།
ཧ་ཧ་དགྱེས་པའི་ངང་ནས་སྤྱོད་པར་འཚལ།།
བེ་རི་དཔལ་ལྡན་རྣམ་རྒྱལ།
ཧ་ཧ་རེད་དོ་ང་ཡི་གྲོགས་པོ་ལགས།།
ཧ་ཅང་ཟབ་པའི་དོན་ལ་ཡ་མི་བྱེད།།
ཧ་རེ་ཧོ་རེས་རྙོག་འཛིང་མི་བྱེད་པར།།
ཧ་ཧ་རྒོད་བཞིན་ཆོབ་འདྲ་བཤད་ན་བཟང་།།
འབྲི་གུང་ཚེ་བརྟན་རྡོ་རྗེ།
ཧ་གོ་དོན་ལྡན་མི་ལུས་ལན་གཅིག་འདིར།།
ཧ་ཅང་རིང་པའི་མ་འོངས་ཕྱི་མའི་ཆེད།།
ཧ་མྱུར་མོའི་བརྩོན་འགྲུས་རྟ་ཕོ་ལ།།
ཧ་ཅང་རན་པའི་ལྕགས་འདེབས་བྱོས་དང་ཀྱེ།།
བེ་རི་དཔལ་ལྡན་རྣམ་རྒྱལ།
ཧ་ཅང་ཆུང་ངུའི་དུས་ནས་གྲ་པ་བྱས།།
ཧ་ཅང་བདེ་སྐྱིད་བྲོ་བ་མྱོང་མ་མྱོང་།།
ཧ་ལོའི་བུ་མོའི་བྲོ་བ་མ་མྱོང་ན།།
ཧ་ལམ་དབུགས་ཀྱི་རྒྱ་བ་ཆད་ས་མེད།།
འབྲི་གུང་ཚེ་བརྟན་རྡོ་རྗེ།
ཧ་ཡང་ཇི་བཞིན་སེམས་པ་དཀར་ན་མཛེས།།
ཧ་ལའི་དུག་བཞིན་མནག་སེམས་སྤངས་ན་ལེགས།།
ཧ་རིའི་དྲི་བཞིན་ཚུལ་ཁྲིམས་ལྡན་ན་དགའ།།
ཧ་ཧ་གྲོགས་པོ་ཀུན་གྱི་མནོ་བསམ་ཐོངས།།
བེ་རི་དཔལ་ལྡན་རྣམ་རྒྱལ།
ཧ་ཅང་ཐོབ་པར་དཀའ་བའི་མི་ལུས་ཞེས།།
ཧ་ལམ་མཚན་ཉིད་སྨྲ་བ་ཀུན་གྱིས་བཤད།།
ཧ་ཅང་མཛེས་པའི་བུ་མོས་འཛུམ་བསྟན་ན།།
ཧ་མ་ཙོག་བུར་སྡོད་མཁན་ཨེ་ཡོད་སྙམ།།
འབྲི་གུང་ཚེ་བརྟན་རྡོ་རྗེ།
ཧ་ཅང་སྙིང་གི་འཕར་ཤུགས་ཆེ་བས་ནས།།
ཧ་ལམ་སྐད་ཅིག་ནང་དུ་འཆི་ངེས་པས།།
ཧ་ཧ་དགོད་ནས་རང་སེམས་རང་གིས་སོས།།
ཧ་རེ་ཧུར་རེར་མ་གནང་ཆོས་གྲོགས་ལགས།།
ཧ་ལའི་དུག་བཞིན་བུ་མོ་སྤངས་དགོས་ཟེར།།
ཧ་ལམ་ལྐོག་ནས་མི་དགེ་སྣ་ཚོགས་སྤྱད།།
ཧ་ཅང་ཡིན་མདོག་སྙམ་པའི་ང་རྒྱལ་ཅན།།
ཧ་ཅང་དེང་དུས་ཟོག་པོའི་སྤྱོད་པ་རེད།།
བེ་རི་དཔལ་ལྡན་རྣམ་རྒྱལ།
ཧ་ཅང་དཀོན་པའི་ནོར་བུ་རྩ་ཆེན་དེ།།
ཧ་ཅང་མཛེས་པའི་བུ་མོའི་གཞུག་ལཤོར།།
ཧ་ལམ་མི་ལུས་ཐོབ་པ་ཐེངས་གཅིག་ཀྱང་།།
ཧ་ཅང་སྐྱིད་པོ་བྱུང་ན་མི་འགྲིགས་སམ།
འབྲི་གུང་ཚེ་བརྟན་རྡོ་རྗེ།
ཧ་ཅང་ས་ཐག་རིང་པའི་གྲོགས་པོ་རྣམས།།
ཧ་ལམ་སྐད་ཅིག་ཕྲད་པའི་ཚན་རྩལ་འདིར།།
ཧ་ཅང་བསྟོད་པའི་སྙན་ཚིག་མེད་ན་ཡང་།།
ཧ་ཧ་དགོད་ནས་ཡག་པོ་འདུག་ཞེས་ཟེར།།
བེ་རི་དཔལ་ལྡན་རྣམ་རྒྱལ།
ཧ་ཅང་དམ་པོ་དགོས་པ་ཡིག་ཐོག་ཁྲིམས།།
ཧ་ཅང་འཆལ་པོར་སྤྱོད་པ་ཀུན་གྱི་ལུགས།།
ཧ་ལམ་འཛམ་གླིང་འདི་ན་བུ་མོ་ལ།།
ཧ་ཧ་ཟེར་ནས་མི་ཤོར་སུ་ཞིག་ཡོད།།
འབྲི་གུང་ཚེ་བརྟན་རྡོ་རྗེ།
ཧ་ཡིག་ལམ་ནས་བྲིས་པའི་ཚིག་རྙོགས་རྣམས།།
ཧ་ཅང་གཞུང་དྲང་མི་སྣའི་མདུན་བསྟར་ན།།
ཧ་ཧ་དགོད་པའི་འཕྱ་དམོད་མ་གནང་བར།།
ཧ་ཅང་མྱུར་མོར་རྒྱབ་སྐྱོར་བྱོས་དང་གྲོགས།།
བེ་རི་དཔལ་ལྡན་རྣམ་རྒྱལ།
ཧ་ཅང་སྐྱིད་བྱུང་ང་ཡི་གྲོགས་པོ་ལགས།།
ཧ་ཅང་དགའ་བྱུང་ཁྱེད་དང་ཐུག་པ་དེས།།
ཧ་ཅང་དྲ་ཐོག་བསྡད་རྒྱུ་རྒྱུན་རིང་ན།།
ཧ་ཧ་ཟེར་ནས་ཨམ་ཕྲག་རྒོད་ཡོང་དྲན།།
འབྲི་གུང་ཚེ་བརྟན་རྡོ་རྗེ།
ཧ་ཅང་བུ་མོས་བུ་ལ་དུངས་པ་དང་།།
ཧ་ལམ་བུ་མོ་མི་འདོད་སྐྱེས་པ་མེད།།
ཧ་ཅང་ཐལ་ཆ་ཆེ་བའི་ཕྱོགས་གཅིག་གཏམ།།
ཧ་ལམ་མྱུར་དུ་སྤོངས་ན་མི་ལེགས་སམ།།
ཧ་ལམ་ཁྱེད་ལས་སྐྱིད་མེད་བུ་ཆུང་ལགས།།
ཧ་རེ་ཧུ་རེ་མ་གནང་གཟབ་གཟབ་མཛོད།།
བེ་རི་དཔལ་ལྡན་རྣམ་རྒྱལ།
ཧ་ཧ་དྲ་གྲོགས་རྣམ་པ་ད་བཞུགས་རོགས།།
ཧ་ཅང་དབུལ་པོ་ཡིན་པའི་གྲྭ་རྐྱང་ང་།།
ཧ་ལམ་ཟླ་བ་གཅིག་གི་སྐུ་འགྱེད་ཀྱང་།།
ཧ་ལམ་འདི་ན་ཕྱིན་སོང་གྲོགས་པོ་ལགས།།།
འབྲི་གུང་ཚེ་བརྟན་རྡོ་རྗེ།
ཧ་དགོད་ལམ་ལས་ཡིད་ལ་གང་དྲན་གླེང་།།
ཧ་ཅང་མ་འཁྲུགས་བློ་སེམས་མཐུན་པས་དགའ།།
ཧ་ལམ་དྲ་ཐོག་འདི་ན་ཁྱོད་འདྲའི་གྲོགས།།
ཧ་ཅང་མང་ན་བདེ་སྐྱིད་རྫོགས་ཐབས་བྲལ།།
༢༠༡༡། ༩། ༦ ཉིན། དྲ་ཐོག་ནས་འབྲི་གུང་བ་ཚེ་བརྟན་རྡོ་རྗེ་དང་བེ་རི་དཔལ་ལྡན་རྣམ་རྒྱལ་གཉིས་ ཀྱིས་ཐོལ་བྱུང་སྙན་ངག་གི་ལམ་ནས་བགྲོ་གླེང་བྱས་པ་ཞིག་ཡིན།
